کاریل ڕەسولەیل 17 - کتاب مقدس به زبان کردی جنوبی - گویش کلهوری

ئاژاوە وەناو تسالونیکی

¹ پولوس و سیلاس له شاریل ئامفیپولیس و ئاپولونیا گوزیشتن و هاتنه ئەڕا شار تسالونیکی که کەنیسەی جویلەکەیل وه ئەوره بی.

² پولوس وه پێ نەریت چیه ئەڕا کەنیسه و سێ ڕوژ شەبات که هەر ئەو شەمەێ موقەدەس جویلەکەیله، له کتاو موقەدەس وەگەردێان باس کردیاد و

³ ئەڕاێان شێو کردیاد و مدو هاوردیا که باێه مەسیح رەنج بکیشێد و له مردگیل زنیەو بود. ئەوه وەتیا: «ئی عیسا که ئەڕادان جاڕێ دام، هەر ئەو مەسیح وادەدریایەسه.»

⁴ بڕێگ له ئەوانه، هەر ئیجوره قێر فرەێگ له یونانیەگان خوداپەرەس و جەم گەوراێگ له ژنيل بەناوبانگ که ژمارەیانیش کەم نوی، قانێ بوین و له لاێ پولوس و سیلاس، ئیمان هاوردن.

⁵ وەلێ جویلەکەیل حەسویی کردن و چەن نەفەر له جکجاێەڵیل بازار وه دەور یەکەو گردەو کردن و وەناو شار ئاژاوەێگ خستنه ڕێ و هویژم بردنه دەر ماڵ یاسون تا پولوس و سیلاس بارنه ناو جەماێەتەگه.

⁶ وەختێ ئەوانه پەێا نەکردن، یاسون و قێرێ له برایلێان، کڕاننه لاێ دەسڵاتداریل شار و وه هاوار وەتن: «ئی پیاێله که دنیا شێواننەسه یەکا، ئێرنگه هاتنەسه ئێرا و

⁷ یاسون بردێەسێانه ئەڕا ماڵ خوەێ. ئیانه گشتێان له فەرمانیل قیسەر مل چەفتەو کەن و ئویشن پادشاێگ تر هەس وه ناو عیسا.»

⁸ وەختێ مەردم و دەسڵاتداریل شار ئیه شنەفتن، توڕه بین.

⁹ ئمجا له یاسون و ئەو باقیان گرەوی گردن و ڕزگاریان کردن.

پولوس و سیلاس له بیریه

¹⁰ برایل شەوەناو پولوس و سیلاس کل کردنه ئەڕا بیریه. ئەوانه وەختێ ڕەسینه ئەوره، چینه ئەڕا کەنیسەی جویلەکە.

¹¹ جویلەکەیل نیشتەجێ ئەوره له جویلەکەیل تسالونیکی نەجیم تر بین. ئەوانه کەڵام خودا وه تاسەوه قەبوڵ کردن و هەر ڕوژ وردەو بویانه کتاو موقەدەس تا وه ڕاسدرسی قسیەیل پولوس دڵنیا بون.

¹² هەر ئیجوره، قێر فرەێگ له جویلەکەیل و قێر فرەێگ له ژن و پیاێل بەناوبانگ یونانی ئیمان هاوردن.

¹³ وەلێ وەختێ جویلەکەیل تسالونیکی زانستن که پولوس وه بیریەیش کەڵام خودا بڵاو کێ، چینه ئەوره و مەردم گاڵدان و شێرێان کردن.

¹⁴ ئمجا برایل زویزی پولوس کل کردنه وەرەو لیوەێ دەریا، وەلێ سیلاس و تیموتاوس وه ئەوره مەنن.

¹⁵ هاوڕێیل پولوس تا شار ئاتن وەگەردیەو بین، وەشون ئەوه که ئەڕا سیلاس و تیموتاوس دەستور گردن که هەر چه زویتر خوێان برەسننه پولوس، وه ئەوره چین.

پولوس له ئاتن

¹⁶ وەختێ پولوس وەناو ئاتن چەوەڕێ ئەو دو نەفەره بی، له ئیه که دوینیاد شار پڕ له بتیله، فره پەشێو بی.

¹⁷ جا له کەنیسه وەگەرد جویلەکەیل و یونانیەگان خوداپەرەس هەر ئیجوره هەر ڕوژ وه مەێدان شار وەگەرد ڕێویاریل باس کردیا.

