کاریل ڕەسولەیل 5 - کتاب مقدس به زبان کردی جنوبی - گویش کلهوری

حەنانیا و سەفیره

¹ وەلێ پیاێگ حەنانیا ناو وەگەرد ژنەگەێ سەفیره تیکه زەویێگ فروت،

² وه ئاگاداری ژنەگەێ بەشێگ له پویلەگەێ هەڵگرد ئەڕا خوەێ و ئەو باقی هاورد و ناده نوای پاێ ڕەسولەیل.

³ وەلێ پتروس وەت: «ئێ حەنانیا، ئەڕا هیشتی شەیتان ئیجوره دڵد پڕەو بکێ که وه روح‌القودوس درو بویشی و له پویل زەویەگەد بەشێگ ئەڕا خوەد هەڵبگرێ؟

⁴ مەر وەرجه ئیه که بفروشیدێ هن خوەد نوی؟ ئێ وەشون ئیه که فروتیدەێ پویلەگەێ هن خوەد نوی؟ چه بی که وه دڵ خوەدەو تواسێ ئیجور کاره بکێ؟ تو نه وه ئنسان، بەڵکەم وه خودا درو وەتی!»

⁵ وەختێ حەنانیا ئی قسیەيله شنەفت، دا لک زەویا و مرد! گشت ئەوانه که ئیه شنەفتن ترس گەوراێگ کەفته کوڵیان.

⁶ ئمجا چەن جوان هەڵسان و پێچاننێ کفن و بردنێ دەیشت، دەفنی کردن.

⁷ وەشون سێ سات، ژنەگەێ بی ئەوه که بزانێ چه بیه، هاته ناو.

⁸ پتروس له لێ پرسی: «بویشه پێم زەویەگه هەر وه ئی نرخه فروتینەسێ؟» سەفیره جواو دا: «ئەرێ، وه ئی نرخه.»

⁹ وەلێ پتروس وەته پێ: «ئەڕا هەردگدان دەسەویەکی کردینه تا روح خوداوەند ئەزمون بکێن؟ ئەوەسه پایل ئەوانه که شویەگەد دەفن کردن ها دەم دەر و تنیش بەنه دەیشت.»

¹⁰ هەر ئەو ئانه، ژنەگەیش وه نوای پاێ پتروس کەفت و مرد. وەختێ جوانەگان هاتنه ناو، دین ئەویش مردگه. جا بردنێ دەیشت، لەلاێ شویەگەێ دەفنی کردن.

¹¹ ئمجا ترس گەوراێگ کەفته کوڵ گشت کلیسا و گشت ئەوانه که ئیه شنەفتن.

نیشانەیل و موجزەیل ڕەسولەیل

¹² وه دەس ڕەسولەیل نیشانەیل و موجزەیل فرەێگ وەناو قەوم ئاشکرا بویاد. ئیمانداریل گشتێان وه یەێ دڵ وەناو وەرتاێرمەێ سڵێمان گردەو بویان.

¹³ هویچکەس له ئەوباقی مەردم جرئەت نەکردیا بچوده ئەڕا لاێان، وەلێ مەردم، فره حرمەتیان گردیان.

¹⁴ فێشتر له هەر وەختێگ، قێر فرەێگ له ژنیل و پیاێل ئیمان هاوردنه خوداوەند،

¹⁵ جوری که تەنانەت نەخوەشیل هاوردیانه سەر کویچەیل و له سەر تەختیل و شونیل خەفانیان تا وەختێ پتروس له ڕێەو برەسێ بەڵکەم ساێەڕەگەێ بکەفێه سەر بڕێگیان.

¹⁶ مەردمیش له شاریل دەور و وەر ئورشەلیم گردەو بویان و نەخوەشیل و ئەوانه که تویش روحیل ناپاک بین هاوردیان، جا گشت شەفا گردیان.

ئەزیەت کردن ڕەسولەیل

¹⁷ وەلێ کاهن گەورا و گشت هاوکاریلێ که له فرقەێ سەدوقی وەگەردیەو بین، له ڕوی حەسویی دەس وه کار بین و

¹⁸ ڕەسولەیل دەسگیر کردن و خستنێانه زندان شار.

¹⁹ وەلێ شەوەناو فریشتەێ خوداوەند دەریل زندان واز کرد و هاوردیانه دەیشت و

²⁰ فەرمایش کرد: «بچنه ئەڕا ناو مابەد بوسن و پێخام کامڵ ئی ژیانه وه مەردم بویشن.»

²¹ وەختێ ئیه شنەفتن، دەم شەوەکی چینه ناو مابەد و خەریک تالیم داین مەردم بین. وەختێ کاهن گەورا و هاوکاریلێ که وەگەردیەو بین هاتن، ئاڵ شورا و گشت شێخیل ئێسرائیل چڕین و کەسیلێ کل کردن تا ڕەسولەگان له زندان بارن.

