کاریل ڕەسولەیل 27 - کتاب مقدس به زبان کردی جنوبی - گویش کلهوری

پولوس له ڕێ دەریاوه چوده ئەڕا روم

¹ وەختێ بیه ئیه که له ڕێ دەریا بچیمنه ئەڕا وڵات ئیتالیا، پولوس و بڕێگتر له زندانییل دانه دەس ئەفسەرێگ یولیوس ناو، له گوردان سەڵتەنەتی قیسەر.

² جا سوار کەشتیێگ بیمن که له ئەدرامیتینوس هاتیاد و چیاده ئەڕا چەن بەندەر له ناوچەێ ئاسیا و کەفتیمنه ڕێ. ئاریستارخوس مەقدونی وەگەردمانەو بی که له مەردمیل تسالونیکی بی.

³ ئی ڕوژەگەێ ڕەسیمنه شار سیدون. یولیوس وه پولوس لوتف داشت و هیشت بچوده ئەڕا لاێ ڕەفیقەیلێ تا هەوەجییلێ پەرچەو بکەن.

⁴ وه ئەوره وەدواره کەفتیمنه ڕێ و وه پەناێ جەزیرەی قپرس شونێگ که نوای وا گردیاد، چیمن، چوینکه وا وه پێچەوانەێ ئیمه هەڵکردیاد.

⁵ وەشون ئیه که له بەندەریل کیلیکیه و پامفیلیه ڕەد بویمن، وه بەندەر میرا، وەناو شار لیکیه داوەزیمن.

⁶ وه ئەوره ئەفسەر رومیەگه کەشتێگ پەێا کرد که له شار ئەسکەنەریە چیاده ئەڕا وڵات ئیتالیا، ئیمەیش سوارێ کرد.

⁷ ڕوژیل فرەێگ کەشتیەگه وه نەرمەنەرم چیاد و وه زامەت ڕەسیمنه بەندەر کنیدوس. چوینکه وا وه پێچەوانەێ ئیمه هەڵکردیاد، وه پەناێ جەزیرەی کرت، تا ڕوی وه ڕوی شار سالمونی چیمنه نوا.

⁸ وه زامەت وه ئەوره ڕەد بویمن و ڕەسیمنه شونێگ وه نزیکی شار لاسائیه وه ناو ’بەندەریل خاس‘.

⁹ ماوەێ فرەێگ له دەس چوی و ئێرنگه گەردیان دەریایی له ئی وەخت ساڵه خەتەرناک بی. چوینکه تەنانەت له ڕوژیل ڕوژەیش گوزیشتوی، جا پولوس هەڕەشه لێان کرد و

¹⁰ وەت: «پیاێل، تویەنم بوینم که گەردیان پڕ خەتەرێگ ها نوامان، نه تەنیا زیان فرەێگ وه کەشتی و بارەگەی، بەڵکەم وه گیانمانیش رەسنێد.»

¹¹ وەلێ ئەفسەر رومیەگه وه قسیەيل ناخودا و ساێو کەشتیەگه فرەتر گوش تەکانیاد تا وه قسیەيل پولوس.

¹² وەبونەێ ئیه که ئەو بەندەره ئەڕا گوزەران زمسان خاس نوی، فێشترێان وەتن بکەفیمنه ڕێ وەرەو دەریا وه ئی ئمیده که برەسنه بەندەر فینیکس و زمسان وه ئەوره بێەنه سەر. ئی بەندەره وەناو جەزیرەی کرت بی و ڕوی وەرەو باشور ڕوژئاوا و هەر ئیجوره باکور ڕوژئاوا بی.

واهێڵان دەریا

¹³ وەختێ وای نەرمیگ له باشور هەڵکرد، گومان کردن وه مراێ دڵیان ڕەسینه؛ جا لەنگەرەگه کیشان و وه نزیک لیوەێ کرت چینه نوا.

¹⁴ وەلێ فره وه دریژا نەکیشا که وای فره تنێگ، ماروف وه وای باکور ڕوژهەڵات، له جەزیرەوه وەرەو ئیمه هەڵکرد.

¹⁵ کەشتیەگه تویش واهێڵان هات و نەتویەنست وه پێچەوانەێ واگه بچوده نوا؛ وه ئی بونه، خوەمان دایمنه دەس واهێڵانەگه و ئیمه وەگەرد خوێا برد.

¹⁶ واهێڵانەگه ئیمه وەرەو پەناێ جەزیرەێ بویچگێگ برد که ناوێ کودا بی، وه زامەت تویەنسیم قایق نجات کەشتیەگه بخیمنه ژێر دەسمان.

¹⁷ وەختێ مەلەوانەگان هاوردنی بان عەرشەێ کەشتی، وەگەرد شریت دەور تا دەور کەشتیەگه قایم بەسان تا نەتویچیده یەکەو، وه ترس ئیه که نەخواێ کەشتیەگه وه تەنگای سیرتیس بنیشێه خەڕێ، لەنگەرەگه خستنه خوار، وه ئیجوره واهێڵان کەشتیەگه وەگەرد خوێەو برد.

¹⁸ له ئەوره که واهێڵانەگه تونترەو بی، ئی ڕوژەگەێ بار کەشتیەگه ڕشاننه ناو دەریا.

¹⁹ ڕوژ سێیەم، وه دەس خوێان ئەسپاو کەشتیەگه ڕشاننه ناو دەریا.

