کاریل ڕەسولەیل 13 - کتاب مقدس به زبان کردی جنوبی - گویش کلهوری

ماموریەت بەرنابا و سولوس

¹ وەناو کلیساێ شار ئەنتاکیه چەن گله نەبوەتکەر و ماموستا بین: بەرنابا، شەمعون ماروف وه نیجر، لوکیوس قیرەوانی، مانائن که له ڕەفیقەیل قەدیمی هیرودیس حاکم بی که له مناڵێ وەگەردیەو گەورا بوی وەگەرد شائول.

² وەختێ که ئەوانه خوداوەند پەرەسیان و وه ڕوژه بین، روح‌القودوس فەرمایش کرد: «بەرنابا و شائول ئەڕام جیاێانەو بکێن، ئەڕا کارێ که دەنگیان کردمه.»

³ ئمجا، وەشون ڕوژه و دوعا، دەس نانه سەریان و مەسح و دەسنیشانێان کردن و کلێان کردنه ئەڕا گەردیان.

خەوەر خوەش وه قپرس

⁴ ئەو دو نەفەره که روح‌القودوس کلێان کردوی، چینه ئەڕا شار سلوکیه و له ئەوریشه له ڕێ دەریاوه چینه ئەڕا جەزیرەی قپرس.

⁵ وەختێ ڕەسینه شار سەلامیس، پێخام خودا وەناو کەنیسەیل جویلەکە بانگەوازی کردن. یوحەنا که وەپێ وەتیان مەرقوس، یاریدەرێان بی.

⁶ ئەوانه سەرئانسەر جەزیرەگه دانه دەم پاوه تا ڕەسینه شار پافوس. وه ئەوره تەقیانه جادوکەرێگ جویلەکە وه ناو باریشوع که نەبوەتکەرێگ دروەکانی بی.

⁷ ئەوه وەگەرد ’سرگیوس پولوس‘ فەرمانرەوا، دوس بی. فەرمانرەوا که پیاێگ زانا بی، بەرنابا و شائول دەنگ کرد تا بانه ئەڕا لاێ چوینکه تواسیا پێخام خودا بشنەفێ.

⁸ وەلێ علیماس جادوکەر - که ماناێ ناوێ زانا بی - وه نوایان وساد و تەقالا کردیا تا نێلی فەرمانرەوا ئیمان بارێ.

⁹ وەلێ شائول، که وەپێ وەتیان پولوس، پڕ له روح‌القودوس بی، چەو بڕیە پێ و وەت:

¹⁰ «ئێ کوڕ شەیتان، ئێ دشمەن هەر چی سالح بوینه، که پڕ له فێڵ و فریوی! ئەڕا وه چەفت کردن ڕێیل ڕاس خوداوەند نیەوسیدەو؟

¹¹ ئەوەسه، بزان دەس خوداوەند وه زد تونه. ئێرنگه کور بوید و نیەتویەنی تا ماوەێگ خوەر بوینێد.» هەر ئەو ئانه، تەم و تیەریکی گردەێ وەر و خڕ خواردیاد و مینێ یەکیگ کردیاد تا دەسێ بگرێ و ڕێەگه نیشانی بێی.

¹² وەختێ فەرمانرەواگە دی چه هەڵکەفت، ئیمان هاورد، چوینکه له تالیمی که له باوەت خوداوەندەو دیان، سەری سڕ مەنوی.

پولوس و بەرنابا وەناو ئەنتاکیەێ پیسیدیه

¹³ ئمجا پولوس و هاوڕێەگانی له ڕێ دەریا له پافوس چینه ئەڕا شار پرجەێ پامفیلیه. وەلێ وه ئەوره یوحەنا که وەپێ وەتیان مەرقوس لەليان جیاوه بی و هەڵوگەردیا ئەڕا شار ئورشەلیم.

¹⁴ ئەوانه له پرجەوه ڕەد بین و ڕەسینه شار ئەنتاکیەێ پیسیدیه. وه ڕوژ شەبات که هەر ئەو شەمەێ موقەدەس جویلەکەیله، چینه ناو کەنیسه و دانیشتن.

¹⁵ لەشون خوەنین تەورات و کتاویل پەێخەمەریل، ڕابەریل کەنیسه کل کردنه ئەڕا لاێان و وەتن: «برایل، ئەگەر پێخامێگ ئەڕا ئاموژیاری ئی مەردمه دێرین، بویشن.»