²² وەلێ وەختێ ماموریل چینه ناو زندان، ڕەسولەگان پەێا نەکردن. جا هاتنەو خەوەر دان،

²³ «ئیمه دیمن که دەرەگان زندان خاس داخستوین و نگابانەگانیش له دەم دەرەگان وساوین. وەلێ وەختێ دەرەگان واز کردیم، کەسێگ وەناو زندان پەێا نەکردیم.»

²⁴ وەختێ فەرماندەێ نگابانەگان مابەد و سەران کاهنيل ئیه شنەفتن سەریان سڕ مەن و وەتیان «ئاخر ئی کاره بوده چه؟»

²⁵ ئمجا یەکیگ هات و وەپێان وەت: «بنوڕن! ئەو پیاێله که خستوینێانه زندان، ئێرنگه وسانەسه ناو مابەد و مەردم تالیم دەن.»

²⁶ جا فەرماندەێ مابەد و نگابانەگان چین و ڕەسولەگان هاوردن، وەلێ نه وه زور، چوینکه زاورێان چیاد مەردم بگرنێانه کوچگ.

²⁷ وەختێ ڕەسولەگان هاوردن، هیشتنێانه نوای شورا. ئمجا کاهن گەورا لەليان پرسی:

²⁸ «مەر قیەخه لێدان نەکردیم که دی وه ئی ناوه تالیم نێین؟ وەلێ ئیوه ئورشەلیم له تالیمیلدان پڕ کردينه و تواین خوین ئی پیا بخینه مل ئیمه.»

²⁹ پتروس و ڕەسولەگان جواو دان: «باێه گوش له خودا بتەکنیم نه له ئنسان.

³⁰ خوداێ باپیریلمان، عیسا زنیەو کردێه، ئەیو که ئیوه وه سەلیب کیشاین و کوشتینێ،

³¹ خودا ئەیو کرده گەورا و نجات دەر و بەرزێەو کرده دەس ڕاس خوەێ، تا قەوم ئێسرائیل ئی دەرفەته بیاشتون که توبه بکەن و گونایلێان بوەخشرێد.

³² جا ئیمه شاێەتیل ئی چشتیلیمنه، هەر ئەوجورەکە روح‌القودوسیش هەس که خودا کردێەسەێ خەڵاتی ئەوانه که گوشە لێ تەکنن.»

³³ وەختێ ئی قسیەيله شنەفتن ئەوجورە توڕه بین که تواسیان بکوشنێان.

³⁴ وەلێ پیاێگ له فرقەێ فەریسی وه ناو گامالائیل که ماموستاێ تەورات بی و گشت حرمەتی گردیان، وەناو شورا هەڵساد و دەستور دا ڕەسولەگان ئەڕا ماوەێ کەمێگ بوەنه دەیشت.

³⁵ ئمجا وەپێان وەت: «ئێ پیاێل ئێسرائیل، هوشدان بود که وەگەرد ئی ئایەمیله تواین چه بکێن.

³⁶ چەن وەخت پێش، پیاێگ تئوداس ناو هەڵساد که خوەێ وه کەسێگ زانستیا، نزیک چوارسەد نەفەریش وه دەور خوەێ گردەو کرد. وەلێ ئەوه کوشریا و ئەوانه که کەفتوینه شونێ گشتێان تەفرتوینا بین.

³⁷ وەشونێ، له وەخت سەرژماری، یەهوداێ جەلیلی هەڵساد و قێرێ له مەردم کیشاده شون خوەێ. ئەویش له بین چی و گشت ئەوانه که کەفتوینه شونێ تەفرتوینا بین.

³⁸ جا له باوەت ئیەیشه ئاموژیاریدان کەم که کارێگ وەگەردێان نیاشتوین و وازه لێان بارن. چوینکه ئەگەر خاست و کردەوەێان له ئنسان بود، بێ گومان له بین چن.

³⁹ وەلێ ئەگەر له خودا بود، نیەتویەنین له بین بوەینیان، تەنانەت هاتێ وەگەرد خودا شەڕ کین!»

⁴⁰ جا قەبوڵ کردن و ڕەسولەگان چڕین، قەمچیان دان و نوایان گردن که دی وه ناو عیسا قسیەیگ نەکەن، ئمجا ڕزگاریان کردن.

⁴¹ ڕەسولەگان وه شادی لەلاێ ئاڵ شورا چینه دەیشت، چوینکه شایسه وه حساو هاتن که وەبونەێ ناو عیسا سوکەو بکریەن.

⁴² جا هەر چی ڕوژه وه مابەد و وه ماڵيل، له تالیم داین و مزگانی ئیه که عیسا هەر ئەو مەسیحەسه، دەس هەڵنەگردن.