²⁰ ڕوژیل فرەێگ نه خوەر دوینیایمن و نه هەسارەیل، واهێڵانیش وه هێزەو هاتیاد، ئەوجورەکە گشتمان ئمید نجات وه دەس دایمن.

²¹ له ئەوره که ماوەێ فرەێگ بی چشتێ ئەڕا خواردن نیاشتن، پولوس وه ناوڕاسیان وساد و وەت: «پیاێل، ئیوه باێه وه قسیەیلم گوش بکردیاین و هەر له کرت بمەنیاین تا ئی هەمگه زیان نوینیاین.

²² ئێرنگەیش لاڵکمه پێدان جرئەتدان له دەس نێین، چوینکه کەسێگ گیانێ وه دەس نێید؛ تەنیا کەشتیەگه له کیس چود.

²³ ئەڕا ئیه که دویەشەو یەێ فریشتەێ خوداێگ که هن ئەوەم و پەرەسمێ، وساده لام و

²⁴ وەت: ”پولوس، ڕخد نەچود. تو باێه وه نوای قیسەر بوسێد و خودا گیان گشت ئەوانه که هانه گەردد بەخشیەسه تو.“

²⁵ جا ئێ پیاێل، دڵدان قورس بود، چوینکه وه خودا ئیمان دێرم که هەر ئەوجورە بود که وەپێم وەتێه.

²⁶ وەلێ کەشتیەگەمان باێه وەناو جەزیرەێگ بنیشێده خەڕێ.»

کەشتیەگه ورد خام بود

²⁷ شەو چواردەهم، هێمراێ واگه ئیمه وەناو دەریاێ ئادریاتیک بردیاده ئی لا ئەو لا، وه نسمه شەو مەلەوانەگان گومان کردن وه وشکای نزیکەو بون.

²⁸ جا قویلایی ئاوەگه ئەنازه گردن و دین چل متره. قێرێتر وەدواره ئەنازه گردن دین سی متره.

²⁹ وەبونەێ ئیه که زاورێان چیاد بخویمنه ناو تاش کەمەرەگان، له دویاوه چوار گله لەنگەر شوڕەو کردنه خوار و دوعا کردیان تا که زویتر ڕوژەو بود.

³⁰ مەلەوانەگان تواسیان له ناو کەشتیەگه دەر بچن، قایق نجاتەگه خستنه ناو دەریا، وه ئی دەسپێچکه که توان چەن گله لەنگەر له سینەێ کەشتیەگه شوڕەو بکەنه ناو دەریا.

³¹ پولوس وه ئەفسەرەگه و سەربازەگان وەت: «ئەگەر ئی پیاێله وەناو کەشتی نەمینن، نیەتویەنین نجات پەێا بکێن.»

³² جا سەربازەگان شریتیل قایق نجاتەگه بڕین و وێڵێ کردنه ناو دەریا.

³³ قێرێ وەرجه هەڵاتن خوەر، پولوس له گشتێان تواس تا چشتێ بخوەن. وەت: «ئیمڕو چوارده ڕوژه که چەوەڕێن و چشتێگ نەخواردینه.

³⁴ جا لاڵکمه پێدان چشتێ بخوەن، چوینکه ئەڕا زنی مەنندان، وەپێ هەوەجی دێرین. تاڵ مویگ له سەر هویچکامدان کەم نیود.»

³⁵ وەختێ ئیه وەت، یەێ تیکه نان هەڵگرد و وه نوای گشتێ سپاس خودا کرد و لەتی کرد و شرو کرده خواردن.

³⁶ جا گشتێان دڵگەرم بین و نان خواردن.

³⁷ گشتمان وەناو کەشتیەگه، دویس و هەفتا و شەش نەفەر بویمن.

³⁸ وەختێ تێر بین، باقی خەلەگان فڕه دانه ناو دەریا و کەشتیەگه سوکەو کردن.

³⁹ وەختێ ڕوژەو بی، مەلەوانەگان وشکایەگه نەناسین، وەلێ خەلیج بویچگیگ وەگەرد ساحل ماسەیی دین. تواسن ئەگەر بود کەشتیەگه بوەنه ناو خەڕێ.

⁴⁰ شریت لەنگەرەگان بڕین و وێڵێان کردنه ناو دەریا و شریتەگانیش که سوکان کەشتیەگه وەگەردیەو بەساوین واز کردن. ئمجا، بادبانەگان سینەێ کەشتیەگه هەڵوڕانن و واگه بردیانه ئەڕا ساحل.

⁴¹ وەلێ کەشتیەگه له تەنکایی ئاوەگه داده تاش کەمەریل ژێر ئاو و نیشته خەڕێ. نوای کەشتیەگه گیر کردوی و نەجولیاد، وەلێ وەبونەێ ئیه که تافەگان وه قایم دیانه لێ، دویاگەی شکیاده ناو یەکەو.

⁴² سەربازەگان تواسن زندانییل بکوشن نەخواێ کەسێگ مەله بکێ و دەر بچود.

⁴³ وەلێ ئەفسەر رومیەگه که تواسیا گیان پولوس نجات بێی، نوایان گرد و دەستور دا یەکم جار ئەوانه که تویەنن مەله بکەن، خوێان بخەنه ناو دەریا و برەسننه وشکای.

⁴⁴ ئەو باقییانیش باێه وەگەرد تەخته و تیکەیل کەشتی، خوێان برەسانیانه وشکای. وه ئیجوره گشتێان وه سڵامەت ڕەسینه وشکای.