کاریل ڕەسولەیل 6 - کتاب مقدس به زبان کردی جنوبی - گویش کلهوری

هەڵوژاردن هەفت خزمەتکار

¹ وه ئەو ڕوژیله که شاگردیل فرەوه بویان، جویلەکەیل یونانی زوان وه سەر جویلەکەیل عبرانی زوان خوتەخوت کردیان که بێوه ژنیلیان له بەش نان ڕوژانه بی نسیو مینن.

² جا ئەو دوانزه ڕەسوله، جەماێەت شاگردیل چڕین و وەتن: «ئەڕا ئیمه درس نیه بانگەوازی کەڵام خودا بخیمنه پشت گوش و خەریک بەش کردن نان بویمن.

³ جا ئێ برایل، له ناو خوەدان هەفت پیا هەڵوژنن که ناوێان وه خاسێ بەن و پڕ بون له روح و زانیاری، تا بنیمیانە سەر ئی کاره.

⁴ وەلێ ئیمه خوەمان خەریک دوعا و خزمەت کەڵام کەیمن.»

⁵ ئی قسیه گشتێان خوەشنودەو کرد. جا ئستیفان هەڵوژاردن، که پیاێگ پڕ له ئیمان و روح‌القودوس بی، وەگەرد فیلیپوس و پروخوروس و نیکانور و تیمون و پەرمیناس و نیکولائوس ئەنتاکی که بویه جویلەکە.

⁶ بردنێانه ئەڕا لاێ ڕەسولەیل، ئەوانیش دوعا کردن و دەس نانه ملێان.

⁷ جا کەڵام خودا پەخشەو بویاد و ژمارەێ شاگردەگان له شار ئورشەلیم فره فرەوه بی و جەم فرەێگ له کاهنيلیش ئیمان هاوردن.

گرتن ئستیفان

⁸ ئستیفان پڕ له فیز و هێز خودا، موجزەیل و نیشانەیل گەورا وەناو قەوم ئاشکرا کردیاد.

⁹ جا چەن نەفەر له کەنیسەێگ که وەپێ وەتیان ’کەنیسەی ڕزگار کریایێەگان‘، له جویلەکەیل قیرەوان و ئەسکەنەریە و ئەوانەێ که له ناوچەێل کیلیکیه و ئاسیا بین، هەڵسان و وەگەرد ئستیفان بیه دەمقاڵیان.

¹⁰ وەلێ ئەوانه نەتویەنستن لەنواێ زانیاری و روحێگ که ئستیفان وەگەردیەو قسیه کردیا، بوسن.

¹¹ جا وه دزیەو چەن نەفەرێگ گاڵدان تا بویشن: «ئیمه شنەفتیمنه ئستیفان لەباوەت موسای پەێخەمەر و خودا کفر کردیا.»

¹² جا مەردم و شێخیل و ماموستایل تەورات چوەخزه دان و ڕشیانه سەر ئستیفان و گردنەێ و بردنێ ئەڕا شورا.

¹³ چەن گله شاێەت دروەکانیش هاوردن که وەتیان: «ئی پیا هەراێهەر وه قسیه کردن وه زد ئی شون موقەدەس و شەریعەت نیەوسدەو.

¹⁴ ئەڕا ئیه که خوەمان شنەفتیمنه که وەتیا عیساێ ناسری ئی شونه خراوی کێ و ئەو نەریتیلێگ که موسا وه ئیمه سپاردیه، گویڕنیدەو.»

¹⁵ وه ئی وەخته گشت ئەوانەێ که دانیشتوینه ناو شورا چەو بڕوینه پێ و دین که دەمچەوی بیەسه جور دەمچەو فریشتەیل.