کاریل ڕەسولەیل 9 - کتاب مقدس به زبان کردی جنوبی - گویش کلهوری

ئیمان هاوردن شائول

¹ وەلێ شائول هێمراێ له هەڕەشه کردن و کوشتن شاگردیل خوداوەند دەس هەڵنەگردوی، جا چیه ئەڕا لاێ کاهن گەورا و

² داواێ نامەیلی ئەڕا کەنیسەیل شار دەمشق له لێ کرد، تا که ئەگەر کەسێگ له ئیمانداریل وه مەسیح پەێا بکێ، چ ژن چ پیا، دەسگیرێان بکێ و بارێدێانه ئەڕا شار ئورشەلیم.

³ وەختێ چیاد و نزیک شار دەمشق بویاد، لەناکاوا نویرێگ له ئاسمان وه دەوریەو درەوشیا.

⁴ جا کەفته زەوی و دەنگێگ شنەفت، که وەپێ وەتیا: «شائول، شائول، ئەڕا عەزاوم دەی؟»

⁵ شائول وەته پێ: «خوداوەندا، تو کەێد؟» جواو هات: «من عیسام، ئەیو کەسه که توی عەزاوی دەی.

⁶ وەلێ هەڵس و بچوه ناو شار، وه ئەوره وەپێد ئویشریێ که چه باێه بکێ.»

⁷ ئەوانه که وەناو گەردیان وەگەرد پولوسەو بین بیدەنگ وساوین؛ ئەوانه دەنگەگه شنەفتیان وەلێ کەسێگ نوینیان.

⁸ شائول له زەوی هەڵساده پا، هەر چەن چەويلی واز بی وه‎لێ نەتویەنست چشتێگ بوینی؛ جا دەسێ گردن و بردنێ ئەڕا دەمشق.

⁹ سێ ڕوژ چەوێ نوینیاد، چشتێگ نیەخواردیا و نیەنوشیا.

¹⁰ وه دەمشق شاگردێگ حەنانیا ناو زنەیی کردیا. خوداوەند وەناو رویا وەپێ ئاشکرا بی و فەرمایش کرد: «ئێ حەنانیا!» ئەویش جواو دا: «هامه ئێرا خوداوەندا.»

¹¹ خوداوەند وەپێ وەت: «هەڵس بچوه ئەڕا کویچەێگ که وەپێ ئویشن ’ڕاس‘، له ماڵ یەهودا مینێ پیاێگ تارسوسی بکه که ناوێ شائوله، ئەوه خەریک دوعا کردنه،

¹² شائول وەناو رویا پیاێگ دیه، که ناوێ حەنانیاس، تێدە ناو دەس نێده سەری تا بینایی خوەێ وه دەس بارێ.»

¹³ وەلێ حەنانیا جواو دا: «خوداوەندا، وه فره کەس لەباوەت ئی پیا شنەفتمه که چەنێ وه ئیمانداریل تو له ئورشەلیم خراوی کردێه.

¹⁴ هەر ئیجوره سەران کاهنيل دەسڵات دانەسه پێ تا هەر کەس که ناو تو بێ، دەسگیر بکێ.»

¹⁵ وەلێ خوداوەند وه حەنانیا وەت: «بچو، چوینکه ئی پیا دەفر هەڵوژاریای منه ئەڕا ئیه که ناو مه لەلاێ ناجویلەکەیل و پادشایلێان و قەوم ئێسرائیل بوەید.

¹⁶ چوینکه وەپێ نیشان دەم وەبونەێ ناو من چ رەنجیلێ باێه بکیشێد.»

¹⁷ جا حەنانیا دا دەیشت و چیه ناو ئەو ماڵه و دەس ناده سەری، وەت: «شائول براگەم، خوداوەند، یانێ هەر ئەو عیسا که وەختێ هاتیایده ئەڕا ئێرا وەناو ڕێ وه توی ئاشکرا بی، مه کل کردێه تا بینایی خوەد وه دەس باری و پڕ له روح‌القودوس بید.»

¹⁸ هەر ئەو ئانه چشتێگ جور پویلەکه له چەویلی دا کەفت و بینایی خوەێ وه دەس هاورد و هەڵساد خوسڵ تەعمید گرد.

¹⁹ ئمجا نان خوارد و هێزێ هاتەو. شائول ئەڕا چەن ڕوژیگ وەگەرد شاگردیل وەناو دەمشق دادەێ سەر.

شائول وه دەمشق و ئورشەلیم

²⁰ ئەوه زویزی وەناو کەنیسەيل جار دیاد که عیسا کوڕ خوداس.

²¹ گشت کەسیلێگ که پێخامێ شنەفتیان سەریان سڕ مەنیاد و وەتیان: «مەر ئیه هەر ئەوه نیه که وه ئورشەلیم کەسیلێ که ئی ناوه وه زوان هاوردیان، نابود کردیا؟ ئێ ئەڕا ئیه ناتیەسه ئێرا تا دەسگیریان بکێ و بوێدیانه لاێ سەران کاهنیل؟»

²² وەلێ شائول هەر ڕوژ تویەناتر بیاد و جویلەکەیل دەمشق دەمکوت کردیا و سابت کردیاد که عیسا، هەر ئەو مەسیحەسه.

