عبرانییل 2 - کتاب مقدس به زبان کردی جنوبی - گویش کلهوری

هوشدان بود نجات نەخینه پشت گوش

¹ جا ئیمه باێه وه ئەو چشته که شنەفتیمنه فره فێشتر سرنج بێیم، نەخواێ له ڕێ ئەو چشته که شنەفتیمنه دەر بچیم.

² چوینکه ئەگەر ئەو پێخامه که له ڕێ فریشتەیل جار دریاد و مور بی که بود دڵنیایی وەپێ بکرێ و هەر خەتا یا ملەجەرێگ سزاێ دادپەروەرانەێ گرد،

³ جا ئەگەر ئیجور نجات فره گەوراێگ نوینیم، ئێ چوی تویەنیم له سزاگەێ دەر بچیم؟ یەکم جار له ڕێ خوداوەند عیسا ئی نجاته جار دریاد و وەشونێ له ڕێ کەسیلێ که شنەفتن، ئەڕامان مور کریا،

⁴ وه حاڵێگەو خودایش وه ئەوه شاێەتی دا، وەگەرد نیشانەیل و چشتیل ئەڵاجوی و موجزەیل جورواجور و خەڵاتییل روح‌القودوس، که ئەوانه وه پێ خاست خوەێ بەشەو کردیاد.

عیسا خوەێ کەێده جور برایلێ

⁵ چوینکه خودا ئەو جهان وەره ڕویه که له باوەتێ قسیه کەیمن، نەخسته ژێر دەس فریشتەیل.

⁶ وه شونێگ وەناو کتاو زەبور شاێەتی دریاس: «ئنسان چەس که باریدەێ هویرد یا کوڕ ئنسان چەس، که سرنج کەێده پێ؟

⁷ ئەوه ئەڕا ماوەێ کەمێگ خوارتر له فریشتەیل درسی کردی، تاج جەڵاڵ و حرمەت نایدەسه بان سەری

⁸ و گشت چشتێ نایدەسه ژێر پایلێ و ژێر فەرمانێ.» ئێرنگه خودا وەگەرد ناین گشت چشتێ وه ژێر فەرمانێ، چشتێ نەێشت که وه ژێر دەسێ نود. هەر ئێرنگه، هێمراێ نیوینیمن که گشت چشت وه ژێر فەرمانێ بود.

⁹ وەلێ ئەیو دوینیمن که ماوەێ کەمێگ خوارتر له فریشتەیل دانریا، یانێ عیسا، که وه خاتر ئیه که رەنج مەرگ کیشا، تاج جەڵاڵ و حرمەت نریا بان سەری، تا وه پێ فیز خودا ئەڕا گشتیەکی تام مەرگ بکێ.

¹⁰ ئەڕا ئیه که شایسه بی خودا، که گشت چشتێگ ئەڕا ئەیو و له ڕێ ئەیو هەس، ئەڕا ئیەک کوڕيل فرەێگ وه جەڵاڵ برەسنێ، بنیادنەر نجاتیان له ڕێ رەنج، کامڵەو کەید.

¹¹ چوینکه ئەیو که موقەدەسەو کەید و ئەوانه که موقەدەسەو بون، گشتێان له یەێ باوگن. وه ئی باوەته، عیسا شەرمێ نیەتیێد ئەوانه وه برا بخوەنێ.

¹² ئەو جوره که وەناو کتاو زەبور فەرمایش کەید: «ناو توی وه برایلم جار دەم؛ وەناوڕاس جەماێەت، بەیت حەمد و ستایش ئەڕاد چڕم.»

¹³ وه دواره وەناو کتاو ئەشعەیا فەرمایش کەید: «مه پشت بەسمه ئەیو.» هەم وەدواره: «بنوڕ، من و مناڵیلی که خودا داسه پێم.»

¹⁴ جا چوینکه مناڵیل وەناو خوین گوشت بەشدارن، هەر ئیجوره ئەیویش خوەێ وەناو ئی چشتیله بەشدارەو بی تا له ڕێ مەرگ، خاون هێز مەرگ یانێ ئبلیس له بین بوێد و

¹⁵ گشت ئەو کەسیله که وه سەوەو زاور چین له مردن گشت زنەییان گیروده بین، ڕزگار بکێد.

¹⁶ چوینکه خاس ڕوشنه که ئەیو وه فریشتەیل مەیەت نێی، بەڵکەم مەیەت نەتەوەێ ئێبراهیم پەێخەمەر دێ.

¹⁷ وه ئی بونه، واجو بی له هەر باوەتەو بوده جور برایل خوەێ تا بتویەنێ وه جیگەێ کاهن گەوراێگ که وه بەزەیێه و ئەمینە، وه خزمەت خودا بود و ئەڕا گونایل قەومەگه کەفارەت بکێد.

¹⁸ چوینکه ئەیو خوەێ وەختێ که ئەزمون بی رەنج کیشاس، تویەنێ ئەوانه که ئەزمون بون، مەیەتیان بێید.