نامه وه کولوسییل 1 - کتاب مقدس به زبان کردی جنوبی - گویش کلهوری

¹ له پولوس که وه خاست خودا، ڕەسول مەسیح عیساس و له براگەمان، تیموتاوس،

² وه موقەدەسیل و برایل وەفادار وەناو مەسیح که هانه ناو شار کولوسی: فیز و ئاشتی و سڵامەتی له لاێ خودا، باوگ ئیمه، وه ملدانەو بود.

شوکر کردن و دوعا

³ ئیمه هەمویشه له وەخت دوعا ئەڕا ئیوه، خودا، باوگ خوداوەندمان عیسا مەسیح شوکر کیم،

⁴ چوینکه تاریف ئیماندان وه مەسیح عیسا و مابەتێگ که وه گشت ئیمانداریل وه مەسیح دێرین، شنەفتیم.

⁵ ئیانه له ئمیدێگ سەرچاوه گری که وەناو ئاسمان ئەڕا ئیوه نریاس. وەرجه ئیه له باوەت ئی ئمیده وەناو کەڵام ڕاسی یانێ ئینجیل شنەفتینه،

⁶ هەر ئەو ئینجیله که ڕەسیەسه پێدان هەر ئەوجورە که وه ڕاسی له سەرئانسەر دنیا بەر دێ و گەوراوه بود، هەر ئەوجورە که وەناو ئیوەیش، له ڕوژیگ که شنەفتینێ و فیز خودا وه ڕاسی فامین، کار کەی.

⁷ هەر ئەوجورە که ئەوه له هاوخزمەت عەزیزمان، ئەپافراس یاێ گردین. ئەوه له لاێ ئیوه خزمەتکار وەفادار مەسیحه و

⁸ ئیمه له مابەتدان که ها ناو روح خودا ئاگادار کردێه.

⁹ وه ئی بونه، له ڕوژیگ که ئیه شنەفتیم، له دوعا کردن ئەڕادان نەوسایمەسەو، بەڵکەم له خودا توایم که ئیوه له ناسین خاست ئەیو وەناو هەر زانیاری و فام روحانی، پڕەو بوین

¹⁰ تا ڕێ رەوشتدان شایسەێ خوداوەند بود و ئەیو وه تەمامی خوەشنودەو بکێن: یانێ له هەر کار خاسێگ بەر بارین و وەناو ناسین خودا، گەوراوه بوین.

¹¹ وه گشت هێزێ که له تویەنایی پڕ جەڵاڵ ئەیو سەرچاوه گری وه هێزەو بوین تا وه خوەشی، بەردەوامی و سەور تەمام بیاشتوین و

¹² باوگ ئاسمانی شوکر بکێن که ئیوه شایسەێ بەشدار بوین وەناو میراتیێگ کردێه، که ئیمانداریل وه مەسیح وەناو نویر دێرن.

¹³ ئەیو له حوکمرانی تیەریکی ڕزگارمان کردێه و بردیەسەمانه ‎ناو پادشایی کوره عەزیزەگەێ خوەێ،

¹⁴ که وەناو ئەیو، ڕزگاری یانێ بەخشاین گونایل دێریم.

سەرتر بوین مەسیح

¹⁵ ئەیو وێنەێ خوداێ نادیاریه، یەکم زگ، نواتر و بانتر له گشت درسکریایل خوداس،

¹⁶ چوینکه گشت چشتێگ وه وەسلەێ ئەیو وه دی هاتێه: هەر چی که ها ناو ئاسمان و هەر چی که ها بان زەوی، هەر چی دیاره و هەر چی نادیاره، چ تەختیل چ حوکمرانیێل چ سەروکیل چ دەسڵاتداریل، گشت چشتێگ له ڕێ ئەیو و ئەڕا ئەیو هاته دی.

¹⁷ ئەیو وەرجه گشت چشتێگه و گشت چشتێگ وەناو ئەیو وه لاێ یەکترەکی گیر درێید.

¹⁸ ئەیو ئەڕا جەسه، یانێ کلیسا، سەره. ئەیو سەرەتا و یەکم زگ لەناو مردگیله، تا وه هەر چشتێگ ئەیو سەر بود.

¹⁹ چوینکه گشت پڕی خودا خوەشنود بی که وەناو ئەیو نیشتەجێ بود و

²⁰ له ڕێ ئەیو گشت چشتێگ چ وه بان زەوی و چ وەناو ئاسمان، وەگەرد خوەێ دوسی بێید، له ڕێ ئاشتی و سڵامەتێگ که وەگەرد ڕشیان خوین ئەیو وه بان سەلیب، وەدی هاورد.

²¹ ئیوەیش زەمانێگ وەگەرد خودایا بێگانه و وەناو فکریل خوەدان دشمەن ئەیو بین و کاریل شەڕئاشویی کردیاین.

²² وەلێ ئێرنگه مەسیح ئیوه وەناو جەسەێ بەشەری خوەێ وەگەرد مردنێ ئاشتی داس، تا ئیوه موقەدەس و بی نەخس و دویر له هەر سەرزەنشتێگ بارێده ئەڕا لاێ خودا،

²³ هەڵبەت ئەگەر وەڕاسی وەناو ئیمان قورس بوین و بەردەوام بمینێن و له ئمید ئینجیل جم نەخوەین، هەر ئەو ئینجیلێگ که شنەفتین و وه گشت درسکریایل ژێر ئاسمان جار دریاس و مه، پولوس، بیمەسه خزمەتکاری.

زامەتیل پولوس ئەڕا کلیسا

²⁴ ئێرنگه له رەنجیلێ که وەبونەێ ئیوه کیشام خوەشاڵم و هەر کەم کەسری بەردیلی که مەسیح وەبونەێ جەسەێ یانێ کلیسا کیشاس، وەناو جەسەێ خوەم کامڵەو کەم.

²⁵ مه وه پێ خزمەت هێوەتکەرێگ که خودا ئەڕا خێریەت ئیوه وەپێم سپارد، بیمه خزمەتکار کلیسا، تا کەڵام خودا وه کەماڵ وه ئیوه بناسنم،

²⁶ یانێ ئەو رازه که له دریژایی دەورانیل و نەتەوەیل شاریایەو، وەلێ ئێرنگه وه موقەدەسیل ئەیو ئاشکرا بیه.

²⁷ خودا ئیجوره تواس که وه ئەوانه ئاشکرا بکێد که ئی رازه چ جەڵاڵ گەوراێگ وەناو ناجویلەکەیل دێرێد، ئەو رازه که مەسیح ها ناو ئیوه، که ئمید جەڵاڵه.

²⁸ ئیمه مەسیح بانگەوازی کيمن و وه هەر کەسێگ هەڕەشه دیم و وه کەماڵ زانیاری گشتیەکی تالیم دیم، تا گشتیەکیگ بازڵه وەناو مەسیح باریمنه ئەڕا لاێ خودا.

²⁹ وه ئی باوەتەسه که مه زامەت کیشم و وەگەرد گشت هێز ئەیو که وه قەوەت وەناو مه کار کەید، تەقالا کەم.