ئەفسوسیێل 5 - کتاب مقدس به زبان کردی جنوبی - گویش کلهوری

¹ جا جور ڕوڵەیل عەزیز، له خودا نمونه بگرن.

² وەناو مابەت زنەیی بکێن، ئەوجورە که مەسیح ئیمه مابەت کرد و گیان خوەێ ئەڕا ئیمه جور خەڵاتی بو خوەش و قوروانییگ وه خودا پیشکەش کرد.

³ وەلێ نەخواێ تەنانەت قسیەیگ له خیزی یا هەر جور ناپاکی یا تەماێگ له ناودان باێده دەیشت، چوینکه ئیانه ئەڕا ئیمانداریل وه مەسیح مناسو نیه.

⁴ با وتار خراو و قسیەێ گیلگەوجانه و شوخیەل گەن وەناودان نود که ئیانه خاس نین؛ وه جێ ئەوانه سپاس خودا بکێن.

⁵ چوینکه دڵنیا بون که هویچ خێزیگ یا ناپاکێگ یا تەماکارێگ، که تەماکاری بت پەرەسیه، وەناو پادشاێ مەسیح و خودا میراتێگ نێری.

⁶ نێلن کەسێگ وەگەرد قسیەيل پویچ گولدان بێی، چوینکه وەبونەێ ئی چشتیلەسه که خەزەو خودا تێده سەر مناڵیل ملچەفتەوکەر.

⁷ جا وەگەرد ئەوانه هاوبەش نەون.

⁸ چوینکه یەێ وەختێ ئیوه تیەریکی بین، وەلێ ئیسه وەناو خوداوەند نویرین. جور ڕوڵەیل نویر زنەیی بکێن.

⁹ چوینکه بەر نویر، وەناو هەر جور خاسێ، ڕاسی و درسی پەێا بود.

¹⁰ تەقالا بکەن تا ئەو چشته که خوداوەند خوەشنودەو کەی، بزانین.

¹¹ وەناو کردەوەیل بی بەر تیەریکی بەشدار نوین، بەڵکەم ئاشکراێان بکەن.

¹² چوینکه ئەو کاریلێ که ئیجور کەسیلێگ وه دزیەو کەن، تەنانەت وه زوان هاوردنیشی شەرمزاریه.

¹³ وەلێ وەختێ چشتێگ وه وەسلەێ نویر دیار بێید، دوینرێید.

¹⁴ چوینکه هەر چشتێگ که بوینرید، نویره. له ئی باوەته وەتریاس: «ئێ ئەو کەسه که خەفتیدە، له خەو هەڵس، له مردگیل زنیەو به، که مەسیح نویر خوەێ وه سەرد درەوشنێد.»

¹⁵ جا، فره هوشدان بود که چوی زنەیی کین، نه جور نەزانیل بەڵکەم جور زانایل.

¹⁶ خاس ئی وەخته وه کار بوەن، چوینکه ڕوژیل خراویگه.

¹⁷ جا گیلگەوج نەون، بەڵکەم بزانن که خاست خوداوەند چەس.

¹⁸ مەس شراو نەون، چوینکه ئیوه وه کاریل ناپەسەن کیشێ؛ بەڵکەم له روح خودا پڕ بون.

¹⁹ وەگەرد وه کار بردن زەبور و سرودیل و بەیتیلیگ که روحانیه وەگەرد یەکترەکی قسیه بکەن، له ناخ دڵەو ئەڕا خوداوەند بخوەنن و گورانی درس بکەن.

²⁰ هەمویشه و ئەڕا گشت چشتێگ وه ناو خوداوەندمان عیسا مەسیح، سپاس خوداێ باوگ بکەن.

²¹ له ڕوی حرمەتی که وه مەسیح دێرین، گوش له یەکترەکی بتەکنن.

²² ئێ ژنيل، له شوییلدان گوش بتەکنن، هەر ئەوجورە که له خوداوەند گوش تەکنین.

²³ چوینکه شوی سەر ژنه، ئەوجورە که مەسیح سەر کلیساس و کلیسا جەسەیه، خویشێ نجات دەر کلیساس.

²⁴ ئێرنگه هەر ئەوجورە که کلیسا له مەسیح گوش تەکنێد، ژنيلیش باێه وه هەر چشتێگ له شوییلێان گوش بتەکنن.

²⁵ ئێ شوییل، ژنيلدان دوس بیاشتون، ئەوجورە که مەسیحیش کلیسا دوس داشت و گیان خوەێ ئەڕاێ قوروانی کرد،

²⁶ تا ئەوه وەگەرد ئاو کەڵام خودا بشورێد و پاک بکێ و تەقدیس بکێ،

²⁷ تا کلیسا وەگەرد ئەو شکویگ که دێرێ بارێده لاێ خوەێ، بی هویچ لەک یا لویچ یا هەر نەخسێگ تر، تا کلیسا موقەدەس و بی نەخس بود.

²⁸ هەر ئیجوره، شوییل باێه ژنیلیان جور جەسەێ خوێان دوس بیاشتون. ئەوه که ژن خوەێ دوس بیاشتود، دوس خوەێ دێرێ.

²⁹ چوینکه هەراێهەر کەسێگ له جەسەێ خوەێ قینێ نیەتێ، بەڵکەم خواردەمەنی دەێده پێ و پارێزنێدێ، هەر ئەوجورە که مەسیح ئەڕا کلیسا کەی؛

³⁰ چوینکه ئیمه ئەنامیل جەسەێ ئەویمنه.

³¹ «وه ئی بونه، پیا داڵگ و باوگ خوەێ هیلێده جێ و لچکێیه ژنەگەێ و ئەو دو نەفەره بونه یەێ جەسه.»

³² ئیه راز فره گەوراێگه، جا مه ئویشم که ئیه له باوەت مەسیح و کلیساس.

³³ کوڵ و کوڵبڕ، هەر کامدان باێه ژنەگەێ جور خوەێ دوس بیاشتود و ژنیش باێه هوشی بود که حرمەت شویەگەێ بگرێ.