کاریل ڕەسولەیل 7 - کتاب مقدس به زبان کردی جنوبی - گویش کلهوری

قسیەيل ئستیفان لەنواێ شوراێ جویلەکە

¹ ئمجا کاهن گەورا له ئستیفان پرسی: «ئێ ئی چشتیله ڕاسن؟»

² ئستیفان وەت: «ئێ برایل و ئێ باوگیل گوش بێەنه لێم، خوداێ پڕ جەڵاڵ، وەختێ وه باوگمان ئێبراهیم ئاشکرا بی که وەناو بین النهرین نیشتەجێ بی، وەرجه ئەوه که بار بکێ ئەڕا میلکان حەران،

³ فەرمایش کرده پێ: ”نیشتمان و خزمەگاند بیله جێ و بچوه ئەڕا میلکانێ که نیشاند دەم.“

⁴ «جا، له میلکان کەلدانییل هاته دەیشت و وەناو حەران نیشتەجێ بی. وەشون مردن باوگێ، خودا ئەوه له ئەوره برد ئەڕا ئی میلکانه که ئێرنگه وەناوێ نیشتەجێین.

⁵ وه ئی حاڵەو خودا وه ئێرا تەنانەت چەنه یەێ وژه زەوی میراته پێ نیاد؛ وەلێ واده دا پێ که وه مڵکیەت بیده خوەێ و نەتەوەێ، هەر چەن ئێبراهیم مناڵێگ نیاشت.

⁶ جا خودا فەرمایش کرده پێ: ”نەتەوەێ تو وه میلکان بێگانه غەریوی کیشن و کەنێانه خوڵام و نزیک چوارسەد ساڵ ستەمه پێان کەن.“

⁷ خودا فەرمایش کرد: ”وەلێ من ئەو ملەته که ئەوانه خزمەتیان کەن، داوەری کەم، جا وەشون ئەوه، تیەنه دەیشت و وه ئی شونه پەرەسشم کەن.“

⁸ خودا پەێمان خەتەنه وەگەرد ئێبراهیم بەسا. ویجوره ئێبراهیم وه ڕوژ هەیشتم وه دنیا هاتن ئەسحاق، خەتەنەێ کرد. ئەسحاقیش یاقوب و یاقوب دوانزه کوڕەگەێ، که هەر کام بونه باوگ یەێ هوز له ئێسرائیل.

⁹ «کوڕیل یاقوب که وه یوسف حەسویی کردیان، فروتنێ مسر. وەلێ خودا وەگەردیەو بی و

¹⁰ له گشت بەردیلێ نجاتی دا، زانیاری وەپێ بەخشی و له وەر چەو فرعون پادشاێ مسر ئەوجورە عەزیزەو کرد تا نادێ فەرمانرەوایی مسر و سەروک دەربارەگەێ خوەێ.

¹¹ «ئمجا قاتوقڕی و بەرد فره گەوراێگ وه سەرئانسەر مسر و کەنعان هات و باپیریلمان خواردەمەنی پەێا نەکردن.

¹² وەلێ وەختێ یاقوب شنەفت که وەناو مسر خەله هەس، باپیریلمان ئەڕا یەکمین جار کل کرده ئەڕا ئەوره.

¹³ ئەڕا دویم جار، یوسف خوەێ وه براگانێ ناسان و فرعون له بنەماڵەێ یوسف ئاگاردار بی.

¹⁴ جا یوسف دەستور دا و کل کرده شون یاقوب باوگێ و گشت خاوخێزانەگەی دەنگ کرده ئەڕا ئەوره، که گشتێان وەبان یەک بویانه هەفتا و پەنج نەفەر.

¹⁵ جا یاقوب چیه ئەڕا مسر و خوەێ و باپیریلمان وه ئەوره مردن و

¹⁶ جنازەگانێان بردنه ئەڕا شکیم و وەناو مەقبەرەیگ که ئێبراهیم وه نرخ نقره له کوڕيل حەمور سەندوی، دەفن کردن.

¹⁷ «وەلێ چوینکه وەخت وه دی هاتن ئەو وادەێ خودا وه ئێبراهیم نزیکەو بویاد، ژمارەێ قەومەگەمانیش فره فرەوه بویان،

¹⁸ تا ئیه که پادشاێگ تر هاته سەر تەخت مسر و یوسف نیەناسیا.

¹⁹ ئەوه وه فێڵیگەو وەگەرد قەومەگەمان ڕێ رەوشت کرد و ستەم فرەێگ وه باپیریلمان کرد و ناچاریان کرد که مناڵه کوڕپەگانێان بخەنه دویر تا زنی نەمینن.

