نامه وه کولوسییل 2 - کتاب مقدس به زبان کردی جنوبی - گویش کلهوری

¹ جا توام بزانین که وه بونەێ ئیوه و کەسیلێ که هانه ناو شار لائودیکیه و ئەڕا گشت ئەوانه که ڕوی مه نێنه، چەنێ سەخت تەقالا کەم،

² تا ئەوانه دڵگەرم بون و وەناو مابەت وه یەکەو بون و له گشت دەوڵەمەنی ئەو دڵنیایی کامڵه نسیو بوەن، هەر ئەو دڵنیاییه که له فام سەرچاوه گری و له ئی ڕێه وه راز خودا یانێ مەسیح پێ بوەن،

³ هەر ئەو مەسیحه که گشت خەزانەیل زانیاری و ماریفەت وەناو ئەیو شاریاسەو.

⁴ ئیه ئویشم تا هویچکەسێگ ئیوه وەگەرد باسیلێگ که بود باوەڕێ بکێ، گولدان نێید.

⁵ چوینکه هەرچەن وەناو جەسه لەلادان نیم، وەلێ وەناو روح هامه گەرددانەو له دین ڕێک‎وپێکی و ئیمان بەردەوامدان وه مەسیح، خوەشاڵم.

ڕزگاری له یاسایل ئنسانی

⁶ جا هەر ئەوجورە که خوداوەند مەسیح عیسا قەبوڵ کردین، با وەناو ئەیو گام هەڵبگریم:

⁷ وەناو ئەیو ریشه بکوتن و بنریەنە سەرپاوه و هەر ئەوجورە که تالیم گردین، وەناو ئیمان بەردەوام بون و نیقەڵتوز شوکر کردن بون.

⁸ ئاگادار بوین کەسێگ ئیوه وەگەرد فەلسەفه و فریو پویچ گیرودەدان نەکەید، که وه پێ نەریت ئایەمیل و بیروڕایل سەرەتایی ئی جهانەسه، نه وه پێ مەسیح.

⁹ چوینکه گشت پڕی خودا بوین، وه شێوەێ جەسەێ وەناو مەسیح نیشتەجێه،

¹⁰ جا ئیوه وەناو مەسیح، که سەر گشت سەروکیل و دەسڵاتیله، کامڵەو بوینه.

¹¹ وەناو مەسیح خەتەنەیش کریاین، خەتەنەێگ که وه دەس نەکریاس. ئی خەتەنه وەگەرد له وەر دەر هاوردن شەخسیەت جەسەیه، وەگەرد خەتەنەێگه که مەسیح کردێه.

¹² وەناو خوسڵ تەعمید، وەگەرد مەسیح نریاینەسه قەور و وەگەردیەو زنییشەو بینه، له ڕێ ئیمان وه کار هێزدار خوداێگ که مەسیح له مردگیل زنیەو کرد.

¹³ ئیوه که وەناو خەتایلدان و خەتەنه نوین جەسەدان مردوین، خودا ئیوه وەگەرد مەسیح زنیەو کرد. ئەیو گشت خەتایلمان بەخشا.

¹⁴ جا ئەو سەنەد قەردیگ که وەگەرد یاسایلێ وه زد ئیمه نویسریاوی و وه نوای ئیمه وساویه پاوه، پاکەو کرد و له بان سەلیب بزمار کوتی کرد و له بین بردێ.

¹⁵ مەسیح وه بان سەلیب چەکیل سەروکیل و دەسڵاتداریل له لێان سەند و وه سەریانەو زاڵ بی و وه نوای چەو گشت یەکیگ حەیا و حرمەتیان برد.

¹⁶ جا مێیلن کەسێگ له باوەت ئەو چشته که خوەین و نوشین، یا له باوەت وەجێ هاوردن جەشنیل و مانگ تازه و ڕوژ شەبات که هەر ئەو شەمەێ موقەدەس جویلەکەیله، ماکومدان بکێد.

¹⁷ ئیانه تەنیا ساێەڕکی چشتیلێگن که باێه باێ، وەلێ ڕەسەنەگەێان هن مەسیحه.

¹⁸ مێیلن کەسێگ که پامل سوکەو کردن جەسه و پەرەسین فریشتەیله، ڕەددان بکەید. ئیجور کەسێگ سەر خوەێ گەرم چشتیلی کەید که وەناو رویایلی دیه و فکر دنیایی ئەوه وه هویچ پەتی، قوزی کردێه.

¹⁹ ئەوه پێوەنەگەێ وەگەرد سەر له دەس داس؛ سەری که گشت جەسه له ئەوه خواردەمەنی گری و درێیده قێ یەکەو، له ڕێ مەفسەلیل و بەنەیلی. وه ئیجوره جەسه وەگەرد گەورا بوینی که له خودا سەرچاوه گری، گەورا بود.

²⁰ ئەگەر وەگەرد مەسیح له باوەت بیروڕایل سەرەتایی ئی جهانه مردینه، ئەڕا هەر جور کەسیلێ که چماێ هێمراێ هن ئی دنیان، گوش له دەستوریلێگ تەکنین، دەستوریلێگ که ئویشێ:

²¹ «دەسه قێ مەێه! دەمه قێ مەێه، دەسه بانی مەنه!»؟

²² ئیانه گشتێ له باوەت ئەو چشتیلیەسه که وه وەسلەێ وه کار بردن، له بین چن و له بان حوکمیل و تالیمیل بەشەری نریانەسه پاوه.

²³ وه ڕاسی وەختێ باس ئی شەریعەت دەسەڵوەسه و سوکەو کردن جەسه و سەختی داین وه جەسه کریەد؛ شێوەێ زانیاری وه خوەێ گرید، وەلێ ئی دەستوریله له ئیه که بتوان نوای هەوا و هەوەسیل جەسه بگرن، کارێگ له دەسێان نیەتێی.