عبرانییل 12 - کتاب مقدس به زبان کردی جنوبی - گویش کلهوری

خودا مناڵیلی ئەدەو کەی

¹ جا چوینکه ئیجور هەور فره گەوراێگ له شاێەتیل دەورەمان کردنه، باین هەر بار و هەر گوناێگ که ئیجوره سەخت لچکێده پێمانەو، له خوەمان دویرەو بکێم و باین تا وەگەرد بەردەوام بوین له موسابقەێگ که له نوامان نریاس، بدەویم.

² باین چەو بوڕیمنه عیسا که بنیادنەر و کامڵکەر ئیمانمانه، که ئەڕا ئەو خوەشیه که له نوای بوی، سەلیب تاموڵ کرد و نەنگ ئەوه سوک وه حساو هاورد و ئێرنگه وه لاێ ڕاس تەخت خودا نيشتیه.

³ وه ئەیو فکر بکێن که ئیجور دشمەنیێگ که له لاێ گوناکاریل وه زد خوەێ بوی تاموڵ کرد، تا ئیوه شەکەت یا دڵسەرد نوین.

⁴ هێمراێ له جەنگ خوەدان وه زد گونا تا پاێ گیان نەوساینه.

⁵ مەر ئەو قسیەێ هاندەره که ها ناو کتاو مەسلەتیل سلێمان له هویردان چیه که وه ئەوره ئیوه وه جیگەێ کوڕيل چڕێد، فەرمایش کەید: «ئێ کوڕەگەم، ئەدەو کردن خوداوەند سوک وه حساو نار و وەختێ گرێدەده گازتاوه، دڵسەرد نەو.

⁶ چوینکه خوداوەند ئەوه که دوسی دێرێ، ئەدەوی کەید، و هەر کەس که وه مناڵ خوەێ قەبوڵێ کەی، گرێدەێ گازتاوه.»

⁷ ئەڕا ئەدەو بوینه که ئیوه باێه تاموڵ بکێن؛ ڕێ رەوشت خودا وەگەردانەو‎و هەر جور کوڕيل خوێه. چوینکه کام کوڕه که باوگێ ئەدەوی نەکێد؟

⁸ ئەگەر ئیوه ئەدەو نوین هەر ئەو ئەدەوه که گشت بینه، جا زوڵەزاین، نه کوڕیل ڕاسەکانی.

⁹ بێجگه ئیه، باوگیلێگ جەسەیی داشتیمنه که ئەدەومان کردن و ئیمه حرمەتیان گردیم. ئیسه، چەنێ فرەتر باێه له باوگ روحیل گوش بتەکنیمن تا زنەیی بیاشتویمن.

¹⁰ چوینکه باوگیلمان ماوەێ کەمێگ ئەو جوره که خاس زانستنه ئەدەومان کردن. وەلێ خودا ئەڕا نەف خوەمان ئەدەومان کەید تا وەناو قودوسیەت ئەیو بەشدارەو بویمن.

¹¹ چوینکه هەر لەون ئەدەوێگ وەختێ دێرێ ئەنجام گری ئیجوره وه چەو تێد که ژان دێرێ و خوەش نیه، وەلێ وەشونێ ئەڕا کەسیلێ که وەگەردێ ئەدەو بینه بەر سالح بوین دەێده دەس که پڕ له ئاشتی و سڵامەتیه.

¹² جا دەسيل بی هازدان هەڵوڕنن و زرانییلدان که کەفتیەسه ڕکه وه قەوەتەو بکێن!

¹³ ئەڕا پایلدان ڕێیل ڕاسەو بکەن، تا پاێ شەل له قولتخ دەر ناید، بەڵکەم شەفا پەێا بکێد.

هەڕەشه له باوەت هەڵوگەردیان وەرەو گونا

¹⁴ سەخت تەقالا بکەن که وەگەرد گشت مەردم وەناو ئاشتی و سڵامەتی بێەنێ سەر و موقەدەس بوین، چوینکه جیا له قودوسیەت هویچکەسێگ خوداوەند نیوینێد.

