کاریل ڕەسولەیل 25 - کتاب مقدس به زبان کردی جنوبی - گویش کلهوری

دادگایی وه لاێ فستوس

¹ فستوس سێ ڕوژ وەشون هاتنێ ئەڕا ناوچەگەێ خوەێ، له شار قیسەریه چیه ئەڕا شار ئورشەلیم.

² سەران کاهنيل و گەورایل جویلەکە داواکاریان وه زد پولوس هاوردنه ئەڕا لاێ و پاملێ بین و

³ له لێ تواسن لوتفه گەردیان بکێ و پولوس کل بکێ ئەڕا ئورشەلیم، ئەڕا ئیه که وەناو ڕێ کوڵ گردوین تا بکوشنێ.

⁴ فستوس جواو دا: «پولوس وه قیسەریه مابوسه و خوەم توام وه ئی زویه بچمه ئەڕا ئەوره.

⁵ ئمجا وەت، جا بیلن دەسڵاتداریل ناودان وەگەردمەو بان تا ئەگەر ئی پیا گوناێگ کردوی، بخته لێ بکەن.»

⁶ وەشون ئەوه که فستوس هەیشت تا ده ڕوژ وەگەردێانەو بی، چیه ئەڕا قیسەریه. ئی ڕوژەگەێ، دادگاگه خسته ڕێ و دەستور دا پولوس بارن.

⁷ وەختێ پولوس هاته ناو، جویلەکەیلی که له ئورشەلیم هاتوین، دەورێ گردن و بختیل قورس فرەێگ کردنه پێەو، وەلێ نەتویەنستن سابتێان بکەن.

⁸ ئمجا پولوس له خوەێ دەفا کرد: «هویچ خەتایگ وه زد شەریعەت جویلەکە یا وه زد مابەد یا وه زد قیسەر نەکردمه.»

⁹ وەلێ فستوس که تواسیا لوتف وه جویلەکەیل بکێ، وه پولوس وەت: «ئێ تواێ بچیده ئەڕا ئورشەلیم تا وه ئەوره لەنواێ منەو ئەڕا ئی بختیله، دادگایی بکرێی؟»

¹⁰ وەلێ پولوس وەت: «ئێرنگه وەناو دادگای قیسەر وسامه، که باێه وه ئێرا دادگایی بکریەم. ئیوه خوەدان خاس زانین که هویچ خەتایگ وه جویلەکەیل نەکردمه.

¹¹ ئەگەر خەتایگ کردمه که شایسەێ مردنم بود، له مردن ڕخم نیەچود. وەلێ ئەگەر ئەو چشتیله که ئیانه تاوانبارمه پێ کەن ڕاس نود، هویچکەس نیەتویەنی مه بیده دەسێان. داواکاریەگەم دەمه قیسەر.»

¹² فستوس وەشون هاوفکری وەگەرد شوراێ خوەێ، وەت: «داواکاریەگەد دایده قیسەر؟ خو چیدن ئەڕا لاێ قیسەر!»

هاوفکری فستوس وەگەرد ئاگریپاس

¹³ وەشون چەن ڕوژ، شا ئاگریپاس و برنیکی خویشکێ، هاتنه قیسەریه تا وه فستوس خوەش هاتن بویشن.

¹⁴ وەختێ چەن ڕوژ وه ئەوره مەنن، فستوس مەبەست پولوس هاورده لاێ پادشا و وەت: «پیاێگ ها ئێرا که فلیکس خستیەسەی زندان.

¹⁵ وەختێ چیمه ئەڕا ئورشەلیم، سەران کاهنيل و شێخیل جویلەکە بختیلێ کردنه پێ و داواێ ماکومیەتێ کردن.

¹⁶ «جا وەپێان وەتم نەریت رومیەگان ئیجوره نیه که بختچیێگ بێەنێ دەس بختکەرەگانێ، مەر ئیه که وەرجەوە ڕوی وه ڕویان بکەن تا دەرفەتێگ ئەڕا دەفا له خوەێ بیاشتود.

¹⁷ وەختێ وه ئێرا گردەو بوین، گت ئەڕاێ نەکردم، بەڵکەم ئی ڕوژەگەێ، دانیشتمه سەر کورسی داوەری و دادگاگه خستمه ڕێ و دەستور دام بارنێ ئەڕا لام.

¹⁸ وەختێ بختکەرەگانێ هەڵسان و وه زدیەو قسیه کردن، وه هویچکام له جرمیلی که مه چەوەڕێ بیم، نەتویەنستن تاوانبارێ بکەن.

¹⁹ بەڵکەم له باوەت دین خوێان و پیاێگ وه ناو عیسا که ئەوانه ئویشن مردگه، وەلێ پولوس ئویشێ زنەس، وەگەردێ ناکوکەو بین.

²⁰ من که نیەزانستیام چوی باێه وه ئیجور چشتیله بڕەسم، پرسیاره لێ کردم ئێ تواێ بچیده ئەڕا ئورشەلیم تا وه ئەوره ئەڕا ئی بختیله دادگایی بکرێید.

²¹ وەلێ چوینکه پولوس داوا کرد تا وەختێ ئمپراتور قیسەر دادگایی بکێ بمینێده ناو زندان، دەستور دام بیلنی تا وەختێ کلی بکەمه ئەڕا لاێ قیسەر.»

²² ئاگریپاس وه فستوس وەت: «توام خوەم قسیەیل ئی پیا بشنەفم.» وەت: «سو شنەفیدن.»

²³ ئی ڕوژەگەێ، ئاگریپاس و برنیکی خویشکێ، وه شکوی فرەێگەو هاتنه ناو تالار شارەگه و فەرماندەیل نزامی و پیا ناودارەگان شاریش وەگەردێانەو بین. ئمجا، فستوس دەستور دا پولوس بارنه ئەڕا لاێ.

²⁴ فستوس وەت: «ئێ شا ئاگریپاس و گشت ئەوانەێ که هاینه ئێرا! ئی پیا دوینین، ئیه کەسێگه که گشت مەردم جویلەکە چ وه ئورشەلیم و چ وه ئێرا له لێم تواسنه و دانەسه هاوار که نەبایه ئی پیا زنی بمینێ.

²⁵ وەلێ من وه ئیه رەسیم کارێ نەکردیه که سزاێ مردن بود. وەلێ وەبونەێ ئیه که داواکاریەگەێ داسه ئمپراتور، توام کلی بکەمه روم.

²⁶ وەلێ مه چشتێگ نێرم که وه دڵنیاییەو له باوەتێەو ئەڕا ئمپراتور بنویسم. جا ئەوه هاوردمەسێ ئەڕا لاێ گشتدان، فێشتر تەنیا له لاێ ئیوه، شا ئاگریپاس، تا بەڵکەم وەشون بازخواز، چشتێ ئەڕا نویساین بیاشتوم.

²⁷ چوینکه وه لاێ منەو عاقڵانه نیه که زندانیێگ کل بکەم بی ئەوه که چشتێ له باوەت بختیلێ بنویسم.»