عبرانییل 11 - کتاب مقدس به زبان کردی جنوبی - گویش کلهوری

قارەمانیل ئیمان

¹ ئیمان، دڵنیایی وه ئەو چشتیلەسه که ئمیدەپێ بەسایمنه و خاترجەم بوین وه چشتیلێگه که نیەوینریەن.

² چوینکه وه سەوەو ئیمان بی که له باوەت مەردم جاران تاریف کریاس.

³ وه ئیمانه که زانیمین جهان وه وەسلەێ کەڵام خودا درس کریا، ئەوجورە که ئەو چشته که دوینرێی له چشتیل دیاری درس نەکریا.

⁴ وه ئیمان بی که هابیل قوروانی قەبوڵ‎کریاێگتر له قوروانیەگەی قائن وه خودا پیشکەش کرد و له ڕێ هەر ئی ئیمانه له باوەت هابیل شاێەتی دریاس که سالحانه، چوینکه خودا وەگەرد قەبوڵ کردن پیشکەشییلێ له لێ تاریف کرد. له ڕێ ئیمانێه، هەرچەن مردگه وەلێ هێمراێ قسیه کەید.

⁵ وه ئیمان بی که خەنوخ بڕیاده بان تا تام مەرگ نەکێ و ئەوه پەێا نوی، چوینکه خودا بردویەێ. ئێرنگه وەرجه بردنێ، له باوەتێەو شاێەتی دریاد که خودا خوەشنودەو کردوی.

⁶ بی ئیمان مەحاڵ کەسێگ بتویەنێ خودا خوەشنودەو بکێ، چوینکه هەر کەسێگ وه خودا نزیکەو بود، باێه ئیمان بیاشتود که ئەیو هەس و ئیه که دەسخوەشانه دەێده کەسیلێگ که وەشونیەو گەردن.

⁷ وه ئیمان بی که نوح وەختێ که له لاێ خوداوه له باوەت هەڵکەفتیلێ که تا ئەو وەخته نوینریاوید هەڕەشه دریاده پێ، وه ترس و حرمەتەو ئەڕا نجات بنەماڵەگەێ خوەێ کەشتی درس کرد. ئەوه وه ئیمان خوەێ دنیا ماکوم کرد و بیه میراتی خوەر ئەو سالح بوینه که له ڕێ ئیمان تێد.

⁸ وه ئیمان بی که ئێبراهیم پەێخەمەر وەختێ دەنگ کریا، تا بچوده ئەڕا شونێگ که وەشونێ وه میراتی گردیاد، گوش تەکان؛ هەرچەن نیەزانست چوده ئەڕا چ شونێگ وەلێ کەفته ڕێ.

⁹ وه ئیمان بی که ئەوه چی تا وەناو میلکان واده دریاێ، وەناو وڵات غەریو هەر جور بیگانەێگ زنەیی بکێ و وەگەرد ئەسحاق و یاقوب که وەگەردیەو میراتیخوەر هەر ئەو واده بوین، وەناو دەواریل زنەیی کرد.

¹⁰ چوینکه چەوەڕێ شارێگ بی که بنیادێ بەردەوامه و مێمار و درسکەرەگەی خوداس.

¹¹ وه ئیمان بی که سارا خوەێ هەرچەن سن و ساڵی گوزیشتوی که مناڵدار بود تویەنایی گرد تا ئێمڵه بود؛ ئەڕا ئیه که وادەدەرەگه ئەمین زانست.

¹² ویجوره، له یەێ پیا، ئەوەیشه له کەسێگ که جور مردگێگ وەپێ هاتوی، نەتەوەێگ فره گەورا هەر جور هەسارەیل ئاسمان و جور شنیل لیوەێ دەریا که نیود بژمارێدیان، هاته دنیا.

¹³ ئیانه گشتێان وەناو ئیمان مردن، بی ئەوه که چشتیل واده دریاێ پەێا بکەن، بەڵکەم تەنیا ئەوانه له دویرەو دوین و سڵامیان کردوین. ئەوانه وه زوان هاوردن که له بان زەوی، غەریو و بێگانەن.

¹⁴ چوینکه ئەوانه که ئیجوره قسیه کەن، ئاشکرا نیشان دەن مینەێ نیشتمانیگ ئەڕا خوێان کەن.

¹⁵ ئەگەر وه میلکانێگ فکر بکردیان که هیشتوینێ جێ، دەرفەت هەڵوگەردیان داشتیان.

¹⁶ وەلێ هەرئەوجوره که دوینیم تاسەێ نیشتمانیگ خاستر داشتن، یانێ نیشتمانیگ ئاسمانی. وه ئی بونه، خودا عارێ نیەتێی خوداێ ئەوانه بخوەنرێید، چوینکه شارێگ ئەڕاێان گورجەو کردێه.

¹⁷ وه ئیمان بی که ئێبراهیم وەختێ ئەزمون کریا، ئەسحاق هەر‎ جور قوروانی پیشکەش کرد؛ ئێبراهیم که وادەیل گردویه وەر گورجەو بی تەنیا کوڕەگەێ خوەێ قوروانی بکێد،

¹⁸ هەر ئەوه که له باوەتێەو وەتریاوی: «نەتەوەێ تو ناو خوەێ له ئەسحاق گری.»

