کاریل ڕەسولەیل 26 - کتاب مقدس به زبان کردی جنوبی - گویش کلهوری

دەفای پولوس وه لاێ شا ئاگریپاس

¹ شا ئاگریپاس ڕوی کرده پولوس و وەت: «تویەنی له دەفا ئەڕا خوەد چشتێ بویشی.» ئمجا پولوس دەس دریژەو کرد و ئیجوره له خوەێ دەفا کرد:

² «ئێ شا ئاگریپاس، خوەم بەختەوەر زانم که ئیمڕو وه نوای ئیوه له باوەت گشت ئەو چشتیلی که جویلەکەیل بخت کردنەسه پێمەو، له خوەم دەفا بکەم.

³ فێشتر وه ئیه بەختەوەرم که تو وه گشت نەریت و ناکوکی جویلەکە ئاگاداری. جا لاڵکمه پێد وه سەورەو گوش بێیده قسیەیلم.

⁴ «جویلەکەیل گشتێان هەر له دەوران جوانیمەو خەوەره زنەیی مه دێرن، هەر له سەرەتایی زنەییمەو وەناو ملەت خوەم و له شار ئورشەلیم زنەیی کردمه.

⁵ ئەوانه هەر له زوی تا ئیسه مه ناسن و ئەگەر بتوان، تویەنن شاێەتی بێەن که من وه پێ سەخترین فرقەێ دینمان یانێ یەێ فەریسی، زنەیی کردمه.

⁶ ئێرنگەیش وەبونەێ ئمید وه ئەو چشته که خودا وه باپیریلمان وادەێ داس، دادگایی بوم.

⁷ ئیه هەر ئەو وادەێگه که دوانزه هوزمان ئمید دێرن بویننێ و له قوڕن دڵەو، شەو و ڕوژ دوعا ئەڕاێ کەن. ئێ پادشا، وەبونەێ ئی ئمیدەسه که جویلەکەیل بخته لێم کەن.

⁸ ئەڕا چه باێه ئەڕادان ئەڵاجوی بود که خودا مردگیل زنیەو کەێ؟

⁹ «منیش دڵنیا بیم که باێه وه هەر ڕێگەو وەگەرد ناو عیساێ ناسری دشمەنی بکەم.

¹⁰ منیش وه ئورشەلیم ئی کاره کردیام. ئی دەسڵاته له سەران کاهنيل گردم و فره له ئیمانداریل وه مەسیح خستیامه زندان و وەختێ وه مەرگ ماکومێان کردیان، وه زدێان رەی دیام.

¹¹ فره وەختیل وه گشت کەنیسەیل سزاێان دیام و تەقالا کردیام تا ناچار بون کفر بکەن. ئەوقره قینمه لێان هاتیاد که تەنانەت تا شاریل بیگانەیش کەفتیامه شونێان.

¹² «وه یەکی له ئی گەردیانیله، وەگەرد حوکم و دەسڵاتی که له سەران کاهنيل داشتم، چیمه ئەڕا شار دەمشق.

¹³ جا ئێ پادشا، نیمەڕو بی که وەناو ڕێ لەناکاوه نویرێگ له ئاسمانەو دیم، درەوشانتر له نویر خوەر له ئاسمانەو دەور و وەر من و هاوڕێەگانم ڕوشنایی خست.

¹⁴ گشتمان کەفتیمنه زەوی، ئمجا دەنگێگ شنەفتم که وه زوان عبرانییل وەپێم وەتیا: ”شائول، شائول، ئەڕا عەزاوم دەێ؟ لەقه کوتان وه بزماریل کار سەختێگه، ئەڕا ئیه که وە خوەد زیان رەسنێد!“

¹⁵ «منیش وەتم: ”خوداوەندا، تو کەێد؟“ «جا خوداوەند وەت: ”من هەر ئەو عیسامه که تو عەزاوێ دەێ.