¹⁵ هوشدان بود که نەخواێ کەسێگ له لێدان نەتویەنێ فیز خودا وه دەس بارێد تا هویچ ریشەێ تیەڵێگ جویق نێید و نوده بایس پەشێوی و وه وەسلەێ ئەوه قێر فرەێگیش ناپاکەو نەکێ.

¹⁶ ئاگادار بوین که هویچکامدان خیز نوین یا هەر جور عیسو وەقف بێندان له دەس نێین هەر ئەو عیسو که وەبونەێ جامێگ ئاش، حەق یەکم زگی خوەێ فروت.

¹⁷ چوینکه ئیوه زانين که وەشون ئەوه، وەختێگ که تواس بوده میراتیخوەر ئەو بەەرکەته، ڕەدکریا. چوینکه دەرفەتێگ ئەڕا توبه پەێا نەکرد هەرچەن وەگەرد ئەسر چەو وەشونێ بی.

¹⁸ چوینکه وه کویەێگ نزیکەو نوینه که بود دەس بیێده قەێەو، کویەێگ که گڕێ ئاگرێ باێد؛ نه وه تیەریکی و سیەی و وای تن؛

¹⁹ نه وه قیڕەێ شەیپور و نه وه دەنگێگ که ئەوانه که شنەفتن، لاڵکیان که دیتر وەگەردێانەو قسیه نەکێد.

²⁰ چوینکه نەتویەنستن ئەو فەرمانه که دریاوی تاموڵ بکەن که وەتیاد، «تەنانەت ئەگەر گیانەوەرێگ بێیده قێ کویەگەوه، باێه کوچگواران بود.»

²¹ وه ڕاسی ئەو دیمەنەگه ئەوجورە زیەلەتەرەکن بی، که موسای پەێخەمەر وەت: «له ترسەو کەفتمەسه ڕکه.»

²² وەلێ ئیوه هاتینەسه ئەڕا کویەێ سەهیون و وه شار خوداێ زنی که ئورشەلیم ئاسمانیه. هاتینەسه ناو جەم سەرخوەش فریشتەیلێ که نیود بژمارێدیان،

²³ هاتینەسه ناو جەماێەت یەکم زگێل که ناویلێان وەناو ئاسمان نویسریاس. هاتینەسه ئەڕا لاێ خوداێگ که وه گشتیەکی داوەری کەی، هاتینەسه ئەڕا لاێ روحیل سالحانیلێگ که کامڵەو بینه،

²⁴ هاتینەسه ئەڕا لاێ عیسا که ناوجێکەر پەێمانێگ تازەس و هاتینەسه ئەڕا لاێ خوین پاشیاێگ که له خوین هابیل خاستر قسیه کەید.

²⁵ هوشدان بود که له گوش داین ئەوه که قسیه کەید، ڕوی هەڵونەگەردنین. چوینکه ئەگەر ئەوانه که وه ئەو کەسه که وەبان زەوی هەڕەشه داویه پێان، گوش نەتەکانن، ڕێ دەرچینێگ له موجازات پەێا نەکردن، جا ئەگەر ئیمه ئەو کەسه که له ئاسمانەو هەڕەشه دەێەپێمان ڕەد بکێم، چوی تویەنیمن له موجازاتەگەێ دەر بچیم.

²⁶ وه ئەو وەخته دەنگ ئەیو، زەوی خسته ڕکه، وەلێ ئێرنگه واده داس که «یەێ جارتر نه تەنیا زەوی بەڵکەم ئاسمانیلیش تیەرمه ڕکه.»

²⁷ ئی قسیەێ ’یەێ جارتر‘ وه له بین بردن چشتیلی ئاماژه کەی که کەفنه ڕکه، یانێ چشتیل درس کریاێ، تا چشتیلی که نیەتویەنن بکەفنه ڕکه، باقی بمیند.

²⁸ جا باین وه خاتر وه دەس هاوردن پادشایێگ که نیەتویەنی بکەفیده ڕکه، شوکر بکێمن و ویجوره پەرەسشێگ پەسەن کریاێ وەگەرد ترس و حرمەت پیشکەش خودا بکێم،

²⁹ چوینکه «خوداێ ئیمه ئاگرێگه که سزنێد و کەێده خوڵەکەو.»