کاریل ڕەسولەیل 16 - کتاب مقدس به زبان کردی جنوبی - گویش کلهوری

تیموتاوس وەگەرد پولوس و سیلاس

¹ پولوس هاته ئەڕا شاریل دربه و لستره. وه ئەوره شاگردێگ تیموتاوس ناو زنەیی کردیا، داڵگێ جویلەکە و ئیماندار بی، وەلێ باوگێ یونانی بی.

² برایل له شاریل لستره و قونیه، وه خاسێ ناوه لێ بردێان.

³ پولوس تواسیا وەگەرد خوێەو بویدەێ، جا وەبونەێ جویلەکەیلی که وه ئەو مەنتەقه زنەیی کردیان، خەتەنەێ کرد، ئەڕا ئیه که گشت زانستيان باوگێ یونانیە.

⁴ ئەوانه وەختێ شار وه شار چیان، دەستوریلێگ که ڕەسولەیل و شێخیل وه شار ئورشەلیم گردوین، سپاردیانه مەردم تا ئەوانه وه جێ بارنەێ.

⁵ جا کلیسایل وەناو ئیمان گیان گردیان و هەرچێ ڕوژه فرەترەو بویان.

رویای پولوس له باوەت پیاێ مەقدونی

⁶ وەختێ پولوس و هاوڕێەگانی له ناوچەێل فریجیه و غەلاتیه گوزیشتیان، روح‌القودوس ئەڕا رەسانن پێخام خودا وه ناوچەێ ئاسیا نوایان گرد.

⁷ وەختێ نزیک ناوچەێ میسیه بین، تەقالا کردن بچنه ئەڕا ناوچەێ بیتینیه، وەلێ روح عیسا نەێشتیان.

⁸ وه ئی بونه، له میسیه ڕەد بین و چینه شار تروئاس.

⁹ هەر ئەو شەوه، پولوس رویاێگ دی که پیاێگ مەقدونی وساسه نوای، لاڵکیاده پێ و وەتیا: «بەو ئەڕا مەقدونیه و مەیەتمان بیه.»

¹⁰ وەختێ ئی رویا دی، زویزی کەفتیمنه ڕێ وەرەو مەقدونیه، چوینکه دڵنیا بیمن که خودا دەنگمان کردێه تا وه ئەوانه مزگانی بێیم.

ئیمان هاوردن لیدیه وەناو فیلیپی

¹¹ جا، له بەندەر تروئاس وەگەرد کەشتی یەێ ڕاس چیمنه ئەڕا جەزیرەی ساموتراکی و ئی ڕوژەگەێ ڕەسیمنه شار نیاپولیس.

¹² له ئەوره چیمنه ئەڕا فیلیپی که یەکی له گرنگترین شاریل ناوچەێ مەقدونیه و ژێر دەس روم بی، چەن ڕوژیگ وه ئەو شاره مەنیمن.

¹³ ڕوژ شەبات که هەر ئەو شەمەێ موقەدەس جویلەکەیله، چیمنه دەیشت شار ئەڕا سەر چەمیگ، گومان کردیایم وه ئەوره شونێگ ئەڕا دوعا هەس. جا دانیشتیم و وەگەرد ژنیلێگ که گردەو بوین، قسیه کردیم.

¹⁴ یەکی له ئەوانه که گوش دیاد، ژنێگ خوداپەرەس وه ناو لیدیه له مەردم شار تیاتیرا بی و پارچەیل گران قیمەت ئەرخەوانی فروتیاد. خوداوەند دڵی واز کرد تا سەرنج بێیده قسیەیل پولوس.

¹⁵ لەشون ئیه که خوەێ و بنەماڵەگەێ خوسڵ تەعمید گردن، پاملمان بی و وەت: «ئەگەر باوەڕ دێرین که وه خوداوەند ئیمان هاوردمه، بان ئەڕا ماڵەگەم و له ئەوره بمینن.» دەس ئاخر قەبوڵ کردیم.

پولوس و سیلاس وەناو زندان

¹⁶ وەختێ چیایمنه ئەڕا شونێ که دوعا کردیایم، تەقیایمنه کەنیزێگ که روح پێشگویی داشت و وەگەرد فاڵبینی سود فرەێگ نسیو ئەرواوەگانێ کردیا.

¹⁷ ئەوه کەفتیاده شون ئیمه و پولوس و هاوار کردیاد: «ئی پیاێله، خزمەتکاریل خوداێ هەربەرزن و ڕێ نجات وەپێدان جار دەن.»

¹⁸ ئەوه ڕوژیل فرەێگ ئیجوره کردیا. دەس ئاخر پولوس تاقەت ناورد و هەڵوگەردێ و وه ئەو روحه وەت: «وه ناو عیسا مەسیح وەپێد دەستور دەم که له ئی دویەته باێده دەیشت!» هەر ئەو ئانه، روح له لێ هاته دەیشت.