²³ وەشون ماوەێ فرەێگ، جویلەکەیل دەس وه یەکی کردن تا بکوشنێ.

²⁴ وەلێ شائول له نەخشەگەێان ئاگادار بی. ئەوانه شەو و ڕوژ هوشێانه دەروازەێیل شار بی تا بکوشنێ.

²⁵ وەلێ شاگردەگانێ شەوەناو بردنێ و نانێ ناو سەوەتەێگ و له دەروەچەێ دیوار شارەگه شوڕیەو کردنه خوار.

شائول له ئورشەلیم

²⁶ وەختێ شائول چیه ئەڕا ئورشەلیم، تواسیا خوەێ برەسنیه باقی شاگردیل، وەلێ گشتێان زاورێانه لێ چیاد، چوینکه باوەڕ نەکردیان وه ڕاسی بیەسه شاگرد.

²⁷ وەلێ بەرنابا ئەوه وەگەرد خوێا برد و نادێ لاێ ڕەسولەگان، ئەڕاێان وەت که چوی خوداوەند وەناو ڕێ دەمشق دیه و چوی خوداوەند وەگەردیەو قسیه کرد، هەر ئیجوره چوی وه دەمشق وه ئازای ناو عیسا بانگەوازی کردێه.

²⁸ جا شائول لەلاێان مەن و وه ڕزگاریەو وه ئورشەلیم هات بچو کردیاد و وه ئازای وه ناو خوداوەند بانگەوازی کردیاد.

²⁹ ئەوه وەگەرد جویلەکەیل یونانی زوان قسیه و باس کردیا، وەلێ ئەوانه تواسیان بکوشنێ.

³⁰ وەختێ براگان ئیه فامین، بردنێ ئەڕا شار قیسەریه و له ئەوره کلی کردن ئەڕا شار تارسوس.

³¹ جا کلیسا وه سەرئانسەر ناوچەێل یەهودیه و جەلیل و شار سامره ئارامەو بی، پا گردیا و له ترس خوداوەند وه سەر بردیاد و وه ئارامی روح‌القودوس فرەوه بویان.

خزمەتیل پتروس

³² وەختێ پتروس وه گشت مەنتەقەیل گەردیاد، چی سەر دا ئیمانداریل وه مەسیح که له شار لوده نیشتەجێ بین.

³³ وه ئەوره پیاێگ دی ئینیاس ناو که هەیشت ساڵ فەلەج بوی و کەفتویه ناو جێ.

³⁴ پتروس وەپێ وەت: «ئینیاس، عیسا مەسیح شەفاد دەێ. هەڵس و جیەگەد گردە‎و که!» ئەویش زویزی هەڵساد،

³⁵ گشت نیشتەجێیل شاریل لوده و شارون ئیه دین و ڕوی هاوردنه خوداوەند.

³⁶ وەناو شار یافا شاگردێگ زنەیی کردیا ناوێ تابیتا بی، که وه یونانی بوده دورکاس که وه ماناێ ئاسکه. ئی ژنه هەمویشه خەریک کاریل خاس و مەێەت داین وه کەمدەسیل بی.

³⁷ وه ئەو ڕوژیله نەخوەش کەفت و مرد. جا جنازەگەێ شوردن و نانی باڵاخانەێگ.

³⁸ چوینکه لوده نزیک یافا بی، وەختێ شاگردیل ئاگادار بین که پتروس ها ئەوره، دو نەفەر کل کردنه ئەڕا لاێ و وەتنه پێ: «بیزامەت زویزی خوەد برەسنه لامان.»

³⁹ پتروس وەگەردێان چی و وەختێ ڕەسیه ئەوره، بردنێ باڵاخانەگه. گشت بێوه ژنيل له دەورێ گردەو بوین، گیره کردیان و شەویەگان و دڵنگیلی که دورکاس وەختێ زنی بی دویرانویەی، نیشانی دیان.

⁴⁰ پتروس گشتێان له وتاخ کرده دەیشت و زرانی دا، دوعا کرد. ئمجا ڕوی کرده جنازەگه و وەت: «تابیتا، هەڵسه پا!» تابیتا چەویلی واز کرد و وەختێ پتروس دی، دانیشت.

⁴¹ پتروس دەسێ گرد و هێزێ دا. ئمجا ئیمانداریل وه مەسیح و بێوه ژنيل چڕێ و زنی سپاردەێ دەسێان.

⁴² ئی خەوەره وه سەرئانسەر یافا پێچیا و قێر فرەێگ وه خوداوەند ئیمان هاوردن.

⁴³ پتروس قێرێ وه یافا له لاێ چەرمەوگرێگ شەمعون ناو، مەن.