کاریل ڕەسولەیل 4 - کتاب مقدس به زبان کردی جنوبی - گویش کلهوری

پتروس و یوحەنا وه نوای شوراێ جویلەکە

¹ هێمراێ پتروس و یوحەنا وەگەرد مەردم قسیه کردیان که کاهنيل و فەرماندەێ نگابانەگان مابەد و سەدوقیيل ڕشیانه سەریان.

² ئەوانه فره توڕه بین، چوینکه ڕەسولەگان وه مەردم تالیم دیان و جار دیان که زنیەو بین مردگیل وەناو عیساس.

³ جا گردنەێان و وەبونەێ ئیەک دەم ئێواره بی، تا ئی ڕوژەگەێ خستنیانه زندان.

⁴ وەلێ قێر فرەێگ لەلێان که پێخامەگه شنەفتوین، ئیمان هاوردن و ژمارەێ پیاگان ڕەسیه نزیک پەنج هەزار نەفەر.

⁵ ئی ڕوژەگەێ، گەوراێیل و شێخیل و ماموستایل تەورات وەناو شار ئورشەلیم وه دەور یەکا گردەو بین.

⁶ حەنا کاهن گەورا و قیافا و یوحەنا و ئەسکەنەر و گشت بنەماڵەگەێ کاهن گەورا وه ئەوره بین.

⁷ وەختێ پتروس و یوحەنا هیشتنه ناوڕاسیان، لەليان پرسین: «وه چ هێزێگ و چ ناوێگ ئی کاره کردینه؟»

⁸ ئمجا پتروس پڕ له روح‌القودوس بی، جواو دا: «ئێ گەوراێیل قەوم و شێخیل،

⁹ ئەگەر ئیمڕو وەبونەێ خاسێ له حەق پیاێ فەلەجێگ، پرسیاره لێمان کین که چوی شەفا گردێه،

¹⁰ جا گشت ئیوه و گشت قەوم ئێسرائیل بزانن، وه ناو عیسا مەسیح ناسریه که ئی پیا ساق و بێمزەڕەت وەنوادان وساس، وه ناو ئەیو که ئیوه وه سەلیب کیشاینێ، وەلێ خودا ئەیو له ناو مردگیل زنیەو کرد.

¹¹ ئی عیسا هەر ئەو کوچگەسه که ئیوه بەناگان ڕەدێ کردین و ئێرنگه بیەسه گرنگترین کوچگ بنەوا.

¹² وەناو هویچکەس بێجگه ئەیو نجات نیه، ئەڕا ئیه که له ژێر ئاسمان ناوێگ تر وه مەردم نێریاس تا وەگەردێ نجات پەێا بکێم.»

¹³ وەختێ ئەوانه ئازای پتروس و یوحەنا دین و زانستن که ئایەمیل نەخوەنریای و سادەێگن، سەریان سڕ مەن و زانستن که وەرجەوە هاوڕێیل عیسا بینه.

¹⁴ وەلێ وەختێ دین پیاێگ که شەفا گردوی وساسه لاێان، نەتویەنستن چشتێ بویشن.

¹⁵ ئمجا دەستور دان که له شورا بچنه دەیشت و خوێان نیشتنه مەشویرەت کردن.

¹⁶ وه یەکترەکی وەتن: «وەگەرد ئی پیاێله چه بکێم؟ چوینکه گشت نیشتەجێیل ئورشەلیم زانن که موجزەێگ ئاشکرا وه دەسێان ئەنجام گردێه و ئیمه نیەتویەنیم بێیمنه ژێرێ.

¹⁷ وەلێ تا له ئیه فرەتر وەناو قەوم نەکەفێده سەر زوان، هەڕەشه لێان بکێم که دی لەلاێ هویچکەس باس ئی ناوه نەکەن.»

¹⁸ ئمجا ئەوانه چڕین و دەستور دان که هەراێهەر وه ناو عیسا چشتێگ نویشن و کەسێگیش تالیم نیەن.

¹⁹ وەلێ پتروس و یوحەنا جواو دان: «له لاێ خوداوه کامێان درستره، له ئیوه گوش بتەکنیم یا له خودا؟ خوەدان داوەری بکێن.

