کاریل ڕەسولەیل 20 - کتاب مقدس به زبان کردی جنوبی - گویش کلهوری

گەردیان پولوس وه مەقدونیه و یونان

¹ وەختێ ئاژاوەگه خەفت، پولوس شاگردەگان چڕێ و وەشون ئیه که هانێان دا، وەگەردێان ماڵئاوایی کرد و وەرەو مقدونیه کەفته ڕێ.

² وەختێ له ئەو مەنتەقەیله ڕەد بویاد، وەگەرد قسیەيلێ ئیمانداریل فره دڵگەرمەو کردیا، تا ڕەسیه یونان و

³ سێ مانگ وه ئەوره مەن. وەختێ تواسیا وەگەرد کەشتی بچوده سوریه، جویلەکەیل ئەڕاێ نەخشه کیشان. جا تواس له ڕێ مقدونیه باێدەو.

⁴ هاوڕێیلی ئیانه بین: له مەردمیل شار بیریه سوپاتروس کوڕ پیرروس، له مەردمیل شار تسالونیکی ئاریستارخوس و سکوندوس، له مەردمیل شار دربه گایوس، له مەردمیل ناوچەێ ئاسیا تیخیکوس و تروفیموس و تیموتاوس.

⁵ ئەوانه وەرجه ئیمه چین و وەناو شار تروئاس چەوەڕێمان کردیان.

⁶ وەلێ ئیمه وەشون جەشن فەتیره، له شار فیلیپی سوار کەشتی بیمن و وەشون پەنج ڕوژ، وه بەندەر تروئاس ڕەسیمنه پێان و یەێ هەفته وه ئەوره مەنیمن.

بانگەوازی پولوس له تروئاس

⁷ وه یەکمین ڕوژ هەفته، ئەڕا نان ئێوارەێ موقەدەس وه دەور یەکا گردەو بیمن. پولوس ئەڕا مەردم بانگەوازی کردیا، چوینکه تواسیا ئی ڕوژەگەێ بچود، قسیەیلی تا نسمه شەو وه دریژا کیشا.

⁸ وه ئەو باڵاخانەێگ که وەناوێ گردەو بویمن، چراخ فرەێگ بی.

⁹ جوانێگ که ناوێ ئفتیخوس بی وەناو دەروەچەێگ دانيشتوی، هەر ئەوجورە که پولوس قسیه کردیاد، توزه توزه خەو قورسیگ گردێ، لەناکاوه له پوش سێیەم کەفته خوار، وەختێ هێزێ دان مردوی.

¹⁰ پولوس چیه خوار و خوەێ خسته ملێ و گردێ باوش و وەت: «ڕخدان نەچود، گیانێ دەر نەچیه!»

¹¹ ئمجا پولوس چیه بان و نان لەت کرد و خوارد. ئەوه تا شەوەکی شەفەق وەگەردێان قسیه کرد، وەشونێ وه ئەوره چی.

¹² مەردم ئەو جوانه زنی بردنێ ماڵ و له ئی باوەته گشتێان دڵنەوایی گردن.

¹³ وەلێ ئیمه سوار کەشتی بیمن و چیمنه ئەڕا بەندەر ئاسوس، تا هەر ئەوجورە که پولوس قەرار هیشتوی، ئەویش سوار کەشتی بکێم، چوینکه تواسیا له ڕێ وشکای تا ئەوره بچود.

¹⁴ جا وەختێ پولوس وه ئاسوس دیمن، سوار کەشتی کردیمنەێ و چیمنه ئەڕا بەندەر میتیلینی.

¹⁵ وه ئەوره وەگەرد کەشتی چیمن و ئی ڕوژەگەێ ڕەسیمنه ڕوی وه ڕوی جەزیرەی خیوس. ئەڕا ڕوژ دویم چیمنه جەزیرەی ساموس و ئی ڕوژەگەێ، ڕەسیمنه بەندەر میلیتوس.

¹⁶ چوینکه پولوس تواسیا له ڕێ دەریا له لاێ ئەفسوس ڕەد بود تا وەختەگەێ له ناوچەێ ئاسیا له دەس نێی، چوینکه پەله کردیاد ئەگەر بویاد، ڕوژ جەشن پنتیکاست وه شار ئورشەلیم بود.

¹⁷ پولوس له میلیتوس پێخامێگ ئەڕا ئەفسوس کل کرد و شێخیل کلیسا چڕیه لاێ خوەێ.

