کاریل ڕەسولەیل 19 - کتاب مقدس به زبان کردی جنوبی - گویش کلهوری

پولوس له ئەفسوس

¹ ئەو وەخته که ئاپولوس وەناو شار قورنتوس بی، پولوس له مەنتەقەیل ناوەین، ڕەد بی و ڕەسیه شار ئەفسوس. وه ئەوره چەن نەفەر شاگرد پەێا کرد و

² له لێان پرسی: «ئێ وەختێ ئیمان هاوردین، روح‌القودوس گردینەوەر؟» وەتن: «ئیمه تەنانەت نەشنەفتیمنه که روح‌القودوس هەس.»

³ وەپێان وەت: «ئێ چ خوسڵ تەعمیدی گردینه؟» وەتن: «تەعمید یەحیا.»

⁴ پولوس وەت: «تەعمیدێگ که یەحیا دیاد، تەعمید توبه بی. ئەوه وه مەردم وەتیا ئیمان بارنه کەسێگ که وەشونیەو تێد، یانێ وه عیسا.»

⁵ وەختێ ئیه شنەفتن، وه ناو خوداوەند عیسا تەعمید گردن.

⁶ جا وەختێ پولوس دەس ناده ملێان، روح‌القودوس هاته سەریان و وه زوانیلتر قسیه کردن و نەبوەت کردن.

⁷ ئەو پیاێله، گشتێان نزیک دوانزه نەفەر بین.

⁸ ئمجا پولوس چیه ئەڕا کەنیسه و ئەوره سێ مانگ وه ئازای قسیه کردیاد و له باوەت پادشاێ خودا، مەردمەگه قانێ کردیاد.

⁹ وەلێ بڕێگیان کەلەڕەقی کردیان و نەچیانه ژێر بار و ئیمان ناوردیان و وه نوای مەردمەگه، وه ئی ڕێه خراو وەتیان. جا پولوس له لێان دویرەو گرد و شاگردیلێ وەگەرد خوەێ برد، هەر چی ڕوژه وه تالار تیرانوس خەریک قسیه و باس بی.

¹⁰ ئیه ئەڕا ماوەێ دو ساڵ بەردەوام بی، جورێ که گشت نیشتەجێیل ناوچەێ ئاسیا، چ جویلەکە و چ یونانی، کەڵام خوداوەند شنەفتن.

¹¹ خودا وه دەس پولوس موجزەیل سەر سڕ هاوەرێ کردیاد،

¹² ئەوجورە که مەردم دەسریل و پێشبەنیلی که خواردیانه قێ گیانێ، بردیانه ئەڕا نەخوەشیل و نەخوەشییلیان خاسەو بیاد و روحیل شەڕئاشو له لێان چیانه دەیشت.

¹³ ئمجا قێرێ له جنگریل دەورەگەرد جویلەکەیش تەقالا کردیان ناو خوداوەند عیسا ئەڕا کەسیلێ که روحیل شەڕئاشو ها ناوێان، وه کار بوەن. ئەوانه وەتیان: «وه ناو عیسا، ئەوه که پولوس له باوەتێ ئویشێ قەسەمدان دێم!»

¹⁴ هەفت کوڕیل ئسکیوا، یەکی له سەران کاهنيل جویلەکە، ئی کاره کردیان.

¹⁵ وەلێ روح شەڕئاشو جواویان دا: «عیسا ناسم، پولوسیش ناسم، وەلێ ئیوه کین؟»

¹⁶ جا پیاێگ که روح شەڕئاشو داشت پەلاماریان دا و وه سەر گشتێان زاڵ بی و جوری دا لێان که ڕویت و زامدار له ئەو ماڵه دەر چین.

¹⁷ ئی هەڵکەفته ڕەسیه گوش نیشتەجێیل ئەفسوس، چ جویلەکە و چ یونانی گشت خەوەردار بین، ترس هاته سەر گشتێان، جوری که فره حرمەت ناو خوداوەند عیسا گردیان.

¹⁸ هەرئیجوره فره له کەسیلێ که ئیمان هاوردوین، هاتنه نوا و ئاشکرا کارەگانێان وه زوان هاوردن.

¹⁹ قێر فرەێگ له لێان که وەرجەوە جادوکەری کردیان، کتاویلێان گردەو کردن و وه نوای چەو گشتیەکی سزاننێان. وەختێ نرخ کتاوەگان حساو کردن، پەنجا هەزار سکەێ نقره بی.

²⁰ هەر ئیجوره، کەڵام خوداوەند پەخشەو بویاد و قەوەت گردیاد.

²¹ جا لەشون ئی هەڵکەفتیلە، پولوس وە ڕێنمایی روح تواس تا له ڕێ مەقدونیه و ئەخائیه، بچوده ئەڕا شار ئورشەلیم. وەت: «وەشون ئیه که چیمه ئەوره، باێه سەرێگیش بێەمە روم.»

