نامه وە غەلاتییل 5 - کتاب مقدس به زبان کردی جنوبی - گویش کلهوری

ڕزگاری وەناو مەسیح

¹ ئەڕا ڕزگاری بی که مەسیح ڕزگارمان کردێه. جا قورس بوسن و خوەدان یەێ جارتر مەوەنه ژێر هویەێ خوڵامی.

² بنوڕن: مه، پولوس، وەپێدان ئویشم که ئەگەر خەتەنه بوین، مەسیح ئەڕادان هویچ سودێگ نێری.

³ یەێ جارتر وه هەر کەسێگ که خەتەنه بود شاێەتی دەم که ها ملێ تا گشت شەریعەت بپارێزنێ.

⁴ ئیوه که تەقالا کین وەگەرد وه جێ هاوردن شەریعەت سالحان وه حساو باین، له مەسیح جیاوه بینه و له فیز دویرەو کەفتینه.

⁵ چوینکه وه وەسلەێ روح خودا و له ڕێ ئیمانه که ئیمه خوەمان وه ئەزرەتەو چەوەڕێ ئەو سالح بوینیمنه که وه ئمێدێەو دەیمنەێ سەر.

⁶ چوینکه وه ناو مەسیح عیسا نه خەتەنه بین و نه خەتەنه نوین هویچ نیەتیەرزێد، بەڵکەم تەنیا ئەو ئیمانه گرنگه که وه پێ مابەت کار کەی.

⁷ خاس دەویاین. کی نوای ڕێەگەدان گرد تا له ڕاسی گوش نەتەکنین؟

⁸ ئیه که ئیوه ئیجوره رازی بوینه، لەلاێ ئەیو نیه، که ئیوه دەنگ کەی.

⁹ «یەێ توز خەویرترش، بایس بود گشت خویرەگه هەڵ باێ.»

¹⁰ وەناو خوداوەند دڵنیام که باوەڕێگتر قەبوڵ نیەکین. وەلێ ئەوه که پەشێودان کەی، هەر کەسێگ بود، وه سزاێ کارەگەێ رەسێد.

¹¹ ئێ برایل، ئەگەر هێمراێ من خەتەنه بانگەوازی کەم، ئێ دیتر ئەڕا هێمراێ عەزاو دوینم؟ ئەگەر ئەوجورە بویاد دیتر بانگەوازی سەلیب بایس نویاتیاد کەسێگ بڕەنجێد.

¹² خوەزگەو کەسیلێ که وەگەرد تالیم خەتەنه پەشێودان کەن، کارەگه تەمام بکردیان و خوێان یەێ جارەکی له پیایی بخستيان!

¹³ ئێ برایل، ئیوه ئەڕا ڕزگاری دەنگ کریاینه، وەلێ ڕزگاری خوەدان مەکەنه دەرفەتێگ ئەڕا ئاوەختیێل جەسه، بەڵکەم وه پێ مابەت، یەکترەکی خزمەت بکێن.

¹⁴ چوینکه گشت شەریعەت وەناو یە حوکم کوڵ و کوڵبڕ بود: «هاوساگەد جور خوەد دوس بیاشتو.»

¹⁵ وەلێ ئەگەر قەپ بکێنه یەکترەکی و یەکان قویرت بێین، هوشدان بود که وه دەس یەکترەکی له بین نەچین.

زنەیی وەگەرد روح خودا

¹⁶ وەلێ مه ئویشم وه روح خودا زنەیی بکێن که ئاوەختیێل جەسه وه جێ نیەتێەرین.

¹⁷ چوینکه ئاوەختیێل جەسه وه زد روح خوداس و ئاوەختیێل روح خودا وه زد جەسەس؛ چوینکه ئی دوانه وه زد یەکترەکین، ئەو جوره که دی نیەتویەنین هەر چی که تواین، وه جێ بارین.

¹⁸ وەلێ ئەگەر روح خودا ڕێنمایدان بکێ، له ژێر شەریعەت نین.

¹⁹ کاریل جەسه ئاشکراس: خیزی، ناپاکی، هەرزەی؛

²⁰ بتپەرەسی و جادوکەری؛ دشمەنی، مرافه، حەسویی؛ توڕەیی، خودپەرەسی، جیایی خستن، دەسەبەنی،

²¹ بەخویی؛ سەرخوەشی، عەێاشی و ئیجور چشتیلی. هەرئەوجوره که وەرجەوە وەپێدان هەڕەشه کردم، وەدواره هەڕەشه کەمه پێدان کەسیلێگ که ئی کاریله کەن پادشاێ خودا وه میراتی نیەوەن.

²² وەلێ بەر روح خودا، مابەت، خوەشی، ئاشتی و سڵامەتی، سەور، مێرەبانی، خاسێ، وەفاداری،

²³ بێ فیسی و وەسەرخویەو زاڵ بوینه. هویچ شەریعەتێگ وه زد ئی چشتیله نیه.

²⁴ ئەوانه که هن مەسیح عیسان، جەسه وەگەرد هەواوهەوەسیل و ئاوەختیێل کیشانەسه سەلیب.

²⁵ ئەگەر وه روح خودا زنەیی کيمن، باین ڕێ رەوشتمانیش وه روح خودا بود.

²⁶ بان تا خودپەسەن نویمن و یەکترەکی توڕه نەکێمن و وه یەکترەکی حەسویی نەکێمن.