عبرانییل 10 - کتاب مقدس به زبان کردی جنوبی - گویش کلهوری

یەێ جار ئەڕا هەمویشه قوروانی مەسیح

¹ له ئەوره که شەریعەت تەنیا ساێەڕکی چشتیل خاس وەره ڕویه، نه شێوەێ ڕاسەکانی ئەوانه. وه ئی بونه، هەراێهەر نیەتویەنێد وەگەرد قوروانییلێگ که ساڵ وه ساڵ یەێ‌سەر پیشکەش کرێید، ئەوانه که ئەڕا پەرەسش نزیکەو بون، کامڵەو بکێد.

² ئەگەر نه قوروانی پیشکەش کردنەگەێان مەر قەت نویاد؟ چوینکه ئمجا پەرەسش کەرەگان یەێ جار پاکەو بویان و دی وەیولا ئەڕا گونایل، خوێان تاوانبار نەکردیان.

³ وەلێ ئی قوروانیيله هەر چی ساڵه گونایل خیده هویرێان،

⁴ ئەڕا ئیه که خوین گاێیل و بزنیل مەحاڵ که گونایل له بین بوێد.

⁵ وه ئی بونه، وەختێ که مەسیح هاته ناو ئی جهانه، فەرمایش کرد: «وه قوروانییل و پیشکەشییل مەیلیگ نیاشتی، وەلێ جەسەێگ ئەڕا مه گورجەو کردی؛

⁶ خوەشنودی توی له ئیه نویه که قوروانییلی که سزننێ و قوروانییل گونا پێشکەشد بکرێی.

⁷ ئەو وەخته وەتم: ”ئێ خودا بنوڕ، مه هاتمه، تا خاست تو وه جێ بارم؛ هەرئەوجوره که وەناو تومار کتاو له باوەتم نویسریاس.“»

⁸ یەکم جار ئویشێد: «وه قوروانییل و پیشکەشییل، قوروانییلی که سزنن و قوروانییل گونا مەیلیگ نیاشتی و له ئەوانه خوەشنودەو نویده» هەر چەن که ئیانه وه پێ شەریعەت پیشکەش بویان.

⁹ ئمجا فەرمایش کەید: «بنوڕ، مه هاتمه تا خاست تو وه جێ بارم.» ئەیو یەکمیەگه نێده لا تا دویمیەگە بنێده پاوەو.

¹⁰ وەگەرد هەر ئی خاسته، ئیمه له ڕێ قوروانی جەسەێ عیسا مەسیح یەێ جار ئەڕا هەمویشه تەقدیسەو بیمنه.

¹¹ هەر کاهنێگ، هەر چی ڕوژه ئەڕا خزمەتەگەی وسێده پاوه و هەر ئەو قروانیيله که هەراێهەر نیەتویەنن گونایل له بین بوەن، یەسەر پیشکەش کەن.

¹² وەلێ مەسیح وەشون ئیه که ئەڕا هەمویشه یەێ قوروانی وەبونەێ گونایل پیشکەش کرد، دانیشته دەس ڕاس خودا.

¹³ له ئەو وەختەو، چەوەڕێه تا ئەوسا که دشمەنیلێ بونه کورسی ژێر پاێ ئەیو،

¹⁴ چوینکه وەگەرد یەێ قوروانی، تەقدیس بیەگان ئەڕا هەمویشه کامڵەو کردێه.

¹⁵ روح‌القودوسیش شاێەتی دەێده پێمان. یەکم جار فەرمایش کەێد:

¹⁶ «خوداوەند ئویشێد، ئیەسه پەێمانێگ که وەشون ئەو ڕوژیله وەگەرد ئەوانه بەسم. حوکمیل خوەم نەمه ناو دڵیان، و له بان زەین ئەوانه نویسمیان.»

¹⁷ وەشون ئەوه فەرمایش کەی: «گونایل و کاریل گەنیان دیتر نیەتیەرمه هویرم.»

¹⁸ له ئەوره که بەخشین گونایل هەس، دیتر هەوەجی ئەڕا پێشکەش کردن قوروانی ئەڕا گونا باقی نیەمیند.