¹⁹ ئێبراهیم ئیجوره فکر کرد که خودا تویەناس تەنانەت ئەسحاق له مردگیل زنیەو بکێد و تویەنیم بویشیم یەێ جوریلێگ ئێبراهیم، ئەسحاق له مەرگ وەرگرتەو.

²⁰ وه ئیمان بی که ئەسحاق، یاقوب و عیسو له باوەت کاریل وەرەڕوی بەەرکەت دا.

²¹ وه ئیمان بی که یاقوب له وەخت مردن، هەر کام له کوڕيل یوسف بەەرکەت دا و وه حاڵێگەو که وه مل گوچانەگەێ خوەێ پاڵەو داوید، سجدەی خودا کرد و پەرەسشێ کرد.

²² وه ئیمان بی که یوسف وه ئاخر زنەیی خوەێ، له وه دەیشت هاتن قەوم ئێسرائیل له مسر قسیه کرد و له باوەت سقانیل خوەێ دەستوریلێگ دا.

²³ وه ئیمان بی که داڵگ باوگ موسا وەشون وه دنیا هاتنێ وه ماوەێ سێ مانگ شاردنەوەێ، چوینکه دین مناڵەگه ڕەنگینه؛ جا له حوکم پادشا رخێان نەچی.

²⁴ وه ئیمان بی که موسا وەختێ گەورا بی، نەتواس دویەترزای فرعون بخوەنرێید.

²⁵ ئەوه ئیه هەڵوژارد تا وەگەرد قەوم خودا وەلێا خراوی بکەن تا ئیه که له خوەشییل گونا که زوی تەمام بون، لەزەت بوی.

²⁶ ئەو سەرزەنشتێگ که وەبونەێ مەسیح کریاویه پێ، دارایی گەوراترێگ له گەنجیل مسر زانست، چوینکه چەو بڕویه دەسخوەشانەگه.

²⁷ وه ئیمان بی که موسا مسر هیشته جێ و له توڕەیی پادشا ڕخێ نەچی، چوینکه ئەوه جور کەسێگ که خوداێ نادیاری هەمویشه له وەر چەویل خوەێ دوینید، بەردەوام بی.

²⁸ وه ئیمان بی که موسا پسەخ و پاشین خوین وه جێ هاورد تا فریشتەێگ که یەکم زگیل له بین بردیاد، وه یەکم زگیل ئێسرائیل دەس دریژی نەکەید.

²⁹ وه ئیمان بی که قەوم جویلەکە له ناوڕاس دریاێ سویر هەر جور زەویێگ وشک گوزیشتن؛ وەلێ وەختێ مسرییل تەقالا کردن هەر ئەو کاره بکەن، خنکیان.

³⁰ وه ئیمان بی که دیواریل شار ئەریحا وەشون ئیەک قەوم جویلەکە هەفت ڕوژ وه دەوریەو خڕ خواردن، ڕمیا مل یەکا.

³¹ وه ئیمان بی که راحاب داوانپێس وەگەرد ئەوانه که ملچەفتەو کردیان، نەکوشریا چوینکه له جاسوسەگان وه ڕوی خوەش مێوانداری کرد.

³² دیتر چه بویشم؟ چوینکه دەرفەت نیه له باوەت جەدعون و باراق و شەمشون و یەفتاح و داود پادشا و سەموئیل و پەێخەمەریل قسیه بکەم،

³³ ئی ئایەمیله که له ڕێ ئیمان، پادشاییل داگیر کردن، دادپەروەری دامەزرانن، وادەگان وه دەس هاوردن؛ دەم شێریل بەسان،

³⁴ بڵێزەیل گڕان ئاگر کوشاننەوه و له دەم شمشێر دەرچین؛ بی هازییان بیه هێز، وەناو شەڕ تویەنا بین و لەشکەریل بێگانه تەفرتوینا کردن.

³⁵ ژنيل، مردگیلێان زنی وەرگرتنەوه. بڕێگ شکەنجه بین و ڕزگاری قەبوڵ نەکردن، تا ئەڕا یەێ زنەیی خاستر زنیەو بون.

³⁶ بڕێگتر تویلەکی وەپێان کریاد و قەمچی خواردن و تەنانەت وه زنجیر کیشان و کەفتنه زندان.

³⁷ کوچگواران بین، وه هەڕه بینه دو کوت و وه شمشێر کوشریان. وەناو پوس مێ و بزنیل دەستەنگ، بەردکیش و وه خراوی وەگەردێان ڕێ رەوشت کریاوی، ئاواره بوین.

³⁸ ئیانه که ‎جهان لایقێان نوی، وەناو بیاوانیل و کویەیل و ئشکەفتیل و دەراویل زەوی، سەرگەردان بوین.

³⁹ ئیانه گشتێان هەرچەن وه سەوەو ئیمانێان تاریفه لێان کریا. وەلێ ئەو چشته که وەپێان واده دریاوی، پەێا نەکردن.

⁴⁰ چوینکه خودا چشت خاسترێگ ئەڕا ئیمه گورجەو کردوی تا ئەوانه جیا له ئیمه کامڵ نەون.