کاریل ڕەسولەیل 24 - کتاب مقدس به زبان کردی جنوبی - گویش کلهوری

دادگایی له لاێ فلیکس

¹ وەشون پەنج ڕوژ، حەنانیا کاهن گەورا وەگەرد چەن نەفەر له شێخیل و وەکیلێگ ترتولوس ناو هاتنه ئەڕا شار قیسەریه و بختەگەیان وه زد پولوس دانه دەس فەرمانرەوا.

² وەختێ پولوس چڕین، ترتولوس ئیجوره دەس کرده بخت کردن و وەت: «ئێ فلیکس پایەبەرز، چوینکه زەمان فرەێگه له ژێر ساێەڕکی کاریل ئیوه وه ئاشتی و ئارامی تەمامێگ دەس پیا کردیمنه و ئاگادارێد له روژیل وەرەروی بایس خاسەو بوین وەزو حاڵ ئی ملەته بیه،

³ واجوه خوەمان زانیم که له هەر وەختێگ و له هەر شونێگەو، سپاسد بکێمن.

⁴ وەلێ ئەڕا ئیه که فێشتر له ئیه وەختدان نەگریم، لاڵکیمنه پێدان لوتفد وەگەردمان بود، گوش بێیده داواکاری کوڵ و کوڵبڕمان.

⁵ «ئیمه خاس دڵنیایم که ئی پیا، شەڕئاشو فتفاتکەرێگه که وەناو گشت جویلەکەیل سەرئانسەر جهان ئاژاوە خیده ڕێ. هەر ئیجوره وه سەردەسەیل فرقەێ ناسریه.

⁶ تەنانەت تەقالا کردیا وه مابەد بی حرمەتی بکێ، وەلێ ئیمه گردیمنەێ. تواسیم وه پێ شەریعەت خوەمان حوکمێ بێیم.

⁷ وەلێ لیسیاس فەرمانده هات وه زور له دەسمان دەرێ هاورد و

⁸ وه بختکەریلێ دەستور دا تا بانه ئەڕا لاد. ئێرنگه، ئەگەر خوەد بازخوازێ بکێ، ڕاسی بختەگەمان ئەڕادان ئاشکرا بود.»

⁹ جویلەکەیلیش وه یەکەو هەر چی وەتوی، مورێ کردن.

¹⁰ وەختێ فەرمانرەوا ئێشاره وه پولوس کرد تا قسیه بکێ، ئەوه ئیجوره جواو دا: «زانم ساڵیل فرەێگه که تو داوەر ئی ملەتیده، من وه خوەشیەو له خوەم دەفا کەم.

¹¹ ئیوه خوەدان تویەنین بزانین که له دوانزه ڕوژ فێشتر نیه ئەڕا پەرەسش چیمەسه شار ئورشەلیم،

¹² هویچکەس نێەسەم که وەناو مابەد وەگەرد کەسێگ مرافه بکەم و نه وه کەنیسه و نه وه هویچ شونێگ وه ئی شاره ئاژاوە بخەمه ناو مەردم.

¹³ ئیانه نیەتویەنن بختیلێگ کەنه پێما، سابت بکەن.

¹⁴ وەلێ له لاێ ئیوه ئێقرار کەم که وه پێ ڕێ رەوشتی که ئیانه ئویشنه پێ ’فرقەێ تازه‘، خوداێ باپیریلمان پەرەسش کەم. وه هەر چی که وەناو تەورات و کتاویل پەێخەمەریل نویسریاس، باوەڕ دێرم.

¹⁵ منیش هەر جور ئی پیاێله ئمید وه خودا دێرم که هەم ئایەمیل سالحان و هەم ئایەمیل ستەمکەر له مردگیل زنیەو بون.

¹⁶ جا من ئەڕا داشتن وژدانێگ پاک له لاێ خودا و مەردم تەقالا کەم.

¹⁷ «ئێرنگه وەشون ساڵیل فرەێگ، هاتمەسه ئەڕا ئورشەلیم تا ئەڕا ملەت خوەم سەدەقەیلی بوەم و قوروانی پیشکەش بکەم.

¹⁸ وەختێ ئی کاریله کردیام مه دین که خوەم وەناو مابەد نەریت پاکەو بوین وه جێ هاوردویم. نه خەوەرێ له جەماێەت بی و نه ئاژاوەێگ. وەلێ بڕێگ له جویلەکەیل ناوچەێ ئاسیا

¹⁹ وه ئەوره بین که باێه باتیانه ئەڕا لادان تا ئەگەر بختێگ وه منا بیاشتون، بویشنەو.

²⁰ یا ئیانه بویشن وەختێ وه نوای شورا وساویم، چ تاوانێگ له لێم دینه،

²¹ بێجگه ئیه که وەناوێان هاوار کردم: ”وەخاتر زنیەو بوین مردگیله که ئیمڕو وه لاێ ئیوه دادگایی بوم.“»

²² وەلێ فلیکس که له باوەت ئی ڕێ رەوشته وه خاسێ ئاگادار بی، دادگاگه خسته دویاوه و وەت: «وەختێ لیسیاس فەرمانده باێ، له باوەت ئیوه حوکم کەم.»

²³ ئمجا وه ئەفسەر کاروەدەسێ دەستور دا تا پولوس بخێده بێز چەو وەلێ ڕزگارییلێگ بیده پێ، کەسێگیش نوای ڕەفیقەیلێ نەگری تا هەوەجییلێ پەرچەو بکەن.

²⁴ وەشون چەن ڕوژ، فلیکس وەگەرد دروسیلاێ ژنی، که جویلەکە بی هات و کل کرده شون پولوس و له باوەت ئیمان وه مەسیح گوش داده قسیەیلی.

²⁵ وەختێ پولوس له باوەت سالح بوین و پارێزکاری و داوەری وەرەڕوی قسیه کرد، فلیکس هوڵ گردێ و وەت: «ئەڕا ئیسه بەسه دی! تویەنێ بچید. وەختێ دەرفەتێ پەێا بکەم خەوەرد کەم.»

²⁶ هەر ئیجوره، ئمیدوار بی پولوس ڕشوەت بیده پێ. وه ئی بونه، چەن جار کل کرده شونێ و وەگەردێ قسیه کردیاد.

²⁷ وەشون دو ساڵ، پورکیوس فستوس شونەگەێ فلیکس گرد. وەلێ فلیکس، که تواسیا دڵ جویلەکەیل وه دەس بارێ، پولوس هیشته ناو زندان.