²⁰ «وه ئەو ڕوژگاره بی که موسا هاته دنیا. وه لاێ خوداوه فره ڕەنگین بی. موسا سێ مانگ له ماڵ باوگێ پەروەرده بی.

²¹ وەختێ وه دەیشت وێڵێ کردن، دویەتەگەێ فرعون هەڵیگرد و جور مناڵ خوەێ گەوراێ کرد.

²² موسایش گشت زانیاری مسرییل یاێ گرد و وه وتار و کردەوه تویەنا بی.

²³ «وەختێ بیه چل ساڵی، وه فکرێ رەسێ که بچود و سەرێگ بیده برا ئێسرائیلیەگانێ.

²⁴ وەختێ دی پیاێگ مسری وه یەکیگێان ستەم کەێ، له پشتێ درهات و دادی سەند و ئەو مسریه کوشت.

²⁵ موسا فکر کردیا براگانێ حالیان بود که خودا تواێ وه دەس ئەوه نجاتیان بێی، وەلێ حالیان نوی.

²⁶ ئی ڕوژەگەێ، تەقیاده دو نەفەر ئێسرائیلی که چوینه گژ یەکا، تواسیا بخەێدیانه یەکا، وەت: ”ئێ پیاێل، ئیوه براین، ئەڕا وه یەکترەکی ستەم کین؟“

²⁷ «وەلێ پیاێگ که وه هاوساگەێ ستەم کردیا، دادەێ لا و وەت: ”کی تو کردێەسه حاکم و داوەر وه سەرمان؟

²⁸ ئێ تواێ منیش بکوشێ، هەر ئەوجورە که ئەو مسریه دویەکه کوشتی؟“

²⁹ وەختێ موسا ئی جواوه شنەفت، دەرچی و ئاواره بیه ناو میلکان مدیان و وه ئەوره بیه ساێو دو کوڕ.

³⁰ «چل ساڵ گوزیشت. یەێ روژ وەناو بیاوان، نزیک کویەێ سینا، فریشتەێگ وەناو گڕەی ئاگر وەناوڕاس بنجگ دارێگ خوەێ وه موسا ئاشکرا کرد.

³¹ موسا وەختێ ئەوه دی سەری سڕ مەن. وەختێ چيه نواتر تا له نزیکەو بویندی، دەنگ خوداوەند ڕەسیه پێ:

³² ”منم خوداێ باوگیلد، خوداێ ئێبراهیم و ئەسحاق و یاقوب.“ ڕکه کەفته گیان موسا و جرئەت نیەکردیا بنوڕده پێەو.

³³ «ئمجا خوداوەند فەرمایش کرد: ”کەوشەگاند له پاد بکەن، چوینکه ئەو شونه که وەناوێ وسایده زەوی موقەدەسه.

³⁴ من بەرد قەوم خوەم له مسر دیمه و ناڵەیان شنەفتمه و هاتمەسه خوار تا که بارمێانه دەیشت. ئێرنگه بەو تا کلد بکەمه ئەڕا مسر.“

³⁵ «هەر ئی موسا که ڕەدێ کردن و وەتن: ”کی تو کردێەسه حاکم و داوەر وه سەرمان؟“ خودا ئی پیا وه دەس فریشتەێگ که وەناو بنجگ دارێگ وه لێ ئاشکرا بی، کلی کرد تا بوده حاکم و ڕزگارکەریان.

³⁶ هەر ئی موسا بی که قەوم هاورده دەیشت و له مسر و لیوەێ دەریاێ سویر و چل ساڵ له بیاوان، موجزەیل و نیشانەیل وه ئەنجام رەسان.

³⁷ «هەر ئی موسا وه بەنی ئیسرائیل وەت: ”خودا وەناو برایلدان، پەێخەمەرێگ جور من ئەڕادان دانرێید.“

³⁸ جا هەر ئیجوره هەر ئی موسا بی که لەناو بیاوان لەناو جەماێەت بی، هەر ئیجوره وەگەرد فریشتەێگ بی که له کویەێ سینا وەگەردیەو قسیه کرد و ئی فریشته وەگەرد باپیریلمانیش قسیه کرد. موسا کەڵام زنی گردەوەر تا برەسنێده پێمان.

³⁹ «وەلێ باپیریلمان گوشە لێ نەتەکانن، ڕەدێ کردن و ئاوەختی داشتن بچنەو ئەڕا مسر،

⁴⁰ ئەوانه وه هارون وەتن: ”خودایلێ ئەڕامان درس بکه تا وەنوامان بچن، چوینکه نيەزانیم چه هاتیەسه سەر ئی موسا که ئیمه له خاک مسر هاورده دەیشت!“

⁴¹ وه ئەو ڕوژیله بی که بتێگ وه شێوەێ گور درس کردن و قوروانی ئەڕاێ کردن، ئەڕا ئەو چشته که وه دەس خوێان درس کردن فره خوەشی کردن.

