کاریل ڕەسولەیل 8 - کتاب مقدس به زبان کردی جنوبی - گویش کلهوری

¹ شائول رزایەت دا تا ئستیفان بکوشن. وه ئەو ڕوژه، کلیساێ شار ئورشەلیم تویش عەزاو سەختێگ هات و گشت بێجگه ڕەسولەگان، وه دەوروەر یەهودیه و سامره تەفرتوینا بین.

عەزاو داین ئیمانداریل وه مەسیح

² قێرێ له پیایل خوداترس ئستیفان دەفن کردن و ئەڕاێ ئازیەتباری گەوراێگ گردن.

³ وەلێ شائول شرو وه خاپور کردن کلیسا کرد، ماڵ وه ماڵ گەردیاد و ژنيل و پیاێل کیشیاده دەیشت و خستیادێانه زندان.

فیلیپوس وەناو سامره

⁴ ئێرنگه ئەوانەێ که تەفرتویناوه بوین، وه هەر کوره که چیان، کەڵام خودا بانگەوازی کردیان.

⁵ فیلیپوسیش چیه ئەڕا یەکیگ له شاریل سامره و وه ئەوره ناو مەسیح وه مەردم جار دا.

⁶ جەماێەت وەختێ قسیەيل فیلیپوس شنەفتیان وه قوڕن دڵ وه هەر چی که وەتیا گوش تەکانیان و موجزەیلێ دوینیان که وه دەسێ ئەنجام گردیا.

⁷ ئەڕا ئیه که روحیل ناپاک قیڕانیان و له فره وه ئەوانەێ که وەناوێان بین هاتیانه دەیشت و فره له فەلەجەیل و شەلەیل شەفا گردیان.

⁸ وه ئی بونه خوەشی گەوراێگ ئەو شاره گردەوەر.

شەمعون جادوکەر

⁹ وەلێ پیاێگ وه ئەو شاره زنەیی کردیا که ناوێ شەمعون بی که بایس بوی ئەڕا ماوەێگ مەردم سامره له کاریلێ سەریان سڕ بود، وه ئیجوره وەتیا که چماێ ئەڕا خوەێ کەسێگه.

¹⁰ گشتیەکی له ورد و زرو، گوش دیانه لێ و وەتیان: «ئی پیا هێز ئەو خودایگەسه که وەپێ ئویشن ’گەورا‘.»

¹¹ ئەوانه گوشە لێ دیان، چوینکه ئەڕا ماوەێ فرەێگ وەگەرد جادو کردن، سەریان سڕ کردیا.

¹² وەلێ وەختێ وه مزگانی فیلیپوس له باوەت پادشایی خودا و ناو عیسا مەسیح ئیمان هاوردن، گشتێان، ژن و پیا، خوسڵ تەعمید گردن.

¹³ تەنانەت خود شەمعونیش ئیمان هاورد و وەشون ئیه که تەعمید گرد، یەسەر وەشون فیلیپوس بی و له نیشانەیل و موجزەیل فره گەوراێگ که دوینیاد، سەری سڕ مەنوی.

¹⁴ وەختێ ڕەسولەگان وەناو ئورشەلیم شنەفتن که سامریەگان کەڵام خودا قەبوڵ کردنه، پتروس و یوحەنا کل کردنه ئەڕا لاێان.

¹⁵ وەختێ ئەو دوانه هاتنه سامره، ئەڕا ئیمانداریل وه مەسیح دوعا کردن تا روح‌القودوس بگرنەوەر،

¹⁶ ئەڕا ئیه که هێمراێ روح‌القودوس ناتویه سەر هویچکامێان، چوینکه ئەوانه تەنیا وه ناو عیساێ خوداوەند تەعمید گردوین.

¹⁷ جا پتروس و یوحەنا دەس نانه سەریان و روح‌القودوس گردنەوەر.

¹⁸ وەختێ شەمعون دی که ڕەسولەگان دەس نەنه سەر مەردم و روح‌القودوس درێیده پێان، قێرێ پویل ئەڕاێان هاورد و

¹⁹ وەت: «ئی هێزه بێەنه منیش تا دەس بیلمه سەر هەر کەس، روح‌القودوس بگرێدەوەر.»

²⁰ وەلێ پتروس وەپێ وەت: «با خوەد وەگەرد پویل نقرەگەد نابود بود! چوینکه فکر کردی تویەنێ خەڵاتی خودا وه پویل بسێنێ!

