عبرانییل 3 - کتاب مقدس به زبان کردی جنوبی - گویش کلهوری

عیسا له موسا سەرتره

¹ جا ئێ برایل موقەدەس که وەناو دەنگ کردنەگەێ ئاسمانی هاوبەشین، فکردان بنەنه مل عیسا که ئەیوه ڕەسول و کاهن گەوراێگ که ئیمانه پێ دێریم و ئێقرارێ کیم.

² هەر ئەیو عیسا که ئەڕا کەسێگ که دیاریی کرد وەفادار بی، هەر ئەوجورە که موسای پەێخەمەریش وەناو گشت ماڵ خودا وەفادار بی.

³ چوینکه هەر ئەوقره که حرمەت ماڵ درسکەرگە له خود ماڵەگه فرەتره، عیسایش شایسەێ جەڵاڵێگ فرەتر له موسا وه حساو هاتێه.

⁴ چوینکه هەر ماڵێگ وه دەس کەسێگ نریدەپاوه، وەلێ درسکەر گشت چشتێگ خوداس.

⁵ ئێرنگه موسا له جیگەێ خزمەتکار، وەناو گشت ماڵ خودا ئەمین بی تا وه ئەو چشتیله که باێه وەشونەو بویشرێید، شاێەتی بێید.

⁶ وەلێ مەسیح، له جیگەێ یەێ کوڕ، ساێو ئختیار وه سەر ماڵ خودا، ئەمینە. ماڵەگەێ ئەیو ئیمەیم، ئەگەر وه ڕاسی قورس بلچکیێمنه دڵنیایمان و شانازیمان که وه ئمیدمان دێریم.

⁷ جا هەر ئەوجورە که روح‌القودوس فەرمایش کەید: «ئیمڕو، ئەگەر دەنگ ئەیو شنەفین،

⁸ دڵدان ڕەقەو مەکەن، ئەوجورە که وەناو ئەو ئاژاوە کردین، وه ئەو ڕوژ ئەزمونه وەناو بیاوان،

⁹ هەر ئەو شونه که باپیریلدان من ئەزمون کردن، هەرچەن چل ساڵ کاریل مه دوین.

¹⁰ هەر وه ئی سەوەوه، وە ئەو نەتەوه توڕیام و وەتم: ”ئەوانه هەمویشه وەناو دڵ خوێان گومڕان، ئەوانه ڕێیلم نەناسینه؛“

¹¹ جا وەناو توڕه بوین خوەم قەسەم خواردم که وه ئەو شون ئاشاسێگ مه ڕێ پەێا نیەکەن.»

¹² ئێ برایل، ئاگادار بون که نەخواێ کەسێگ له لێدان دڵ شەڕئاشو و بی ئیمان بێاشتود که ئیوه له ڕێ خوداێ زنی چەفتەو بکێ.

¹³ بەڵکەم هەرچێ ڕوژه، تا وەختێگ که وەپێ ئویشرێ ’ئیمڕو‘ یەکترەکی هان بێین، تا هویچ کەسێگ له ئیوه وه فێڵ گونا، دڵڕەقەو نود.

¹⁴ ئەڕا ئیه که ئیمه وەناو مەسیح بەشدارەو بویمنه، ئەگەر وه ڕاسی ئەو دڵنیاییه که له سەرەتایی داشتیم تا وه ئاخر قورس بپارێزنیم.

¹⁵ ئەوجورە که وەناو کتاو زەبور وەتریا: «ئیمڕو، ئەگەر دەنگ ئەیو شنەفین، دڵدان ڕەقەو مەکەن، ئەوجورە که وەناو ئەو ئاژاوە کردین.»

¹⁶ چوینکه ئەوانه که شنەفتن وەلێ هێمراێ ئاژاوە خستنه ڕێ، مەر چ کەسیلێگ بین؟ مەر گشت ئەوانه نوین که موسا له مسر هاوردیانه دەیشت؟

¹⁷ له چ کەسیلێگ چل ساڵ توڕه بی؟ مەر نه ئەوانه که گونا کردن، هەر ئەوانه که لەشەگانیان کەفته ناو بیاوان؟

¹⁸ له باوەت چ کەسیلێگ قەسەم خوارد که وەشون ئاشاسێگ ئەیو ڕێ پەێا نیەکەن؟ مەگەر نه هەر ئەوانه که ملچەفتەو کردن؟

¹⁹ جا دوینیم که ئەوانه وه سەوەو بی ئیمانی بی که نەتویەنسن ڕێ پەێا بکەن.