ئەفسوسیێل 3 - کتاب مقدس به زبان کردی جنوبی - گویش کلهوری

پولوس، ڕەسول ناجویلەکەیل

¹ له ئی باوەته، مه پولوس، که وەبونەێ ئیوه ناجویلەکەیل زندانی مەسیح عیسام

² گومان کەم ئیوه له باوەت کاروەدەسێ فیز خودا که ئەڕادان بەخشریاسە مه، شنەفتینه،

³ که چوی ئەو رازه له ڕێ وەحی ئەڕام ئاشکرا بی، هەر ئەوجورە که کوڵ و کوڵبڕ ئەڕادان نویسامه.

⁴ وەگەرد خوەنین ئەوه تویەنين وه چەن و چوین دەرک من له راز مەسیح پێ بوین،

⁵ رازێگ که وەناو نەتەوەیل جاران وه بەنی ئایەم ئاشکرا نەکریاوی، هەر ئەوجورە که ئیسه له ڕێ روح خودا وه ڕەسولەیل موقەدەسێ و نەبوەتکەریل، ئاشکرا بیه.

⁶ ئەو رازه ئیەسه که ناجویلەکەیل وەناو مەسیح عیسا و له ڕێ ئینجیل وەگەرد جویلەکەیل هاومیراتین، ئەنامیل یەێ جەسەن و وەناو وادەێ خودا هاوبەشن.

⁷ مه وه پێ خەڵاتی فیز خودا بیمەسه خزمەتکار ئی ئینجیله که وه وەسلەێ هێز ئەیو که ها ناو کار، بەخشریاسە پێم.

⁸ هەر چەن من له گشت ئیمانداریل وه مەسیح بویچگترم، وەلێ ئی فیزه وه مه بەخشریا تا مزگانی دەوڵەمەنی مەسیح که نیود بەراوردی بکێ وه ناجویلەکەیل برەسنم،

⁹ جا وه گشتیەکی نیشان بێەم که چوی نەخشەێ خودا تێدە دی. خودا که خوەێ گشت چشتێ وه دی هاورد، ئی راز خوێه له دریژای دەوران جاران شاردیەسەو.

¹⁰ تا ئێرنگه له ڕێ کلیسا زانیاری جورواجور خودا وه مل فەرمانرەوایل و دەسڵاتداریل شونیل ئاسمان ئاشکرا بود،

¹¹ ئیه وه پێ ئەو ئامانج ئەزەڵیە بی که خودا ئەوه وەناو خوداوەند ئیمه مەسیح عیسا هاوردێەسه دی،

¹² ئیمه وەناو مەسیح له ڕێ ئیمانێگ که وەپێ دێریم، تویەنيمن وه ئازای و دڵنیایی وه خودا نزیکەو بویمن.

¹³ جا داوا لەلێدان کەم وه سەوەو رەنجیلێ که وەبونەێ ئیوه کیشم، دڵسەردەو نوین، ئەڕا ئیه که ئەوانه مایەێ شانازیدانن.

دوعا ئەڕا ئیمانداریل شار ئەفسوس

¹⁴ وه ئی بونه، لەنواێ ئەو باوگ ئاسمانیه زرانی نەمه زەوی که

¹⁵ هەر بنەماڵەێگ وەناو ئاسمان و له بان زەوی، ناو خوەێ له ئەیو گری،

¹⁶ دوعا کەم تا وه پێ دەوڵەمەنی جەڵاڵ خوەێ بوەخشێده پێدان تا له ناخدانەو له ڕێ روح ئەیو وه هێز بوین و قەوەت بگرین،

¹⁷ تا مەسیح له ڕێ ئیمان وەناو دڵدان نیشتەجێ بود که ئیوه وەناو مابەت ریشه بدەونێن و بەردەوام بوین،

¹⁸ تا تویەنایی ئەوه بیاشتوین که وەگەرد گشت ئیمانداریل وه مەسیح وه پانا و دریژا و بەرزا و قویلای مابەت مەسیح پێ بوین و

¹⁹ مابەت مەسیح بناسین که فره بانتر له ماریفەت بەشەریه، تا له گشت پڕی خودا نیقەڵتوز بوین.

²⁰ ئێرنگه جەڵاڵ ئەڕا خوداێگ بود که تویەنێ وه پێ ئەو هێزه که وەناو ئیمه کار کەی، فره فرەتر له هەر چی بتوایم یا باریمنه وەر چەومان، کار بکێ.

²¹ جا وه ئەیو وەناو کلیسا و وەناو مەسیح عیسا، له گشت نەتەوەیل، تا ئەبەد و تا ئەبەد جەڵاڵ بود! ئامین.