²¹ تو وەناو ئی خزمەته هویچ بەش و نسیویگ نێری، چوینکه دڵد لەلاێ خوداوه ڕاس نیه.

²² وه ئی شەڕئاشویده توبه بکه و له خوداوەند بتوا تا بەڵکەم ئی فکریل دڵده بوەخشرێید؛

²³ چوینکه دوینم که پڕ له ژار تیەڵید و گیرودێ شەڕئاشوید.»

²⁴ شەمعون جواو دا: «ئەڕام لەلاێ خوداوەند دوعا بکه تا ئەو چشته که وەتی، نایده سەرم.»

²⁵ وەشون ئەوه که پتروس و یوحەنا له باوەت عیسا شاێەتی دان و پێخام خوداوەند جار دان، هاتنەو ئەڕا ئورشەلیم و لەناو ڕێ وه فره له ئاواییل سامره بانگەوازی کردن.

فیلیپوس و خەزانەدار حەبەشی

²⁶ ئمجا فریشتەێ خوداوەند وه فیلیپوس وەت: «هەڵس و وەرەو باشور بچو، وه ئەو جاده که له ئورشەلیم وەرەو شار غەزه چود، هەر ئەو جادەێ بیاوانیه.»

²⁷ ئەویش هەڵساد و چی و تەقیاده یەێ خەزانەدار حەبەشی که له دەربار ’کەنداکه‘ مەلەکەێ حەبەشه، خەزانەدار بی. ئەوه ئەڕا پەرەسش هاتویه ئورشەلیم.

²⁸ ئەوه وەختێ چیاده ئەڕا نیشتمانەگەێ خوەێ وەناو ئەرابەگەێ دانيشتوی و کتاو ئەشعەیاێ پەێخەمەر خوەنیاد.

²⁹ ئمجا روح خودا وه فیلیپوس وەت: «بچوه نوا و بکەفه گەرد ئەو ئەرابەێا.»

³⁰ فیلیپوس دەوی وەرەو لاێ و شنەفت که کتاو ئەشعەیاێ پەێخەمەر خوەنێد، له لێ پرسی: «ئێ ئەو چشته که خوەنێد، حالید بود؟»

³¹ وەت: «ئێ چوی حالیم بود، ئەگەر کەسێگ ڕێنماییم نەکێ؟» جا لاڵکیاده فیلیپوس تا سوار بود و بنیشێده لاێ.

³² ئەو بەشه که له کتاو موقەدەس خوەنیاد، ئیه بی: «جور پەسێگ که ئەڕا سەر بڕین بەنەێ و جور وەرکێگ که له وەر دەس برێنەکەرەیل خوەێ بیدەنگه، جا دەم واز نەکرد.

³³ ئەیو سوکەو بی و دادپەروەری لەلێ دریخ بی؛ کی تویەنێ باس نەتەوەگەێ بکێ؟ چوینکه زنەیی ئەیو له سەر زەوی بڕیاس.»

³⁴ خەزانەدارەگه وه فیلیپوس وەت: «پرسیارێ لەلێد دێرم: ئی ئەشعەیاێ پەێخەمەره له باوەت کی باس کەێد؟ باس خوێه یا یەکیگتره؟»

³⁵ ئمجا فیلیپوس دەمی واز کرد و هەر لەو بەشه له کتاو موقەدەس شرو کرد و مزگانی عیسا دا پێ.

³⁶ وەختێ وەناو ڕێ بین، ڕەسینه سەر ئاوێگ. خەزانەدارەگه وەت: «بنوڕ، ها ئیەیشه ئاو، چ چشتێ نوای تەعمید مه گری؟»

³⁷ فیلیپوس وەت: «ئەگەر وه تەمام دڵ ئیمان بارێ، بود.» خەزانەدارەگه وەت: «ئیمان دێرم که عیسا مەسیح کوڕ خوداس.»

³⁸ جا خەزانەدارەگه دەستور دا ئەرابەگه گیر بێەن، فیلیپوس و خەزانەدارەگه، هەردگێان چینه ناو ئاوەگه و فیلیپوس تەعمیدی دا.

³⁹ وەختێ له ئاو هاتنه دەیشت، لەناکاوه روح خوداوەند فیلیپوس برد و دی خەزانەدارەگه نێەێ، وەلێ وه خوەشیەو ڕێگەێ خوەێ گردەوەر.

⁴⁰ وەلێ فیلیپوس له ئەشدود دین. ئەوه وەناو گشت شاریل ئەو مەنتەقه گەردیاد و مزگانی دیاد، تا ڕەسیه شار قیسەریه.