¹⁶ وەلێ هەڵس و بوسیه سەر پاوه. وه ئی بونه وەپێد ئاشکرا بیمه تا تو بکەمه خزمەتکار و شاێەت خوەم، تا ئەڕا ئەو چشته که مه وەناوێ دیده و وه ئەو چشته که وەناوێ وەپێد ئاشکرا بوم، شاێەتی بێی.

¹⁷ له دەس قەومەگەد و له دەس ناجویلەکەیلێگ که تو کل کەمه ئەڕا لاێان ڕزگارد کەم

¹⁸ تا چەویلیان واز بکێ که له تیەریکی ئەڕا نویر و له هێز شەیتان ئەڕا لاێ خودا هەڵوگەردیەن، تا گونایلێان بوەخشرێید و وەناو ئەوانه که وەگەرد ئیمان وه من موقەدەسەو بینه، بەشێگ بیاشتون.“

¹⁹ «جا شا ئاگریپاس، له ئەو رویای ئاسمانیه مل چەفتەو نەکردمه.

²⁰ بەڵکەم یەکم جار ئەڕا نیشتەجێیل دەمشق، وەشونێ ئورشەلیم و گشت ناوچەێ یەهودیه، هەر ئیجوره لەناو ناجویلەکەیل جار دامه که باێه توبه بکەن و هەڵوگەردیەنه ئەڕا لاێ خودا و کردەوێ شایسەێ توبه بیاشتون.

²¹ وه ئی بونه بی که جویلەکەیل وەناو مابەد گردنەم و تواسن بکوشنەم.

²² وەلێ تا وه ئیمڕو، خودا مەیەتم داس و ئێرنگه وسامەسه ئێرا و وه گشتیەکی له ورد و زرو شاێەتی دەم. بێجگه ئەو چشته که پەێخەمەریل و موسای پەێخەمەر وەتنه که باێه هەڵبکەفێ چشتێ نەوەتم:

²³ ئیه که مەسیح باێه رەنج بکیشێ و یەکمین کەسێگ بود که له ناو مردگیل زنیەو بود، تا ڕوشنایی وه ئی قەوم و قەومیل تر جار بێی.»

²⁴ وەختێ پولوس وەگەرد ئی قسیەيله له خوەێ دەفا کردیاد، فستوس کردی هاوار: «پولوس، شێت بیده! زانیاری فره شێتد کردێه.»

²⁵ پولوس وەت: «شێت نیم، فستوس پایەبەرز، بەڵکەم هوش ها سەرم و قسیەێ ڕاس کەم.

²⁶ چوینکه پادشا خوەێ ئی چشتیله زانی و منیش وه ئازای وەگەردێ قسیه کەم، ئەڕا ئیه که باوەڕ دێرم هویچکام له ئیانه له وەر چەویان دویر نەمەنیه، چوینکه هویچکامێان وه دزیەو هەڵنەکەفتیه.

²⁷ شا ئاگریپاس، وه پەێخەمەریل باوەڕ دێرین؟ زانم که دێرین.»

²⁸ ئاگریپاس وه پولوس وەت: «وه ئی زویه تواێ مه قانێ بکێ تا بومه مەسیحی؟»

²⁹ پولوس وه جواوی وەت: «له خودا توام که دێر یا زوی، نه تەنیا ئیوه، بەڵکەم گشت کەسیلێ که ئیمڕو گوش دەنه مه، جور منه پێان باێ، هەڵبەت نه وەناو زنجیر!»

³⁰ ئمجا پادشا هەڵساد و فەرمانرەوا و برنیکی خویشکێ و ئەوانه که وه ئەوره بین وەگەردیەو هەڵسان و

³¹ وەحاڵێگەو که وەگەرد یەکترەکی قسیه کردیان دانه دەیشت و وەتیان: «ئی پیا کارێ نەکردیه که شایسەێ مردن بود.»

³² ئاگریپاس وه فستوس وەت: «ئەگەر ئی پیا له قیسەر داواکاری نەکردوی، بویاد هەر ئێرنگه ڕزگاری بکێ.»