⁴² وەلێ خودا ڕوی لەلێان هەڵوگەردان و هیشتیانه حاڵ خوێانا تا هەرچێ ها ناو ئاسمان بپەرەسن؛ ئەوجورەکە وەناو کتاو پەێخەمەریل نویسریاس: «”ئێ قەوم ئێسرائیل، ئێ وه ئەو چل ساڵ وەناو بیاوان، ئەڕا مه قوروانی و پیشکەشی هاوردین؟

⁴³ ئیوه دەوار بت مولوک و هەسارەێ خوداێ خوەدان، ڕفان، هەڵداین، پێکەریلێگ بین که ئەڕا پەرەسش درس کردین. جا ئیوه شار وه دەر کەم ئەڕا ئەو لاێ بابڵ.“

⁴⁴ «باپیریلمان وەناو بیاوان دەوار شاێەتیێش وەگەرد خوێانا داشتن، دەوارێگ که موسا وه دەستور خودا وه پێ نمونەێگ که دوی، درس کرد.

⁴⁵ باپیریلمان وەختێ وه ڕابەری یوشەع، میلکان کەنعان له ملەتێگ که خودا لەنواێ ئەوانه دەر کردوی، داگیرێ کردن، دەوار شاێەتی وەگەرد خوێان هاوردن و ئەو دەواره تا ڕوژگار داود پادشا وه ئەوره مەن.

⁴⁶ داود پادشا پەسەن خودا هات و داوا کرد که نیشتەجێگ ئەڕا خوداێ یاقوب درس بکێ.

⁴⁷ وەلێ سڵێمان پادشا بی که ماڵێگ ئەڕا خودا سازی.

⁴⁸ «وەلێ خوداێ هەربەرز وەناو ماڵيلی که وه دەس درس کریاس نیشتەجێ نیود، ئەوجورەکە ئەشعەیاێ پەێخەمەر وەتیه:

⁴⁹ «”خوداوەند فەرمایش کەێ: ’ئاسمان تەخت پادشایی منه و زەوی کورسی ژێر پامه! چ ماڵێگ ئەڕا مه بنیاد نین، خوداوەند فەرمایش کەێ، شون شەکەتی دەرکردنم ها کوره؟

⁵⁰ مەر دەس من گشت ئی چشتیله درس نەکردیه؟“‘

⁵¹ «ئێ مەردمیل ملهوڕ، ئێ کەسیلێ که دڵ و گوشیلدان خەتەنه نەکریاس! ئیوەیش جور باپیریلدان هەر لەنواێ روح‌القودوس پا دینه گەز.

⁵² کام پەێخەمەره که وه دەس باپیریلدان عەزاو نێیه؟ ئەوانه تەنانەت پەێخەمەریلی که هاتن ئەو سالحانه پێشگویی کردوین، کوشتن؛ ئێرنگەیش ئیوه خود ئەیو داینێ دەسەو کوشتینێ،

⁵³ ئیوه تەورات که له ڕێ فریشتەیل ڕەسیەسه پێدان، قەبوڵ کردین، وەلێ گوشە لێ نەتەکانین.»

کوچگ واران ئستیفان

⁵⁴ ئاڵ شورا وەختێ ئی قسیەیله شنەفتن، توڕه بین و دگانیلێان ساینه مل یەکا.

⁵⁵ وەلێ ئستیفان پڕ له روح‌القودوس، چەو بڕیە ئاسمان و جەڵاڵ خودا دی و عیسا که وه دەس ڕاس خودا وساوی.

⁵⁶ جا وەت: «ئێرنگه دوینم ئاسمان وازه و کوڕ ئنسان وه دەس ڕاس خودا وساس.»

⁵⁷ وەلێ ئەوانه وه دەنگ بەرز قیڕانن و گوشیلێان گردن و گشتێان وەگەرد یەکا هویژم بردنه پێ.

⁵⁸ ئمجا له شار کڕاننەێ دەیشت و گردنەێ کوچگ. شاێەتەگان دڵنگەگانێان کەنین و هیشتنه نوای پاێ جوانێگ که ناوێ سولوس بی.

⁵⁹ وەختێ ئستیفان گردنه کوچگ، وه دەنگ بەرز کردەێ هاوار و دوعا کرد، وەت: «ئێ عیسا خوداوەند، روحم قەبوڵ بکه!»

⁶⁰ ئمجا زرانی دا و وه دەنگ بەرز کردی هاوار: «خوداوەندا، ئی گوناێانه مەنویسه پاێان.» ئیه وەت و گیان سپارد.