کاریل ڕەسولەیل 22 - کتاب مقدس به زبان کردی جنوبی - گویش کلهوری

¹ «ئێ برایل و باوگیل، ئێرنگه گوش بێەنه دەفای که له خوەم کەم.»

² وەختێ شنەفتن وه زوان عبرانییل وەگەردێان قسیه کێ، بیدەنگترەو بین. ئمجا پولوس وەت:

³ «من پیاێگ جویلەکەم و ناو شار تارسوس کیلیکیه هاتمەسه دنیا. وەلێ وه ئی شاره گەوراوه بیمه. وه لاێ گامالائیل وه خاسێ وه پێ شەریعەت باپیریلمان تالیم گردمه و ئیمڕو جور گشتدان ئەڕا خودا غیرەت دێرم.

⁴ من ئەوانه که کەفتوینه شون ئی ڕێه تا سەر حەد مردن عەزاوێان دیام و چ پیا و چ ژن دەسگیر کردیام و خستیامیانه زندان.

⁵ کاهن گەورا و گشت شوراێ جویلەکە شاێەتی ئەڕام دەن، چوینکه له ئیانه نامەیلی ئەڕا برایلێان وه شار دەمشق گردم تا بچمه ئەوره و ئی مەردمیله وه دەس بەسریاێ بارمێانه شار ئورشەلیم تا سزاێان بوینن.

⁶ «وەختێ وەناو ڕێ بیم و نزیک دەمشقەو بویام، لەناکاوه نزیک نیمەڕو له ئاسمان نویریگ گەورا وه دەوروەرم درەوشیا.

⁷ کەفتمه زەوی و دەنگێگ شنەفتم که وەپێم وەتیا: ”شائول! شائول! ئەڕا عەزاوم دەێ؟“

⁸ «جواو دام: ”خوداوەندا، تو کەێد؟“ «وەپێم وەت: ”من عیساێ ناسرێم که تو عەزاوێ دەێ.“

⁹ ئەوانەێ که وەگەردمەو بین نویرەگه دین، وەلێ دەنگ ئەو کەسه که وەگەردمەو قسیه کردیا، نەشنەفتن.

¹⁰ «وەتم: ”خوداوەندا، چه بکەم؟“ «خوداوەند وەت: ”هەڵس بچوه ئەڕا دەمشق. وه ئەوره هەر چی که باێه بکێ، وەپێد ئویشریێ.“

¹¹ وەبونەێ درەوشیان ئەو نویره، نیەتویەنستیام بوینم. جا هاوڕێیلم دەسم گردن و بردنەمه ئەڕا دەمشق.

¹² «وەناو دەمشق پیاێگ خوداترس و پایبەن وه شەریعەت وه ناو حەنانیا زنەیی کردیاد، هەر ئیجوره گشت جویلەکەیل وه خاسێ ناوێ بردێان.

¹³ حەنانیا هاته ئەڕا لام و وەت: ”شائول برا! بیناوه بو!“ هەر ئەو ئانه، بینایی خوەم وه دەس هاوردم و ئەوه دیم.

¹⁴ «ئەوه وەت: ”خوداێ باپیریلمان تو هەڵوژاردیه تا خاست ئەوه بزانێ و ئەو سالحانه بوینی و قسیەیلی له دەمێ بشنەفێ.

¹⁵ چوینکه ئەڕا گشت مەردم، بویده شاێەت ئەیو، وە هەر چێ که دیده و شنەفتیدە، شاێەتی دەێ.

¹⁶ ئێرنگه ماتەڵ چەید؟ هەڵس و خوسڵ تەعمید بگر و گونايلد بشور و ناو ئەیو بار!“

¹⁷ «وەختێ هاتمەو ئەڕا ئورشەلیم، وەناو مابەد خەریک دوعا بیم که له هوش خوەم چیم و

¹⁸ خوداوەند دیم که وەپێم وەتیا: ”زویکه وه پەله له ئورشەلیم بیه دەیشت، چوینکه ئەوانه شاێەتی تو له باوەت مه قەبوڵ نیەکەن.“

¹⁹ «من وەتم: ”خوداوەندا، خوێان زانن که من چیامه گشت کەنیسەگان و ئەوانه که وه تو ئیمان داشتن، خستیامیانه زندان و خاس شەلەمرگێان کردیام.

²⁰ وەختێ خوین ئستیفان شاێەت تو ڕشانیان، من وه ئەوره وساویم و کردەوەێان مور کردم و دڵنگیل خوینکەریل پارێزیام.“

²¹ «ئەیو وەپێم وەت: ”بچو؛ کلد کەم ئەڕا جایل دویر، ئەڕا لاێ ناجویلەکەیل.“»

پولوس، شاروەند رومی

²² مەردم تا ئێرا گوشە پولوس دیان، وەلێ وەختێ ئیه وەت، دەنگ خوێان بەرزەو کردن و دانەێ هاوار: «بکوشنێ، ئیجور کەسێگ نەبایه وەبان زەوی بمینێ!»

²³ وه ئەو وەخته که هاوار کردیان و بەتیەگانێان وه بان سەریان خڕ دیان و خوڵ کردیانه هەوا،

²⁴ فەرماندەگه دەستور دا پولوس بوەنه ناو قەڵاگه و قەمچی بێەن و له لێ بپرسن تا مالوم بود وه چ باوەت ئیجوره ئەڕاێ هاوار کەن.

²⁵ وەختێ خەفاننی تا قەمچی بێەن، پولوس وه ئەفسەرێگ که وه ئەوره وساوی، وەت: «ئێ یاسا چو هیلێ یەێ نەفەر شاروەند روم قەمچی بیەین، وەختێ هێمراێ دادگایی نویه؟»

²⁶ ئەفسەرەگه وەختێ ئیه شنەفت، چیه لاێ فەرمانده و وەپێ وەت: «هویچ حالیده دێرێ چه کەی؟ ئی پیا شاروەند رومه!»

²⁷ فەرماندەگه هاته ئەڕا لاێ پولوس و له لێ پرسی: «بویش بزانم، ئێ شاروەند رومی؟» جواو دا: «بەڵێ.»

²⁸ ئمجا فەرماندەگه وەت: «مه ئەڕا ئیه که شاروەندی روم وه دەس بارم، پویل فرەێگ دامه.» پولوس وەت: «وەلێ مه وه شاروەندی روم هاتمەسه دنیا!»

²⁹ ئەوانه که تواسیان بازخوازێ بکەن، هەر ئەو ئانه خوێان کیشانه لا. فەرماندەیش فره زاورێ چوی، وەبونەێ ئیه که زانستوی یەێ نەفەر رومی دەسگیر کردێه.

پولوس وه نوای شوراێ جویلەکە

³⁰ وەلێ ئی ڕوژەگەێ، فەرماندەگه تواس بزانێ ئەڕا جویلەکەیل بخت کردنەسه پولوس، وازێ کرد و دەستور دا سەران کاهنيل و گشت شوراێ جویلەکە گردەو بون. ئمجا، پولوس هاورده خوار له لێ تواس وه نوایان بوسێ.