¹⁹ وەلێ وەختێ ئەرواوەگان ئەو کەنیزه دین ئمید وه سودێان بڕیا، پولوس و سیلاس گردن و کڕاننێانه بازار ئەڕا لاێ دەسڵاتداریل.

²⁰ جا ئەوانه هاوردنه ئەڕا لاێ ماموریل رومی و وەتن: «ئی پیاێله جویلەکەن و شارەگەمان شێواننەسه یەکا.

²¹ نەریتێگ پەخشەو کەن که درس نیه ئیمه رومیەگان قەبوڵیان بکێمن و وه جێ باریمنێان.»

²² جەماێەت هویژم بردنه پێان و ماموریلیش دەستور دان دڵنگیلێان له وەرێان دەر بارن و وه چو کوتەڵ کویان بکەن.

²³ وەختێ خاس کوتەڵ کویان کردن و خستنیانه زندان، وه زندانبان دەستور دان خاس چەوێه پێانەو بود.

²⁴ زندانبان وەختێ ئیجوره دەستور گرد، فڕەیان دا ناو سیەچاڵەگه و پایلێان خسته ناو کوته دار.

²⁵ نزیک نیمەشەو، پولوس و سیلاس دوعا کردیان و ئەڕا ستایش خودا بەیت خوەنیان، زندانییل تریش گوش دیانه لێان،

²⁶ لەناکاوه زەویه لەرزەێگ فره گەورا ڕوی دا، ئەوجورە که بنەواێ زندانەگه کەفته لەرزه. جا زویزی گشت دەرەگان واز بین و زنجیرەگان گشتێان کەفتنه زەوی.

²⁷ وەختێ زندانبانەگه هاته خەوەر و دی دەریل زندان وازن، شمشێرەگەێ کیشا و تواسیا خوەێ بکوشێ، چوینکه فکر کردیا زندانییل دەر چینه.

²⁸ وەلێ پولوس وه دەنگ بەرز هاوار کرد، وەت: «بەڵاێگ ناره سەر خوەد، گشتمان هایمنه ئێرا!»

²⁹ زندانبان داواێ چراخێگ کرد و چیه ناو، وه ترس و لەرزەو کەفته مل پاێ پولوس و سیلاس.

³⁰ ئمجا، هاوردێانه دەیشت و پرسی: «گەورایلم، چه بکەم تا نجات پەێا بکەم؟»

³¹ جا وەتن: «وه خوداوەند عیسا مەسیح ئیمان بار که خوەد و ئاڵ ماڵەگەد نجات پەێا کين.»

³² جا پێخام خوداوەند ئەڕا خوەێ و گشت کەسیلێ که له ماڵەگەێ بین، وەتن.

³³ هەر ئەو ساته له شەو، زندانبان هاوردێانه دەیشت و زامیلێان شورد و زویزی خوەێ و گشت بنەماڵەگەێ خوسڵ تەعمید گردن.

³⁴ ئمجا بردێانه ئەڕا ماڵ خوەێ و سفرەێگ ئەڕاێان دا خست. خوەێ و گشت بنەماڵەگەێ وه بونەێ ئیه که ئیمان هاوردنه خودا دڵشادەو بوین.

³⁵ وەلێ وەختێ بیه ڕوژ، دەسڵاتداریل شار ماموریلێگ کل کردنه ئەڕا لاێ زندانبان، وەتن: «ئەو پیاێله ڕزگار بکه!»

³⁶ زندانبان، پولوس له ئی پێخامه ئاگادار کرد و وەت: «دەسڵاتداریل دەستور دانه که ڕزگاردان بکەم. جا ئێرنگه بانه دەیشت وه سڵامەت بچن.»

³⁷ وەلێ پولوس وەپێان وەت: «ئیمه که شاروەند رومیم، بی دادگایی وه نوای گشت کوتەڵ کومان کردن و خستنەمانه زندان. ئێرنگه توان وه دزیەو ڕزگارمان بکەن؟ هەراێهەر! بەڵکەم خوێان بان و له ئێرا بارنەمانە دەیشت.»

³⁸ ماموریل ئی قسیەیله وه دەسڵاتداریل وەتنەو، ئەوانیش وەختێ شنەفتن که پولوس و سیلاس شاروەند رومن، گەن جورێگ زاورێان چی.

³⁹ جا هاتن وەتن باێه بوەخشین و تا دەم دەر زندانەگه کەفتنه گەردیان و لاڵکیانه پێان له شارەگه بچنه دەیشت.

⁴⁰ وەختێ پولوس و سیلاس له زندان هاتنه دەیشت، چینه ماڵ لیدیه. وه ئەوره برایل ئیمانداریان دین و هانیان دان. ئمجا وه ئەوره چین.