²⁰ ئەڕا ئیه که ئیمه نیەتویەنیم ئەو چشته دیمنه و شنەفتیمنه، نویشیمنەێ.»

²¹ وەشون هەرەشەیل فرەێگ ڕزگاریان کردن و ڕێیگ پەێا نەکردن سزاێان بێەن، ئەڕا ئیه که گشت مەردم وەبونەێ ئەو چشته که هەڵکەفتوی، ستایش خودا کردیان.

²² پیاێ که وه موجزه شەفا گردوی، فرەتر له چل ساڵ داشت.

دوعای ئیمانداریل

²³ پتروس و یوحەنا وەشون ڕزگاری، چینه ئەڕا لاێ هاوڕێیلیان و ئەو چشته که گەوراێیل کاهنيل و شێخیل وەپێان وەتوین، وەتنەو.

²⁴ وەختێ هاوڕێیل ئیه شنەفتن، گشتێان وه یەێ دەنگ وه دەرگاێ خودا دوعا کردن، وەتن: «ئێ خوداوەند هەر بەرز، که ئاسمان و زەوی و دەریا و هەر چی که ها ناوێان درس کردیده،

²⁵ تو له ڕێ روح‌القودوس له زوان باپیرمان، خزمەتکارد داود پادشا، فەرمایش کردی: «”ئەڕا چه قەومیل شوڕش کەن و مەردم نەخشەێ پویچ کیشن؟

²⁶ پادشایل زەوی ڕز کیشن و فەرمانرەواییل وه دەور یەکەو گردەو بون، وه زد خوداوەند و وه زد مەسیح ئەیو.“

²⁷ وه ڕاسی هەر وەناو ئی شاره، هیرودیس و پونتیوس پیلاتوس و ناجویلەکەیل و قەوم ئێسرائیل وه زد خزمەتکار موقەدەسد عیسا که مەسح و دەسنیشانێ کردی، دەسەویەکی کردن،

²⁸ تا ئەو چشته که دەس توی و خاست خوەد که وەرجەوە دیاری کردوید، وه دی بارن.

²⁹ ئێرنگه، ئێ خوداوەند، بنوڕه هەرەشەیلێانەو، تویەنایی بیه خزمەتکارەگاند تا کەڵامد وه ئازای تەمام بویشن،

³⁰ هەرئیجوره دەسد ئەڕا شەفا دریژەو بکه و نیشانەیل و موجزەیل وه ناو خزمەتکار موقەدەسد عیسا ئاشکرا بکه.»

³¹ وەختێ دوعا کردن، ئەو شونه که وەناوێ گردەو بوین کەفته ڕکه و گشتێان له روح‌القودوس پڕ بین و وه ئازای کەڵام خودا وەتیان.

هاوبەشی ئیمانداریل وەناو دارایی یەکترەکی

³² گشت کەسیلێ که ئیمان هاوردوین یەێ دڵ و یەێ گیان بین، هویچکەسیش نەوەتیاد چشتێ له دارایەگەێ هن خوێه، بەڵکەم وەناو گشت چشتێگ وەگەرد یەکا هاوبەش بین.

³³ ڕەسولەیل وه هێز فره گەوراێگ شاێەتی زنیەو بوین خوداوەند عیسا دیان و فیز گەوراێگ وه سەر گشتێانەو بی.

³⁴ هویچ کەسێگ وەناوێان موختاج نوی، چوینکه هەر کەس زەوی یا ماڵێگ داشت، فروتیادێ و پویلەگەێ

³⁵ وه نوای پاێ ڕەسولەیل هیشتیاد تا وه پێ هەوەجی هەر کەس بەشەو بکرێ.

³⁶ یوسفیش که له هوز لاوی له مەردم قپرس بی و ڕەسولەیل وەتیانه پێ بەرنابا که وه ماناێ ’کوڕ هاندەر‘ بی،

³⁷ زەویزارێگ که داشت، فروتەێ و پویلەگەێ هاورد و نادێ نوای پاێ ڕەسولەیل.