نامه وه کولوسییل 4 - کتاب مقدس به زبان کردی جنوبی - گویش کلهوری

¹ ئێ ئەرواویل، ڕێ رەوشتدان وەگەرد خوڵامیلدان وه دادپەروەری و ئنساف بود، چوینکه زانين ئیوەیش ئەرواوێگ وەناو ئاسمان دێرین.

² وەناو دوعا کردن پا بینه گەز و بچنه نوا و وەناو دوعا وه شوکرکردن، هوشیار بون.

³ هەر وه ئی وەخته ئەڕا ئیمەیش دوعا بکێن، تا خودا دەرێگ ئەڕا کەڵام وه ڕوی ئیمه واز بکێد تا بتویەنیمن راز مەسیح جار بێیم، رازێگ که وەبونەێ ئەوه هامه ناو زندان.

⁴ دوعا بکێن که بتویەنم هەر ئەو جوره که باێه، ئەوه وه ڕوشنی بویشم.

⁵ وەگەرد مەردم دەیشت کلیسا ڕێ رەوشتدان وه زانیاری بود و خاسترین سود له وەخت بوەن.

⁶ قسیەيل ئیوه هەمویشه پڕ له فیز بود و نمەکین، تا بزانین وه هەر کەسێگ چوی باێه جواو بێین.

دورودیل ئاخر نامه

⁷ تیخیکوس وه تەمامی ئیوه له حاڵ حەواڵ مه ئاگادار کەید. ئەوه براێ عەزیز و خزمەتکارێگ وەفادار و هاوکار مه وەناو خوداوەنده.

⁸ ئەوه هەر وه ئی ئامانجه کل کردمەسه ئەڕا لادان تا له حاڵ حەواڵ ئیمه ئاگادار بوین و تا دڵدان هان بێی.

⁹ ئەوه وەگەرد ئونسیموس، براێ وەفادار و عەزیزمان که یەکی له خوەدانەو، تێدە ئەڕا لادان. ئەوانه له هەر چی که له ئێرا هەڵکەفتیه ئاگاداردان کەن.

¹⁰ ئاریستارخوس که وەگەردمەو ها زندان، هەر ئیجوره مەرقوس، ئاموزاگەێ بەرنابا، سڵامدان رەسنن. وەرجه ئیه له باوەت مەرقوس وەپێدان سفارش کردمه که ئەگەر باێده ئەڕا لادان، وه گەرمی قەبوڵێ بکێن.

¹¹ عیسایش که یوستوس خوەنرێی، سڵامدان رەسنێد. وەناو هاوکارەگانم له کار پادشاێ خودا، تەنیا ئی چەن نەفەرنه که خەتەنه کریانه یانێ جویلەکەن و ئیانه بینەسه مایەێ دڵنەواییم.

¹² ئەپافراس که یەکی له خوەدانەو و خزمەتکار مەسیح عیساس، سڵامدان رەسنێد. ئەوه هەمویشه وەناو دوعایلی ئەڕادان تەقالا کەی تا ئیوه جور ئایەمیلێ که بازڵەن و وه تەمامی خاترجەمن، بەردەوام بمینێن و خاست خودا وه تەمامی وەجێ بارین.

¹³ چوینکه مه شاێەتم که ئەوه ئەڕا ئیوه و ئەوانه که هانه شاریل لائودیکیه و هیراپولیس، چەنێ فره زامەت کیشاس.

¹⁴ لوقا دگتر عەزیز و هەر ئیجوره دیماس سڵامدان رەسنن.

¹⁵ وه برایلێ که هانه لائودیکیه و هەر ئیجوره وه نیمفا و کلیساێگ که ها ماڵ ئی خویشگه، سڵام من برەسنن.

¹⁶ جا وەشون ئەوه که ئی نامه وەناودان خوەنریاد، کارێ بکەن تا وەناو کلیساێ لائودیکیەیش بخوەنرێید؛ هوشدان بود ئیوەیش نامەێگ که وه کلیساێ لائودیکیه نویسامه، بخوەنن.

¹⁷ وه ئارخیپوس بویشن: «هوشد بود تا خزمەتی که وەناو خوداوەند پەێا کردیده وه کەماڵ برەسنێ.»

¹⁸ مه، پولوس، ئی سڵامه وه دەس خوەم نویسم. زنجیریل مه وەناو ئی زندانه بارینه هویردان. فیز خودا وەگەرددانەو بود.