ئەفسوسیێل 4 - کتاب مقدس به زبان کردی جنوبی - گویش کلهوری

یەکەو بوین وەناو جەسەێ مەسیح

¹ جا من که وەخاتر خوداوەند هامه زندان، لاڵکمه پێدان وه لەونێگ زنەیی بکێن که شایسەی داوەتێگ بود که ئیوه ئەڕاێ دەنگ کریاینه،

² وه تەمامی بێ فیسی و نەرمی؛ وەگەرد سەور وەناو مابەت یەکترەکی تاموڵ بکێن.

³ فڕه تەقالا بکەن تا ئەو یەکی بین روح خودا، وه مەیەت بەن ئاشتی و سڵامەتی بپارێزنن.

⁴ چوینکه یەێ جەسه و یەێ روح هەس، ئەوجورەکە ئەڕا یەێ ئمید که هن داوەتەگەدانە دەنگ کریاینه؛

⁵ یەێ خوداوەند، یەێ ئیمان، یەێ خوسڵ تەعمید؛

⁶ یەێ خودا و باوگ ئاسمانی گشتیەکیگ که بانتر له گشته و له ڕێ گشت و ها ناو گشتیەکی.

⁷ وەلێ وه هەر کاممان وه پێ پەێمانەی خەڵاتی مەسیح، فیز بەخشریا.

⁸ وه ئی خاتره کتاو زەبور ئویشێ: «وەختێ که ئەیو بەرزەو بیه ئاسمان، لەشکەرێگ له گیرودەیل وەشون خوەێ برد و خەڵاتییل داده مەردم.»

⁹ مەبەست له ’بەرزەو بوی‘ چەس، بێجگه ئەوه که داوەزویه شونیل خوارتر زەوییش؟

¹⁰ ئەیو که داوەزی هەر ئەوەسه که له گشت ئاسمانیلیش فره بانتر چی، تا گشت چشتێگ پڕەو بکێ.

¹¹ جا ئەیو بی که بەخشی ڕەسولەیل، نەبوەتکەریل، مزگانیدەریل، شوانیل و ماموستایل،

¹² تا ئیمانداریل وه مەسیح ئەڕا کار خزمەت گورجەو بکەن، ئەڕا وه سەرپا ناین جەسەێ مەسیح،

¹³ تا وەختێ که گشتمان وه یەکەو بوین ئیمان دەس پەێا بکێمن و هەر ئیجوره وه یەکەو بوین ناسین کوڕ خودا، تا چەنه ئایەمێگ کامڵ گەورا بویمن، تا چەنه پڕی باڵای مەسیح گەورا بویمن.

¹⁴ ئەو وەخته دی جور مناڵیل نیمن که تافیل وه ئی لا و ئەو لا فڕەمان دەن و هەر وای تالیمیل جورواجور و فەن و فيڵ ئایەمیل، وەناو نەخشەیلی که ئەڕا له ڕێ دەرچین کیشن، ئیمه وه ئی لاو ئەو لا فڕه بێید.

¹⁵ له جێ ئەوه وه وەتن ڕاسی وەناو مابەت، باێه له هەر لاێگەو وەناو ئەیو که سەره، یانێ مەسیح، گەوراوه بویمن.

¹⁶ له ئەیوه که گشت جەسه، وه وەسلەێ هەر مەفسەلیگ که ئەڕا ئەوانه گورجەو بیه، بەسیەنه قێ یەک و یەکترەکی گرن. جا وەختێ هەر ئەنامێگ درس کار بکێ، بایس بود جەسه گەورا بود تا خوەێ وەناو مابەت بنێدەێ سەر پاوه.

زنەیی جور مناڵیل نویر

¹⁷ ئێرنگه ئیه ئویشم و وەناو خوداوەند شاێەتی دەم که دی نەبایه جور ناجویلەکەیل زنەیی بکێن که ڕێ رەوشتیان وه پێ پویچێ فکریلێانه.

¹⁸ فامێان تیەریکەو بیه و وەبونەێ نەزانی که ها ناوێان که دڵڕەقی بیەسه بایسێ، له زنەیی خودا دویرەو کەفتنه.

¹⁹ ئەوانه دڵڕەقەو بینه و خوێان دانەسه دەس هەرزەیی، جوری که وه تەما دەس دەنه هەر ناپاکێگ.

²⁰ وەلێ ئیوه مەسیح وه ئیجوره یاێ نەگردین،

²¹ هەڵبەت ئەگەر گومان بکێم که ئیوه له باوەت ئەیو شنەفتینه و وه پێ ئەو ڕاسیه که ها ناو عیسا، وەناو ئەیو تالیم گردین.

²² ئیوه یاێ گردین که باێه ئەو ئایەم کویەنەدانه له وەردان دەر بارین که هن شێوەێ زنەیی جاراندانه و له ڕێ مەیلیل فریوکارانه گەنیاس.

²³ باێه وەناو روح فکریلدان تازەوه بوین و

²⁴ ئایەم تازه بکەنه وەردان که وه سالح بوین ڕاسەکانی و قودوسیەت، وێنەێ خودا درس کریاس.

²⁵ جا، درو بیلنه لا، هەر کامدان وەگەرد هاوساگەێ خوەێ وه ڕاسی قسیه بکێن، ئەڕا ئیه که ئیمه ئەنامیل یەکترەکێم.

²⁶ «وەختێ توڕەین، هوشدان بود گونا نەکێن»؛ نێلن ڕوژدان تەمام بود و ئیوه هێمراێ توڕه بوین،

²⁷ دەرفەت نینه ئبلیس.

²⁸ دز دیتر دزی نەکێ، بەڵکەم وه جێ ئەوه کار بکێ، وه دەس خوەێ وه ڕاسی کار بکێ، تا بتویەنێ وه کەمدەسیلیش چشتێ بێی.

²⁹ هویچ قسیەێ خراوێگ له دەمدان دەرنەچود، بەڵکەم جورێگ قسیه بکەن که وه جێ بود و ئەڕا وه سەر پا ناین مەردم وه کار باێ و تا وه ئەوانه که شنەفن فیز برەسنێد.

³⁰ روح‌القودوس خودا که له ڕێ ئەیو ئەڕا ڕوژ ڕزگاری مور کریاینه، خەمبارەو مەکەن.

³¹ هەر جور تیەڵی، توڕەیی، کەفلەهەرزی، هاوار کردن، بخت کردن و هەر جور دڵپێسی له خوەدان دویرەو بکەن.

³² وەگەرد یەکترەکی مێرەبان و دڵسوز بون و هەر ئەوجورە که خودا ئیوه وەناو مەسیح بەخشی، ئیوەیش یەکترەکی بوەخشن.