دەنگ کردن وه بەردەوام بوین

¹⁹ جا ئێ برایل، له ئەوره که وه خوین عیسا تویەنيمن وه دڵنیاییەو بچیمنه ناو موقەدەسترین شون،

²⁰ یانێ له ڕێیگ تازه و زنی که له ڕێ ئەو پەرده یانێ له ڕێ جەسەێ خوەێ ئەڕامان واز کرد و

²¹ له ئەوره که کاهنێگ گەورا وه سەر ماڵ خودا دێریم،

²² باین تا وه دڵێگ ڕاس و دڵنیایی تەمام ئیمان، نزیک خودا بویمن، وه حاڵێگەو که دڵیلمان له وژدان خراو پاکەو بویه و جەسەیلمان وەگەرد ئاو پاک شوریاس.

²³ باین تا بی ئەوه که شک بکێم، قورس بلچکیێمنه ئمیدێگ که ئێقراره پێ کیم، چوینکه وادەدەرەگه ئەمینە.

²⁴ باین وەناو فکر ئەوه بویمن که چوی یەکترەکی ئەڕا مابەت و ئەڕا وەجێ هاوردن کاریل خاس هەڵبگڕنیم و

²⁵ له گردەو بوینمان وەگەرد یەکترەکی واز ناریم، ئەوجورە که ئەڕا بڕێگ بیەسه نەریتیگ، بەڵکەم یەکترەکی هان بێیم، وه تایبەتی ئێرنگه که شاێەت نزیکەو بوین ئەو ڕوژه، یانێ ڕوژ هاتنەوەێ خوداوەند عیساین.

²⁶ چوینکه ئەگەر وەشون ڕەسین وه ناسین ڕاسی، وه دڵ قەسی وه گونا کردن بەردەوام بویمن، دیتر هویچ قوروانیگ ئەڕا گونایل نیەمینێدەو؛

²⁷ ئەو چشته که مینێد، چەوەڕێ بێن زیەلەتەرەکنێگ له داوەریه و گڕەێ ئاگرێگه که دشمەنیل خودا سزنێد و کەێده خوڵەکەو.

²⁸ هەر کەسێگ شەریعەت موسای پەێخەمەر رەێ کردیاد، بەنا وه شاێەتی دو یا سێ شاێەت، بی بەزەیی کوشریاد.

²⁹ جا وه گومان ئیوه کەسێگ که کوڕ خودا پاوڵا کردێه و خوین پەێمانێگیش که وه ئەوه تەقدیس بویه، ناپاک ژماردیه و وه روح پڕ له فیز خودا، بی حرمەتی کردێه، چەنێ فرەتر شایسەێ موجازاتێگ سەختتر بود؟

³⁰ چوینکه ئەوه ناسیم که فەرمایش کرد: «خوینخوازی هن منه؛ منم که سزا دەم،» هەر ئیجوره: «خوداوەند قەومەگەێ خوەێ داوەری کەێد.»

³¹ کەفتن وه دەسيل خوداێ زنی چشت زیلەتەرەکنیگه.

³² وەلێ ئەو ڕوژیل جارانه بارنه هویردان، وەختێگ که تازه وەگەرد نویر خودایی نویرانیەو بوین؛ له ناو ئەو ڕوژیله، وه تاموڵ رەنجیل وەناو جەنگین سەختێگ بەردەوامی داینه خەرج.

³³ چەن جار وه نوای چەو گشت‎یەکی خراو دریاد پێدان و بەرد کیشاین و چەن جار شان وه شان کەسیلێگ وسیاین که وەگەرد ئەوانه ئیجوره کردیان.

³⁴ وەگەرد ئەوانه که وەناو زندان بوین، هاودەردی کردیاين و وەختێ ماڵ ئەموالدان تاڵان کردیان وه خوەشیەو قەبوڵ کردیاین، چوینکه زانستیاین که خوەدان دارایی خاسترێگ دێرین که مینێد.

³⁵ جا دڵنیایی خوەدان له دەس مەێه‌ن، چوینکه پاداش فره گەوراێگ ها شونیەو.

³⁶ چوینکه هەوەجی دێرین که بەردەوام بوین تا ویجوره ئمجا که خاست خودا وه جێ هاوردین، وادەگه پەێا بکێن.

³⁷ چوینکه «وەشون ماوەێ کەمێگ ئەیو که باێه باێد، تێد و ماتەڵی نیەکێ.

³⁸ وەلێ ئایەم سالحان مه وه ئیمان زنەیی کەید. و ئەگەر خوەێ بکیشێه دویا، گیانم له ئەوه خوەشنودەو نیود.»

³⁹ وەلێ ئیمه له ئەو کەسیله نیمن که خوێان کیشنه دویا و نابود بون، بەڵکەم له ئەوانیمنە که ئیمان دێرن و گیان خوێان پارێزنن.