¹⁶ جا پولوس هەڵساد و وه دەس ئێشاره کرد، وەت: «ئێ پیاێل ئێسرائیل و ئێ ناجویلەکەیل که له خودا ڕخدان چود، گوش بێەن!

¹⁷ خوداێ قەوم ئێسرائیل، باپیریلمان هەڵوژارد و له وەخت غەریویێان له خاک مسر، کردیانه قەوم گەوراێگ، ئمجا وه بازوێگ وەهێز له ئەو خاکه هاوردیانه دەیشت و

¹⁸ نزیک چل ساڵ له بیاوان ڕێ رەوشتیان تاموڵ کرد.

¹⁹ وەشون نابود کردن هەفت ملەتێگ که وه کەنعان بین، خاکەگەیان وه میراتی داده قەوم خوەێ.

²⁰ ئیه گشتێ نزیک چوارسەد و پەنجا ساڵ وه دریژا کیشا. «جا وەشون ئەوه، تا دەوران سەموئیل پەێخەمەر، خودا داوەریل دا پێان.

²¹ ئمجا داواێ پادشاێگ کردن و خودا، شائول کوڕ قیس، له هوز بنیامین دا پێان، که وه ماوەێ چل ساڵ پادشایی کرد.

²² وەشون لابردن شائول، داود کرده پادشا و ئیجوره ئەڕاێ شاێەتی دا: ”مه داود کوڕ یەسا دڵخواز خوەم دیم؛ ئەو هەر چی که مه توام، وه جێ تیەرێ.“

²³ «له نەتەوەێ ئی پیا، خودا هەر ئەوجورە که واده داوید، نجات دەر یانێ عیسا ئەڕا ئێسرائیل کل کرد.

²⁴ وەرجه هاتن عیسا، یەحیا خوسڵ تەعمید توبه وه گشت مەردم ئێسرائیل بانگەوازی کردیا.

²⁵ وەختێ یەحیا دەورێ خزمەت خوەێ وه ئاخر رەسان، وەت: ”من وه کی زانین؟ من ئەوه نیم؛ بەڵکەم ئەوه وەشون مه تێد و مه تەنانەت شایسه نیم بەن کەوشەگانی واز بکەم.“

²⁶ «ئێ برایل، ئێ مناڵیل ئێبراهیم و ئێ ناجویلەکەیلێگ که ڕخدان له خودا چود و هاینه ئێرا، ئی پێخام نجاته ئەڕاێ ئیمه کل کریاس.

²⁷ مەردم ئورشەلیم و گەورایلێان عیسا نەناسین و وه ماکوم کردنێ، قسیەیل پەێخەمەریل که هەر شەبات خوەنریەد، وه دی هاوردن.

²⁸ ئەوانه هەر چەن هویچ مدوێگ ئەڕا سزاێ مردنێ پەێا نەکردن، له پیلاتوس تواسن تا ئەیو بکوشێ.

²⁹ وەختێ گشت ئەو چشتیلی که له باوەت ئەیو نویسریاوی، وه ئەنجام رەسانن، ئەیو له سەلیب هاوردن خوار و نانی قەور.

³⁰ وەلێ خودا ئەیو لەناو مردگیل زنیەو کرد.

³¹ ماوەێ فرەێگیش ئەوانه که وەگەردیەو له ناوچەێ جەلیل هاتوینه ئەڕا ئورشەلیم وه چەو خوێان دینەێ، ئێرنگەیش له لاێ قەوم شاێەتی ئەڕاێ دەن.

³² ئێرنگه ئیمه وەپێدان مزگانی دیمن که خودا ئەو چشته که وه باپیریلمان واده داوید،

³³ وەگەرد زنیەو کردن عیسا، ئەڕا ئیمه که مناڵیلێانیم وەفا کرد. هەر ئەوجورە که له بەش دویم زەبور نویسریاس: «تو کوڕ منی؛ ئیمڕو، من بیمەسه باوگد.»

³⁴ جا خودا ئەیو لەناو مردگیل زنیەو کرد تا دیتر وەناو وەزو حاڵ مەرگ و گەنیان نەمینێ، ئەوجورەکە وەناو کتاو ئەشعەیاێ پەێخەمەر هاتێه: «بەەرکەتیل موقەدەس و دڵنیاێگ که وه داود پادشا وادەێ دریاس، بەخشمه پێدان.»

