کاریل ڕەسولەیل 15 - کتاب مقدس به زبان کردی جنوبی - گویش کلهوری

شوراێ ئورشەلیم

¹ بڕێگ له ناوچەێ یەهودیەوه هاتنه ئەڕا شار ئەنتاکیه و برایل تالیم دیان و وەتیان: «ئەگەر وه پێ نەریت موسای پەێخەمەر خەتەنه نوین، نیەتویەنین نجات پەێا بکێن.»

² جا وەشون ئەوه که پولوس و بەرنابا له نوایان وسان و باس و دەمقاڵ سەختێگ کردن، وه ئیه ڕەسین که پولوس و بەرنابا و چەن نەفەرتر لەليان بچنه ئەڕا شار ئورشەلیم ئەڕا لاێ ڕەسولەگان و شێخیل له ئەو باوەتەو پرسیارەلێان بکەن.

³ جا کلیسا ئەوانه کل کرد؛ وەختێ وەناو شاریل فینیقیه و سامره ڕەد بویان، وه ئەوره باس ئەوه کردن که چوی ناجویلەکەیلیش ئیمان هاوردن، ئی خەوەره گشت برایل شادەو کرد.

⁴ وەختێ ڕەسینه ئورشەلیم، کلیسا و ڕەسولەگان و شێخیل چینه پیریانەو. پولوس و بەرنابا هەر چی که خودا له ڕێ ئەوانه کردوی، وەپێان وەتنەو.

⁵ وەلێ قێرێ له فرقەێ فەریسیل که ئیمان هاوردوین، هەڵسان وەتن: «ئی ناجویلەکەیله باێه خەتەنه کرد و حوکم بیمنه پێان که شەریعەت موسا بپارێزنن.»

⁶ جا ڕەسولەگان و شێخیل گردەو بین تا ئی کاره سەرسامان بێەن.

⁷ وەشون ئیه که باس فرەێگ کردن، دەس ئاخر پتروس هەڵساد و وەپێان وەت: «ئێ برایل، ئیوه زانین که ماوەێگ پێش، خودا مه وەناودان هەڵوژارد تا ناجویلەکەیل له زوان من پێخام ئینجیل بشنەفن و ئیمان بارن.

⁸ خوداێگ که زانی چه ها ناو دڵ گشتیەکی، شاێەتی ئەڕاێان دا و روح‌القودوس بەخشیه پێان، هەر ئەوجورەکە وه ئیمەیش بەخشی.

⁹ ئەیو وەناو ئیمه و ئەوانه هویچ جیاوازێگ نەنا، بەڵکەم وه ئیمان، دڵیلێان پاکەو کرد.

¹⁰ جا ئیسه ئەڕا چه خودا ئەزمون کين و هویەێگ خینه مل شاگردیل که نه باپیریلمان و نه خوەمان تویەنسیم هەڵێ بگریمن؟

¹¹ وەلێ ئیمه ئیمان دێریم که وه فیز خوداوەند عیساس که نجات پەێا کردیمنه، ئەوانیش هەر ئیجوره.»

¹² ئمجا گشت جەماێەتەگه بیدەنگ بین و گوش دانه بەرنابا و پولوس که وەتیان خودا وه دەس ئەوانه وەناو ناجویلەکەیل چ نیشانەیل و موجزەیلێ ئاشکرا کردوی.

¹³ وەختێ قسیەيلیان تەمام بی، یاقوب وەت: «ئێ برایل، گوش بێەنه مه!

¹⁴ شەمعون پتروس وەت که چوی ئەڕا یەکم جار ناجویلەکەیل پەسەن خودا هاتن و وەناوێان قەومێگ ئەڕا خوەێ هەڵوژاردێه.

¹⁵ هەر ئەوجورەکە وەناو کتاو ئاموس پەێخەمەر، نویسریاس:

¹⁶ «”وەشون ئیه، تیەمەو دەوار ڕمیای داود پادشا وه دواره هەڵدەم؛ وێرانیێلیشێ یەێ جارتر بنیاد نەم و ئەوه وه سەر نو هەڵیدەم،

¹⁷ تا ئەو باقی بەشەر مینێ خوداوەند بکەن، گشت ناجویلەکەیلێگ که ناو من ها ملێانەو. ئیه فەرمایش خوداوەنده، ئەیو که ئی کاریله کەێد،

¹⁸ کاریلێگ که له جارانەو مالوم بوی.“

¹⁹ «جا من ئویشم خاستر ئیەسه ناجویلەکەیلێگ که هەڵوگەردیەنه ئەڕا لاێ خودا، زامەتێان نێیم.

²⁰ بەڵکەم باێه ئەڕاێان بنویسیم که له چشتیلی که وەخاتر پیشکەشی وه بتیل ناپاکەو بینه و له خیزی و گوشت گیانەوەریل خنکریای و خوین، دویرێ بکەن.