²² ئمجا دو نەفەر له یاریدەریلێ، تیموتاوس و ئراستوس کل کرد ئەڕا مەقدونیه و خوەێ قێرێ وه ناوچەێ ئاسیا مەن.

ئاژاوە وه ئەفسوس

²³ وه ئی زەمانه، وەبونەێ ئی ڕێه ئاژاوەێ گەوراێگ کەفته ڕێ.

²⁴ ئەڕا ئیه که نقرەکاریگ دیمیتریوس ناو، که پێکەریل نقرەیی له ئارتمیس درس کردیاد و له ئی ڕێه ئەڕا وساکاریل، کار خاس پڕ مەمەریگ گورجەو کردوی،

²⁵ ئمجا کارکەریل خوەێ و هاوکاریلێ گردەو کرد و وەپێان وەت: «پیاێل، زانين که دەوڵەمەنیمان له ئی کارەسه.

²⁶ ئەوجورە که دوینین و شنەفین، ئی پولوسه نه تەنیا وەناو ئەفسوس، بەڵکەم هەڵاێه وه سەرئانسەر ئاسیا، فرەێگ له مەردم قانێ کردێه و له ڕێ دەریان کردێه. ئەوه ئویشێ خودایل درس کریاێ وه دەس بەشەر، خودا نین.

²⁷ جا ئی خەتەره هەس که نه تەنیا کارەگەمان له رەونەق بکەفێ، بەڵکەم مابەد خوداێ گەورامان ئارتمیس هویچ وه حساو باێ و ئەوه که وه ئاسیا و سەرئانسەر جهان پەرەسیێد، گەورایی خوەێ له دەس بێی.»

²⁸ وەختێ ئیه شنەفتن، فره توڕه بین، هاوار کردن «گەوراس ئارتمیس ئەفسوسیێل!»

²⁹ ئاژاوە کەفته ناو گشت شارەگه! مەردم هویژم بردن و گایوس و ئاریستارخوس که له مەردم مەقدونیه و له هاوڕێیل پولوس بین، کڕاننێانه ناو تماشاخانەێ شار.

³⁰ وەلێ وەختێ پولوس تواسیا بچوده ناو جەماێەتەگه، شاگردەگان نەێشتن.

³¹ تەنانەت بڕێگ له گەورایل ئاسیا که له ڕەفیقەیلێ بین، پێخام ئەڕاێ کل کردن، لاڵکیانه پێ تا پا نەنێده ناو تماشاخانەێ شار.

³² جەماێەت سەره له لێان شێوێاوی. گشت هاوار کردیان هەر کەس چشتێ وەتیا و فره له لێان نيەزانستیان ئەڕا چه گردەو بینه.

³³ وەلێ بڕێگ گومان کردن ئەسکەنەر گشت کارەس، چوینکه جویلەکەیل ئەوه خستوینەی نوای جەماێەتەگه. ئەویش وه ئێشارەێ دەسەو، له مەردم تواس بیدەنگ بون و تەقالا کرد له لاێ جەماێەتەگه دەفا بکێ.

³⁴ وەلێ وەختێ مەردم فامین ئەوه جویلەکەس، گشتێ وه یەکەو، نزیک دو سات هاوار کردیان: «گەوراس ئارتمیس ئەفسوسیێل!»

³⁵ دەس ئاخر، داروخەێ شار جەماێەتەگه ئارام کرد و وەت: «ئێ پیاێل ئەفسوس، کیه که نەزانی شار ئەفسوس نگابان مابەد ئارتمیس گەورا و پێکەرەگەێ ئەوەسه که له ئاسمانەو هاتیەسه خوار؟

³⁶ جا وەختێ نیەود ئیانه حاشا کرد، باێه ئارام بوین و وه پەله کارێ نەکێن.

³⁷ ئی پیاێله که هاوردینەسه ئەڕا ئێرا، نه له مابەدەگەمان دزی کردنه و نه وه خودامان کفر کردنه.

³⁸ جا ئەگەر دیمیتریوس و هاوکاریل وساکارێ که هانه گەردێ بخت وه کەسێگ دێرن، دەر دادگا وازه و داوەریلیش هەن. تویەنن بختەگەیان بوەنه ئەڕا ئەوره.

³⁹ وەلێ ئەگەر داواێ چشتێ تر کین، باێه ناو جەلەسەێ ڕەسمی ئەنجومەن شار بخینێ یەک.

⁴⁰ چوینکه زاورم له ئەوه چود که وەبونەێ هەڵکەفتیل ئیمڕو، بخت شوڕش بکەنه پێمانەو. ئەگەر ئیجوره بود نیەتویەنیم مدوێگ ئەڕا ئی ئاژاوە باریم.»

⁴¹ ئیه وەت و جەماێەتەگه تەفرتوینا کرد.