کاریل ڕەسولەیل 14 - کتاب مقدس به زبان کردی جنوبی - گویش کلهوری

پولوس و بەرنابا له قونیه

¹ وەناو شار قونیەیش پولوس و بەرنابا چینه ناو کەنیسەی جویلەکە و جورێ قسیه کردن که قێر فرەێگ له جویلەکەیل و یونانیەگان ئیمان هاوردن.

² وەلێ ئەو جویلەکەیله که ئیمان ناوردوین، ناجویلەکەیل گاڵدان و فکرێان له باوەت برایل، خراو کردن.

³ جا پولوس و بەرنابا ماوەێ فرەێگ وه ئەوره مەنن و وه ئازای له باوەت خوداوەند قسیه کردیان، خوداوەندێگ که وه ئەوانه هێز ئەنجام نیشانەیل و موجزەیل دیاد و وەئیجوره پێخام فیز خوەێ مور کردیاد.

⁴ مەردم شارەگه بینه دو دەسەوه؛ دەسەیگ هاتنه پشت جویلەکەیل و دەسەیگ چینه لاێ ڕەسولەیل.

⁵ وەختێ ناجویلەکەیل و جویلەکەیل وەگەرد گەورایلێان تواسن پولوس و بەرنابا سوکەو بکەن و کوچگوارانیان بکەن،

⁶ ڕەسولەگان خەوەردار بین و دەرچین ئەڕا لستره و دربه له شاریل لیکائونیه له مەنتەقەیل دەوروەرێ.

⁷ وه ئەوریشه خەوەر خوەش بانگەوازی کردیان.

پولوس و بەرنابا وەناو لستره و دربه

⁸ وه شار لستره پیاێگ دانيشتوی که نەتویەنسیا پایلێ بجویلنێد و هویچ وەخت ڕێ نەکردوی، چوینکه وه زگ داڵگ فەلەج بوی.

⁹ وەختێ پولوس قسیه کردیا، ئەوه گوش دیاد. پولوس چەو بڕیە پێ و دی که ئیمان شەفا گردن دێرێ.

¹⁰ وه دەنگ بەرزێگ وەپێ وەت: «وه مل پایلد ڕاس بوسیه!» ئەو پیا له جیەگەێ هەڵپەڕێ و کەفته ڕێ.

¹¹ وەختێ مەردم ئەو کار پولوسه دین، وه زوان لیکائونی هاوار کردن: «خودایل وه شێوەێ ئایەم هاتنەسه خوار ئەڕا لامان!»

¹² ئەوانه ناو بەرنابا نانه ’زئوس‘ و ناو پولوسیش نانه ’هرمس‘، چوینکه ئەوه قسیەکەرێان بی.

¹³ ئمجا کاهن زئوس که مابەدەگەێ درس وه دەیشت دەروازەێ شار بی، چەن گله گا وەگەرد تاجیل گوڵ هاورده ئەڕا دەروازەێ شار؛ ئەوه و جەماێەتەگه تواسیان قوروانی پیشکەشێان بکەن.

¹⁴ وەلێ وەختێ ڕەسولەگان، یانێ بەرنابا و پولوس، ئیه شنەفتن، دڵنگیل خوێان دڕانن و دەوینه ناو جەماێەتەگه و هاوار کردن:

¹⁵ «ئێ پیاێل، ئەڕا ئیجوره کەین؟ ئیمەیش جور ئیوه، ئایەمیم. ئیمه مزگانی دیمه پێدان که له ئی چشتیل پویچه دەس بکیشن و ڕوی بارینه خوداێ زنی که ئاسمان و زەوی و دەریا و هەر چی که ها ناوێ، وه دی هاوردێه.

¹⁶ وه نەتەوەیل جاران، ئەیو هیشت تا گشت ملەتیل وه ڕێیل خوێان بچن،

¹⁷ وەلێ خوەێ بی شاێەتی نەێشت؛ ئەیو وەگەرد هەناردن واران له ئاسمان و بەخشین وەرزیل پڕ بار، وەپێدان خاسێ کردێه، خواردەمەنی فرەێگ دەێده پێدان و دڵدانیش پڕ له خوەشی کەێ.»

¹⁸ دەس ئاخر وەگەرد ئی قسیەيله، وە زور تویەنسن نوای مەردمەگه بگرن تا قوروانی ئەڕاێان نەکەن.

¹⁹ وەلێ جویلەکەیلێگ له ئەنتاکیه و قونیه هاتن و مەردمەگه وەگەرد خوێان یەکی کردن و پولوس کوچگواران کردن و وه گومان ئیه که مردگه، له شار کڕاننەێ دەیشت.

²⁰ وەلێ وەختێ شاگردیل وه دەوریەو گردەو بوین، هەڵساد و هاتەو ئەڕا شار. ئی ڕوژەگەێ، وەگەرد بەرنابا چینه ئەڕا دربه.

هەڵەوگەردیان وه ئەنتاکیەێ سوریه

²¹ ئەوانه وه ئەو شاریشه مزگانی دان و قێر فرەێگ کردنه شاگرد. ئمجا هاتنەو ئەڕا لستره و قونیه و ئەنتاکیه.

²² وه ئەو شاریله شاگردیل وەقەوەتەو کردن تا وەناو ئیمانێان بەردەوام بمینن و وەتنه پێان که «باێه وه تاموڵ بەردیل فرەێگ وه پادشاێ خودا ڕێ پەێا بکێم.»

²³ وه هەر کلیساێگ پولوس و بەرنابا شێخیلێگ ئەڕا ئیمانداریل دیاری کردن، وه ڕوژه و دوعا ئەوانه سپاردنه دەس خوداوەندێگ که وەپێ ئیمان هاوردوین.

²⁴ ئمجا له ناوچەێ پیسیدیه ڕەد بین و چینه ئەڕا ناوچەێ پامفیلیه،

²⁵ وەختێ پێخام خودا وەناو پرجه جار دان، وه بەندەر ئاتالیه داوەزین.

²⁶ له ئاتالیه وەگەرد کەشتیەو چینه ئەنتاکیه، یانێ شونێ که وەبونەێ خزمەتێ که ئەنجام داوین، سپاردوینێانه دەس فیز خودا.

²⁷ وەختێ ڕەسینه ئەوره، کلیسا وه دەور یەکەو گردەو کردن و باس ئەو چشتیله کردن که خودا وەگەردێان کردوی، هەر ئیجوره که چوی دەر ئیمان ئەڕا ناجویلەکەیل واز کردێه.

²⁸ ئمجا ماوەێگ وه ئەوره وەگەرد شاگردیل مەنن.