²¹ ئەڕا ئیه که موسا هەر له جارانەو وەناو هەر شارێگ کەسیلێگ داشتیه تا وەپێ بانگەوازی بکەن، هەر ئەوجورە که هەر شەبات که هەر ئەو روژ شەمەێ موقەدەس جویلەکەیله، نویسریایلی وەناو کەنیسەيل خوەنریەد.»

نامەێ شورا وه ئیمانداریل ناجویلەکه

²² ئمجا ڕەسولەیل و شێخیل وەگەرد گشت کلیسا کەفتنه یەکا تا له ناو خوێان پیایلی دیاری بکەن و وەگەرد پولوس و بەرنابا کلێان بکەنه ئەڕا شار ئەنتاکیه. جا یەهوداێ ماروف وه بەرسابا و سیلاس که وەناو برایل جیگەێ ڕابەری داشتن، هەڵوژاردن.

²³ ئمجا ئیجور نامەێگ نویسان و دانه دەسێان: «له ئیمه ڕەسولەیل و شێخیل، برایل ئیوه، وه برایل ناجویلەکەێ ئەنتاکیه و سوریه و کیلیکیه، سڵام!

²⁴ شنەفتیمنه کەسیلێ له ناومان، بی ئەوه که دەستورێگ له ئیمه بیاشتوین، هاتنه و ئیوه وەگەرد قسیەیلیان پەشێو کردنه و سەره لێدان شێواننه.

²⁵ جا ئیمه یەێ دڵ کەفتیمنه یەکا تا پیایلی دیاری بکێمن و وەگەرد عەزیزەیلمان یانێ بەرنابا و پولوس، کلێان بکێم ئەڕا لادان،

²⁶ ئیانه که وەبونەێ ناو خوداوەندمان عیسا مەسیح، گیانێان خستنەسه خەتەر.

²⁷ جا یەهودا و سیلاس کل کردیم تا هەر ئەو چشتیله وه زوان ئەڕادان بویشن.

²⁸ روح‌القودوس و ئیمه ئیه خاس زانستیم که هویچ بار قورسیگ نەخیمنه سەر کوڵدان، بێجگه ئی چشتیل واجوه که

²⁹ خوەدان له هەر چشتێگ که ئەڕا بتیل پیشکەش کریاس و خوین و گوشت گیانەوەریل خنکریای و خیزی، دویرەو بکەن. هەر وەخت له ئی چشتیله پارێز کردین، کار خاسێگ کردینه. ماڵئاوا.»

³⁰ جا ئەوانه کەفتنه ڕێ، چینه ئەڕا ئەنتاکیه و وه ئەوره کلیسا وه دەور یەکەو گردەو کردن و نامەگه دانه پێان.

³¹ وەختێ نامەگه خوەنین، له ئەو پێخام دڵگەرمکەره، دڵشادەو بین.

³² یەهودا و سیلاسیش که نەبوەتکەر بین، وەگەرد قسیەيل فرەێگ، برایل هاندان و وه قەوەتیانەو کردن.

³³ جا قێرێ له ئەوره مەنن، ئمجا براگان وه سڵامەتی خستنیانه ڕێ تا بچنه ئەڕا لاێ ئەوانه که کلێان کردوین.

³⁴ وەلێ پولوس و بەرنابا وه ئەنتاکیه مەنن.

³⁵ جا وەگەرد قێر فرەێگتر خەریک تالیم و مزگانی دان کەڵام خوداوەند بین.

ناکوکی له بین پولوس و بەرنابا

³⁶ وەشون چەن ڕوژ، پولوس وه بەرنابا وەت: «با بچیمنەو ئەڕا شاریلێگ که کەڵام خوداوەند وەناوێان بانگەوازی کردیم و سەرێ بێیمنه براگان و وەزو حاڵیان بزانیم.»

³⁷ بەرنابا تواس یوحەناێ ماروف وه مەرقوسیش وەگەرد خوەێ بوەید،

³⁸ وەلێ پولوس خاس نەزانست کەسێگ که له پامفیلیه ئەوانه هیشتەجێ و تا ئاخر کار وەگەردێان نەمەن، یەێ جارتر وەگەرد خوەێ بوەی.

³⁹ بیه دەمقاڵیان ئەوجورە که له یەکترەکی جیاوه بین. بەرنابا، مەرقوس وەگەرد خوەێ برد و له ڕێ دەریا چیه ئەڕا جەزیرەی قپرس؛

⁴⁰ وەلێ پولوس، سیلاس هەڵوژارد، وەشون ئیه که برایل سپاردنەێ دەس فیز خوداوەند، کەفته ڕێ.

⁴¹ پولوس له سەر ڕێ سوریه و کیلیکیه، کلیسایل وه قەوەتەو کردیا.