¹⁸ وەختێ هاتنه ئەڕا لاێ، وەپێان وەت: «ئیوه زانین که وه یەکمین ڕوژی که پا نامه ناوچەێ ئاسیا، گشت وەختیلێگ که وەگەرددان بیم وەناودان چوی زنەیی کردمه.

¹⁹ چوی وه بێ فیسی و ئەسر چەویلم خوداوەند خزمەت کردمه و سەختییلی که وەبونەێ دەس وه یەکی کردنیل جویلەکەیل هاتیەسه سەرم، تاموڵ کردمه.

²⁰ ئیوه زانين وه هەر چی که ئەڕادان فایده داشتیه دریخ نەکردمه، بەڵکەم پێخامەگه وەپێدان بانگەوازی کردمه، چ وەناو جەم و چ وەناو ماڵيلدان تالیمدان دامه.

²¹ هەم وه جویلەکەیل و هەم یونانیەگان شاێەتی دامه که باێه توبه بکەن و ڕوی بارنه خودا و ئیمان بارنه خوداوەند ئیمه عیسا مەسیح.

²² «ئێرنگه، روح خودا داسەمە وەر بچمه ئەڕا ئورشەلیم و نيەزانم وه ئەوره چه تێدە سەرم؛

²³ بێجگه ئیه که روح‌القودوس وه هەر شارێگ شاێەتیه پێم دەی که زندان و بەرد چەوەڕێمه.

²⁴ وەلێ هویچ قێرێگ ئەڕا گیان خوەم دانەنامه، تەنیا تاسەێ مه ئیەسه، ئەگەر بتویەنم دەور خوەم و خزمەتی که له خوداوەند عیسا گردمه، تا وه ئاخر برەسنم و وه ئینجیل فیز خودا شاێەتی بێەم.

²⁵ «ئێرنگه زانم هویچکام له ئیوه که وه ناودان گەردیمه و بانگەوازی پادشاێ خودا ئەڕادان کردمه، دی چەودانه ناو چەوم نیەکەفێ.

²⁶ جا ئیمڕو شاێەتی دەم و وەپێدان ئویشم که مه له خوین گشتدان بێتاوانم،

²⁷ چوینکه گشت کەڵام خودا بێ کەم کوتی ئەڕدان جار دامه.

²⁸ هوشدانه خوەدان و گشت ڕیەنێگ بود که روح‌القودوس ئیوه کردێەسه هێوەتکەر وه سەریان. شوانی کلیساێ خودا بکەن که وه خوین خوەێ سەندیەسێ.

²⁹ زانم وەشون ئیه که چیم، گورگێل دڕنه تیەنه ناودان، که بەزەیێان وه ڕیەنەگه نیەتێی.

³⁰ تەنانەت وەناو خوەدان کەسیلێگ پەێا بون که ڕاسی چەواشه کەن، تا شاگردیل بکەنه پێرەو خوێان و له ڕێ وه دەر بکەن.

³¹ جا هوشدان بود و له هویردان نەچود که من وه ماوەێ سێ ساڵ تەمام شەو و ڕوژ، وه ئەسر چەویلم وه ئاموژیاری کردن گشتدان نەوسامەسەو.

³² «ئێرنگه ئیوه سپارمه خودا و کەڵام فیز ئەیو، که تویەناس ئیوه وەناو ئیماندان بنێده سەر پاوه و بەەرکەتیلێ که میراتی ئیمانداریل وه مەسیحه، بوەخشێده پێدان.

³³ چەومه دەس کەسێگەو نویه تا نقره و تەڵا یا دڵنگێ بێیده پێم.

³⁴ خوەدان زانين که وه دەس خوەم، هەوەجییل خوەم و هاوڕێیلم پەرچەو کردمه.

³⁵ گشت جوری نیشاندان دامه که باێه رەنج و زامەت فرەێگ بکیشیم تا بتویەنیم دەستەنگیل مەیەت بێیم، قسیەيل خوداوەند عیسا وه هویرمان بود که خوەێ فەرمایش کرد: ”بەخشین له گرتن بەختەوەرتره.“»

³⁶ وەختێ قسیەیلی تەمام کرد، وەگەرد گشتێان زرانی دا و دوعا کرد.

³⁷ گشتێان تێر پڕ گیره کردیان و گردیانەێ باوشەو و ماچێ کردیان.

³⁸ ئەو چشته که فرەتر وه گشتێ خەمبارێان کردیا، ئی قسیەێ بی که وەت «دی چەودانه ناو چەوم نیەکەفێ.» ئمجا تا لاێ کەشتیەگه وەگەردیەو چین.