نامه وە غەلاتییل 6 - کتاب مقدس به زبان کردی جنوبی - گویش کلهوری

خاسێ وه گشتیەکی

¹ ئێ برایل، ئەگەر کەسێگ تویش خەتاێگ هات، ئیوه که ئایەمیل روحانیگین باێه ئەوه وه یەێ روح ئارامێگەو وه ڕێ ڕاس هەڵوگەردنین. هوشدانه خوەدانەو بود نەخواێ ئیوەیش بخەلەتێین.

² باریل قورس یەکترەکی هەڵبگرن که ئیجوره شەریعەت مەسیح وه جێ تیەرێن.

³ چوینکه ئەگەر ئایەمێگ هەرچەن کەسێگ نیه و خوەێ وه ئایەم گەوراێگ بزانێ، دێرێ خوەێ گول دی.

⁴ وەلێ هەر کەسێگ باێه کردەوەێ خوەێ ئەزمون بکێ. ئەوسا مدوێگ که ئەڕا شانازی دێرێ تەنیا وه خوەێ بود، نه وه هاوساگەێ.

⁵ چوینکه هەر کەس باێه بار خوەێ هەڵبگرێ.

⁶ هەر کەس له کەڵام چشتێگ یاێ گری، باێه ماموستاگەێ له هەر چشت خاسێگ بەشدارەو بکێ.

⁷ فریو نەخوەین: نیود وه خودا تویلەکی بکێن. چوینکه ئایەم هەر چی بکاڵێ، هەر ئەوەیشه درەو کەی.

⁸ کەسێگ که ئەڕا جەسەێ خوەێ بکاڵێد، له جەسەوه گەنیان درەو کەی؛ وەلێ کەسێگ که ئەڕا روح خودا بکاڵێ، له روح خودا زنەیی ئەبەدی درەو کەی.

⁹ بان تا له خاسێ کردن شەکەت نویمن، چوینکه ئەگەر دەس له کار نەکیشیم، له وەرز خوەێ کشتکاڵەگه درەو کەیمن.

¹⁰ جا تا دەرفەت دێریم بان تا وه گشتیەکی خاسێ بکێم، وه تایبەتی وه کەسیلێ که وه مەسیح ئیمان دێرن.

نه خەتەنه، بەڵکەم وه دی هاتن تازه

¹¹ بوينن وه دەس خوەم وه چ حەرفیل گەوراێگ ئەڕادان نویسم!

¹² ئەوانه که توان شێوەێ خوێان خاس نیشان بێەن، ناچاردان کەن که خەتەنه بوین، تەنیا وه ئی نیەته که وەبونەێ سەلیب مەسیح عەزاو نوینن.

¹³ چوینکه تەنانەت ئەوانه که خەتەنه بون خوێان شەریعەت وه جا نيەتیەرن، بەڵکەم توان ئیوه خەتەنه بوین تا شانازی وه جەسەدان بکەن.

¹⁴ وەلێ دویر له گیانم که مه وه چشتێ شانازی بکەم بێجگه وه سەلیب خوداوەندمان عیسا مەسیح، که وه وەسلەێ ئەوه، جهان ئەڕا مه وه سەلیب کیشریا و مه ئەڕاێ جهان.

¹⁵ چوینکه نه خەتەنه بوین چشتێگه و نه خەتەنه نوین؛ ئەو چشته که گرنگه، وه دی هاتن تازەس.

¹⁶ وه گشت ئەوانه که کەفنه شون ئی یاسا و ئەڕا قەوم ئێسرائیل خودایش، ئاشتی و سڵامەتی و بەزەیی بود.

¹⁷ لەئیەودویا کەسێگ پەشێوم نەکێ، چوینکه مه وه جەسەم داخیل عیسا دێرم.

¹⁸ ئێ برایل، فیز خوداوەندمان عیسا مەسیح وەگەرد روح ئیوه بود! ئامین!