نامه وه کولوسییل 3 - کتاب مقدس به زبان کردی جنوبی - گویش کلهوری

بنەماێ حاکم وه مل زنەیی پاک

¹ جا ئەگەر وەگەرد مەسیح زنیەو بینه، وەشون ئەو چشتیله بون که هانه بان، ئەوره که مەسیح هەس و وه دەس ڕاس خودا نيشتیه.

² وه ئەو چشتیله که هانه بان فکر بکێن، نه وه ئەو چشتیله که هانه بان زەوی.

³ چوینکه ئیوه مردینه و زنەییدان وەگەرد مەسیح وەناو خودا شاریاسەو.

⁴ وەختێ مەسیح که زنەیی ئیوەس، ئاشکرا بود، ئەو وەخته ئیوەیش وەگەرد ئەیو وەناو جەڵاڵ ئاشکرا بین.

⁵ جا، هەر چی وەناودان هن زەویه، بکوشنێ، یانێ خیزی، ناپاکی، هەواوهەوەس، خاستەیل گەن و تەما که هەر ئەو بتپەرسیەسه.

⁶ وه سەوەو هەر ئیانەسه که خەزەو خودا وه سەر مناڵیل ملچەفتەوکەر ڕشێید.

⁷ ئیوەیش یەێ وەختێگ وەناو ئیانه گام هەڵگردیاین، وەختێ که وەناوێان زنەیی کردیاین.

⁸ وەلێ ئێرنگه باێه گشت ئیانه له خوەدان دویرەو بکێن، یانێ توڕەیی، خەزەو، دڵپێسی، بخت کردن و قسیەيل گەن له دەم خوەدان.

⁹ وه یەکترەکی درو نویشن، چوینکه ئەو ئایەم کویەنه و وەگەرد کارەگانێ له وەر دەر هاوردینه

¹⁰ و ئایەم تازه کردینەسه وەردان، که وەناو ماریفەت ڕاسەکانی دێرێ تازەوه بود تا وێنەێ درسکەرگەێ خوەێ دەر باێد.

¹¹ وەناو ئی ئایەم تازه نه یونانی نه جویلەکە نه خەتەنه کریاێ نه خەتەنه نەکریای نه بەربەر نه سەکایی نه خوڵام نه ڕزگار دیتر مانا نێرید، بەڵکەم مەسیح گشت چشتێگەو ها ناو گشتیەکیگ.

¹² جا هەر جور هەڵوژاریەگان خودا که موقەدەس و عەزیزگرامین، دڵنگ دڵرەخمی، مێرەبانی، بێ فیسی، نەرمی و سەور بکەنه وەردان.

¹³ یەکترەکی تاموڵ بکێن و ئەگەر تیەڵێگ له یەکترەکی ها ناو دڵدان، یەکترەکی بوەخشین. هەر ئەوجورە که خوداوەند بەخشیاسەدان، ئیوەیش باێه بوەخشین.

¹⁴ وه بان گشت ئیانه مابەتیش بکەنه وەردان که گشت چشتێگ وه یەکەو بوین کامڵ دەێده قێ یەکەو.

¹⁵ با ئاشتی و سڵامەتی مەسیح وەناو دڵدان حوکمفەرما بود، که وه ڕاسی وەناو یەێ جەسه ئەڕا ئی ئاشتی و سڵامەتیه دەنگ کریاینه. شوکر خودا بکێن.

¹⁶ با کەڵام مەسیح وه دەوڵەمەنی وه ناودان نیشتەجێ بود؛ وەگەرد کەماڵ زانیاری یەکترەکی تالیم و ئاموژیاری بێین؛ وەگەرد شوکرکردنێگ که له ناخ دڵەو ئەڕا خودا دێرین، مەزموریل و سرودیل و بەیتیل روحانی، بچڕێن.

¹⁷ جا هەر چی کین، چ وه وتار و چ وه کردەوه، گشت چشتێ وه ناو خوداوەند عیسا وەجێ بارن و له ڕێ ئەیو خوداێ باوگ شوکر بکێن.

بین ئیمانداریل

¹⁸ ئێ ژنيل، له شوییل خوەدان گوش بتەکنن، ئەوجورە که وەناو خوداوەند شایسەس.

¹⁹ ئێ شوییل، ژنيل خوەدان مابەت بکێن و وەگەردێانەو تونەو نوین.

²⁰ ئێ مناڵیل، وەناو هەر چشتێ گوش له داڵگ و باوگ خوەدان بتەکنین، چوینکه ئیه خوداوەند خوەشنودەو کەید.

²¹ ئێ باوگیل، مناڵیل خوەدان توڕەوه نەکێن، نەخواێ دڵسەرد بون.

²² ئێ خوڵامیل، ئەرواویل زەویدان وەناو هەر چشتێ گوش بتەکنین، نه تەنیا ئەو وەخته که هاینه وەر چەویانەو، جور کەسیلێ که هانه شون خوەشنود کردن مەردمەو، بەڵکەم وه دڵپاکی و ترس خوداوەند گوشە لێان بتەکنین.

²³ هەر کارێگ کین له گیان و دڵ بکێن جوری که چماێ ئەڕا خوداوەند کین، نه ئەڕا ئایەم،

²⁴ چوینکه زانين که له خوداوەند ئەڕا دەسخوەشانەدان، میراتی گرین. ئیوه خوداوەند مەسیح خزمەت کین.

²⁵ چوینکه هەر کەس خراوی بکێد، سزاێ کار خراوی که کردێه، دوینید و دوچەوەکی وەناو کار نیه.