نامه وە غەلاتییل 4 - کتاب مقدس به زبان کردی جنوبی - گویش کلهوری

¹ مەبەستم ئیەسه: تا وەختێ که میراتیخوەر ورده وەگەرد خوڵام جیاوازی نێری، هەر چەن ساێو گشت چشتێگه.

² وەلێ تا ڕوژی که باوگێ دیاری کردێه ها ژێر دەس هێوەتکەریل و کاروەدەسیل.

³ ئیمەیش هەر و ئیجوره: تا وەختێ که ورد بیمن، خوڵام بیروڕایل سەرەتایی ئی جهانه بیمن.

⁴ وەلێ وەختێ ئەو زەمان دیاری کریاێ وه کەماڵ رەسێ، خودا کوڕەگەێ خوەێ کل کرد که له ژنێگ و له ژێر شەریعەت هاته دنیا،

⁵ تا ڕزگاری ئەوانەێ که له ژێر شەریعەت بین بسنێدەو، تا ئیمه جیگەێ زڕکوڕی وه دەس باریم.

⁶ جا ئەڕا ئیه که کوڕیلین، خودا روح کوڕەگەێ خوەێ کل کردێه ناو دڵمان که هاوار کێ: «ئەبا! باوگه!»

⁷ وه ئیجوره دی خوڵام نید، بەڵکەم کوڕی؛ ئەگەر کوڕی، جا خودا تو کردێەسه میراتیخوەر.

نگرانی پولوس ئەڕا غەلاتییل

⁸ وەرجه ئیه، وەختێ خودا نیەناسیاین، خوڵامی چشتیلی کردیاين که وه ڕاسی خودا نین.

⁹ وەلێ ئێرنگه که خودا ناسین، یا خاستر بویشم، خودا ئیوه ناسێد، ئێ چوی تویەنین یەێ جارتر هەڵوگەردینه وەرەو بیروڕایل سەرەتایی بی هاز ئی جهانه که هویچ نیەتیەرزی؟ ئێ یەێ جارتر تواین بوینه خوڵام ئیانه؟

¹⁰ ئیوه ڕوژیل و مانگیل و وەرزیل و ساڵیل پارێزنێن!

¹¹ زاورم چود نەکێ زامەتیلێگ که ئەڕادان کیشامه له کیس چوی.

¹² ئێ برایل، لاڵکمه پێدان که بینه جور مه، چوینکه منیش هەر بیمەسه جور ئیوه. وه حەقمەو هویچ خراوی نەکردین.

¹³ زانين که وه بونەێ نەخوەشی جەسەم بی که یەکم جار ئینجیل وەپێدان جار دام.

¹⁴ هەر چەن وەزوحالم ئەڕادان ئەزمونێگ بی، وەلێ تویلەکیه پێم نەکردین یا وه چەو سوک نەنوڕینه پێمەو. بەڵکەم مه هەر جور فریشتەێگ لەلاێ خوداوه یا جور خود مەسیح عیسا قەبوڵ کین.

¹⁵ جا چه هاتیەسه سەر ئەو ئەزرەتدانه؟ چوینکه تویەنم شاێەتی بێەم که ئەگەر بتوانستیاین، چەویلدانیش دەر هاوردیاین و دیاینی پێم.

¹⁶ ئێ ئێرنگه چوینکه ڕاسەگەی وەپێدان ئویشم، بیمەسه دشمەندان؟

¹⁷ ئەو ئایەمیله ئەڕا ئیوه غیرەت دێرن، وەلێ نه وه نیەت خاس. ئەوانه توان ئیوه له ئیمه جیاوه بکەن تا ئەڕاێان غیرەت بیاشتوین.

¹⁸ غیرەت داشتن خاسه، وه ئەو مەرجه که وه نیەت خاسێگ بود و هەمویشه بود نه تەنیا وەختێ که هامه گەرددانەو.

¹⁹ ڕوڵەیلم، ئەڕادان وەدواره ژان زایێن کیشم تا وەختێ مەسیح وەناودان وێنه بگرێ،

²⁰ خوەزگەو بتوانستیام ئێرنگه وەگەرددانەو بویاتیام تا شێوەێ وەتنم بگوڕانیام، چوینکه له ئیوه ئەڵاجویم تێد.

هاجەر و سارا

²¹ ئیوه که تواین له ژێر شەریعەتا بوین، وەپێم بویشن، ئێ گوش نیەتەکنین وه ئەو چشته که شەریعەت ئویشێ؟

²² چوینکه له ناو تەورات نویسریاس که ئێبراهیم دو کوڕ داشت، یەکیگ له کەنیز و ئەواکەیش له ژنێگ ڕزگار.

²³ کوڕ کەنیز وه شێوەێ ئنسانی هاته دنیا، وەلێ وه دنیا هاتن کوڕ ژن ڕزگار، وه پێ واده بی.

²⁴ تویەنیم جور یەێ مەسلەتیگ بنوڕیمنه ئیه: ئی دو ژنه، دو پەێمانن. یەکی له کویەێ سیناس، که مناڵیلی ئەڕا خوڵامی تیەرێده دنیا: ئەوه هاجەره.

²⁵ هاجەر کویەێ سیناس، له وڵات عەرەب، ئەوه وەگەرد شار ئورشەلیمی که ئیسه هەس بەرابەره، چوینکه وەگەرد مناڵیلی وه خوڵامی دەێدەێ سەر .

²⁶ وەلێ ئورشەلیم بان ڕزگاره، که داڵگ گشتمانه.

²⁷ ئەڕا ئیه که وەناو کتاو ئەشعەیاێ پەێخەمەر نویسریاس: «ئێ نەزوک که نەزایده، دڵشاد به! ئێ که ژان زاین نەکیشایده، دەنگ خوەشی هەڵ بار و وه دەنگ بەرز هاوار بکه! چوینکه مناڵیل ژنی که جێ هیشتیاس له مناڵیل ژن شویدار فرەترەو بود.»

²⁸ ئێرنگه ئێ برایل، ئیوه جور ئەسحاق مناڵیل وادەین.

²⁹ وه ئەو وەخته، کوڕێ که وه شێوەێ بەشەری هاته دنیا، کوڕێگ که وه مەیەت روح خودا هاته دنیا عەزاو دیاد. ئێرنگەیش هەر ئیجورەسه.

³⁰ وەلێ تەورات چه ئویشێ؟ «کەنیز و کوڕەگەێ بکه دەیشت، چوینکه کوڕ کەنیز وەگەرد کوڕ ژن ڕزگار میراتی نیەوێ.»

³¹ جا ئێ برایل، ئیمه ڕوڵەیل کەنیز نیمن، بەڵکەم له ژن ڕزگاریمن.