عبرانییل 13 - کتاب مقدس به زبان کردی جنوبی - گویش کلهوری

ئاموژیاریێل ئاخر

¹ بیلن مابەت برایی بەردەوام بود.

² مێوانداری له غەریویل مەخەنه پشت گوش، ئەڕا ئیه که بڕێگ وەگەرد ئیجور کارێگ، بی ئەوه که خوێان بزانن، له فریشتەیل مێوانداری کردنه.

³ ئەوانه که هانه ناو زندان بارنه هویردان، ئەوجورەکە چماێ خوەدانیش وەگەرد ئەوانه هاینه ناو زندان؛ هەر ئیجوره کەسیلێ وه هویردان بون که وەگەردێان وه خراوی ڕێ رەوشت کەن، ئەوجورەکە چماێ خوەدانیش وەناو جەسه رەنج کیشین.

⁴ بیلن هاوسەردارێ وەناو گشتیەکی حرمەت بیاشتود و بین ژن و شوی پاک بمینێ، چوینکه خودا خێزیل و داوانپێسیل داوەری کەی.

⁵ زنەییدان دویر له پویلدوسی بود و وه ئەو چشته که دێرین قانێ بوین، چوینکه خودا فەرمایش کردێه: «هەراێهەر نه وێڵد کەم، و نه هیلمەدە جێ.»

⁶ جا تویەنیم وه دڵنیایی بویشیم: «خوداوەند یاوەر منه، زاورم نیەچود. ئایەمیزاێ چه تویەنێ وەپێم بکێ؟»

⁷ ڕابەريلدان که کەڵام خودا ئەڕادان ئویشن، وه هویردان بون. وردەو بونه بەرێگ که ڕێ رەوشت زنەییان دەێده دەس و له ئیمانێان نمونه بگرن.

⁸ عیسا مەسیح دویەکه و ئیمڕو و تا ئەبەد هەر ئەوەسه.

⁹ وەگەرد تالیمیل جورواجور و عەڵاجوی له ڕێ دەر نەچین؛ چوینکه خاسه که دڵ ئنسان له فیز وەقەوەتەو بود، نه له خواردەمەنیێلێ که ئەڕا کەسیلێگ که خوێان وەقفێ کردنه، هویچ نەفێگ نیاشتیه.

¹⁰ ئیمه قوروانگاێگ دێریم که خزمەتکاریل دەوار حەق نێرن له ئەو چشته که ها بانێ بخوەن.

¹¹ کاهن گەورا، خوین گیانەوەریل هەر جور قوروانی گونا بیده ناو موقەدەسترین شون، وەلێ لەشیل له دەیشت ئوردوگاه سزیەن.

¹² هەر ویجوره، عیسایش له دەیشت دەروازەێ شار رەنج کیشا تا له ڕێ خوین خوەێ، قەومەگه تەقدیسەو بکێد.

¹³ جا باین بچیمنه دەیشت ئوردوگاه ئەڕا لاێ ئەیو و ئەو سەرزەنشته که ئەیو تاموڵ کرد، وه کوڵ خوەمانەو هەڵگریم.

¹⁴ چوینکه وه ئێره شارێگ که هەر بمینێد، نێریم بەڵکەم هایمنه شون ئەو شاره که باێه باێ.

¹⁵ جا باین له ڕێ عیسا یەێ‌سەر قوروانی سپاس پیشکەش خودا بکێم. ئی قوروانیه، هەر ئەو بەر دەم و لیویلێگه که ناو ئەیو وه زوان تیەرن.

¹⁶ خاسێ کردن و بەشدار کردن ئەو باقی مەردم وه ئەو چشته که دێرین مەخەنه پشت گوش، چوینکه ئیجور قوروانیيلێگ خودا خوەشنودەو کێ.

¹⁷ گوش له ڕابەريلدان بتەکنن و له لێان پێرەوی بکێن؛ چوینکه ئەوانه چەویان ها له گیانیل ئیوه و باێه حساو بیەنەو. بیلێن تا ئەوانه ئیه وه شادمانی بکەن نه وەگەرد ئاخ هەڵکیشان و ناڵین، چوینکه ئیه وه نەفدان نیه.

¹⁸ ئەڕا ئیمه دوعا بکەن، چوینکه دڵنیایم که وژدانمان پاکه و توایم وەناو گشت چشت وه درسی ڕێ رەوشت بکێم.

¹⁹ وه تایبەتی لاڵکمه پێدانەو دوعا بکێن که بتویەنم هەر چی زویتر بامەو ئەڕا لادان.

²⁰ ئیسه، خوداێ ئاشتی و سڵامەتی که شوان گەوراێ پەسیل یانێ خوداوەند ئیمه عیسا وه خوین ئەو پەێمان ئەبەدیه له مردگیل زنیەو کرد،

²¹ وه هەر چشت خاسێگ ئیوه گورجەو بکێ تا خاست ئەیو وەجێ بارین. با که خودا هەر چی که سەوەو خوەشنودی بود له ڕێ عیسا مەسیح وەناو ئیمه وە جا بارێ، هەر ئەیو عیساێ مەسیحه که تا ئەبەد و تا ئەبەد جەڵاڵ وه ئەیو بود. ئامین.

²² ئێ برایل، لاڵکمه پێدان ئی کەڵام ئاموژیاری‎دەر منه تاموڵ بکێن، چوینکه کوڵ و کوڵبڕ ئەڕادان نویسامه.

²³ ئیوه باێه بزانین که براگەێ ئیمه تیموتاوس ڕزگار بیه. ئەگەر ئەوه زوی باێد، وەگەردیەو تیەم تا بوینمەدان.

²⁴ وه گشت ڕابەريلدان و تەمام ئیمانداریل وه مەسیح سڵام برەسنن. ئەوانەێ که له ئیتالیان، سڵامدان رەسنن.

²⁵ فیز خودا وەگەرد گشتدانەو بود.