¹⁸ بڕێگ له فیلسوفیل فرقەیل ئپیکوری و ڕەواقییش وەگەردیەو باس کردیان. بڕێگیان وەتیان: «ئی وڕاوەکەره چه تواێ بویشی؟» بڕێگتریان وەتیان: «دیاره بانگەوازی ئەڕا خودایل بێگانه کەێ.» چوینکه پولوس، مزگانی عیسا و زنیەو بوین مردگیل دیاده پێان.

¹⁹ ئمجا گردنەێ و بردنێ ئەڕا چیاێگ وه ناو ئاریوپاگوس، شونێگ که مەردم وه ئەوره گردەو بویان، وه ئەوره وەپێ وەتن: «ئێ تویەنیم بزانیم ئی تالیم نوه چەس که تو باسێ کەی؟

²⁰ قسیەیلد وه گوش ئیمه ئەڵاجوی تێ. جا توایم بزانیم ماناێ چەس.»

²¹ گشت ئاتنیێل و غەریویلێگ که وه ئەوره زنەیی کردیان، بێجگه ئیه که وەخت خوێان وه باس کردن و شنەفتن له باوەت باوەڕیل تازه بێەنه سەر، کارێگ نیاشتن.

²² جا پولوس له ناوڕاس ’ئاریوپاگوس‘ وساد و وەت: «ئێ پیاێل ئاتنی، دوینم که له هەر باوەتەو فره دیندارین.

²³ وەختێ وەناو شار گەردیام و نوڕیامه ئەو چشته که پەرەسینێ، قوروانگاێگ دیمەو که وه ملێ نویسریاوی: ”پیشکەش وه خوداێ نەناسریای“. ئێرنگه، ئەو چشته که ئیوه نیەناسینێ و پەرەسینێ، ئەڕادان جار دەم.

²⁴ «خوداێگ که جهان و هەر چی که ها ناوێ وه دی هاورد، ساێو ئاسمان و زەویه و وەناو مابەدیل درس کریا وه دەس بەشەر نیشتەجێ نیود.

²⁵ دەسیل بەشەری نیەتویەنی خزمەتێگ وەپێ بکێ، جوری که هەوەجی بکەفێه چشتێ، چوینکه ئەوه خوەێ زنەیی و هناس و هەر چشتێگتر وه گشت ئایەمیل بەخشێد.

²⁶ ئەیو هەر ملەتێگ له بەشەر له یەێ ئنسان وه دی هاورد، تا وه سەرئانسەر زەوی نیشتەجێ بون؛ زەمانیل دیاری کریا و مەرز ئەڕا نیشتەجێ بوینیان داناس.

²⁷ تا مەردم مینێ خودا بکەن و هاتێ وەختێ مینێ کەن پەێاێ بکەن هەرچەن له هویچ کاممان دویر نیه.

²⁸ چوینکه وەناو ئەیوه که زنەیی کەیمن و جولێیمن و هیمن؛ ئەوجورە که بڕێگ وه شاعریلدان وەتنه: ”ئیمه له نەتەوەێ ئەوەیمنه.“

²⁹ «جا چوینکه نەتەوەێ خودایم، نەبایه ئیجوره فکر بکێم که خودا بوین جور تەڵا یا نقره یا کوچگیگه، که وەگەرد هونەر و تویەنایی ئایەم وێنەێ پێکەرێگ تاشیاوی.

³⁰ خودا وه جاران وه ڕوی ئیجور نەزانیگ چەوێ بەسیاد. وەلێ ئێرنگه وه گشت مەردم وه هەر شونێگ دەستور دەی که توبه بکەن.

³¹ چوینکه ڕوژیگ دیاری کردێه که وەناوێ له ڕێ پیاێگ که دەسنیشانێ کردێه، جهان داداپەروەرانه داوەری کەێ. جا وەگەرد زنیەو کردنێ له مردگیل، گشتیەکی له ئی کاره دڵنیاوه کردێه.»

³² وەختێ له باوەت زنیەو بوین مردگیل شنەفتن، بڕێگ بزگەخەنه دان، وەلێ بڕێگتر وەتن: «یەێ جارتر توایم لێ باوەته له لێد بشنەفیم.»

³³ وه ئیجوره پولوس له شورا چیه دەیشت.

³⁴ وەلێ چەن نەفەرێگ کەفتنه شونێ و ئیمان هاوردن. دیونیسیوس که یەکیگ له شوراێ ’ئاریوپاگوس‘ بی هەرئیجوره ژنێگ وه ناو داماریس و چەن نەفەرتریش له ئیانه بین.