³⁵ هەر ئی جوره وه زەبورێگ تر ئویشێ: «نێیلی قودوسەگەێ تو لەناو قەور بگەنێ.»

³⁶ چوینکه داود وەشون ئەوه که وه پێ خاست خودا وه مەردمیل خوەێ خزمەت کرد، مرد و چیه لاێ باپیریلێ و جنازەگەێ گە‎نیاد.

³⁷ وەلێ ئەوه که خودا زنیەو کرد، نەگەنیاد.

³⁸ جا، ئێ برایل، بزانن له ڕێ عیسا بەخشین گونایل وه پێدان جار دریاس.

³⁹ هەر کەس ئیمان بارێ، له ڕێ ئەیو له هەر چشتێگ که نەتویەنسیه وەگەرد شەریعەت موسا له لێ ڕزگار بود، ڕزگاری پەێا کەێ.

⁴⁰ جا هوشدان بود، ئەو چشته که وەناو نویسریایل پەێخەمەریل هاتێه، وه سەردان نای که ئویشێ:

⁴¹ «بنوڕن، ئێ تویلەکی کەریل، ئەڵاجویدان باێ و له بین بچن، چوینکه وه ڕوژگاریل ئیوه کارێ کەم، تەنانەت ئەگەر کەسێ ئەڕادان بویشێدێەو هەراێهەر باوەڕ نیەکین.»

⁴² وەختێ پولوس و بەرنابا له کەنیسه چیانه دەیشت، مەردم لاڵکیانه پێانەو که شەبات وەرەڕوی له باوەت ئی چشتیله ئەڕاێان قسیه بکەن.

⁴³ جا وەشون ئیه که مەردم له کەنیسەگه دانه‌ دەیشت، قێر فرەێگ له جویلەکەیل و خوداپەرەسەیلێ که بوینه جویلەکە، کەفتنه شون پولوس و بەرنابا. ئەوانیش ئەڕاێان قسیه کردن تا وەناو فیز خودا بەردەوام بمینن.

⁴⁴ ئی شەباتەگە، هەڵاێه گشت مەردم شارەگه گردەو بوین تا پێخام خوداوەند بشنەفن.

⁴⁵ وەلێ جویلەکەیل وەختێ دین مەردم فرەوه بین، حەسوێان هات و له نوای قسیەيل پولوس وسان و بی حرمەتی کردیان.

⁴⁶ ئمجا پولوس و بەرنابا وه ئازای وەتن: «باێه پێخام خودا وەرجه گشتیەکی ئەڕاێ ئیوه بویشرێی. وەلێ وەبونەێ ئیەکه ڕەدێ کردین و خوەدان شایسەێ زنەیی ئەبەدی نەزانستین، ئەوەسه چیمنه ئەڕا لاێ ناجویلەکەیل.

⁴⁷ چوینکه خوداوەند وەناو کتاو ئەشعەیاێ پەێخەمەر وه ئیمه ئیجوره دەستور داس که: «مه تو کردمه نویریگ ئەڕا ناجویلەکەیل، تا نجات برەسنیه ئەو پەر زەوی.“

⁴⁸ وەختێ ناجویلەکەیل ئیه شنەفتن، دڵشادەو بین و حرمەت پێخام خوداوەند گردن؛ جا ئەوانەێ که ئەڕا زنەیی ئەبەدی دیاری کریاوین، ئیمان هاوردن.

⁴⁹ وەئیجوره کەڵام خوداوەند وه سەرئانسەر ئەو مەنتەقه پەخشەو بی.

⁵⁰ وەلێ جویلەکەیل، ژنيل خوداپەرەس و بەناوبانگ و هەرئیجوره پیاێل ناودار شار ڕشاننه یەکا و وه زد پولوس و بەرنابا گاڵدان. جا عەزاوێان دان و له ئەو مەنتەقه دەرێان کردن.

⁵¹ وەلێ پولوس و بەرنابایش وه نیشانەێ ئیه که ئاگر خەزەو خودا تێدە ملێانەو، توز پایلێان وه زدیان تەکانن و چین وەرەو شار قونیه.

⁵² وەلێ شاگردەگان پڕ له خوەشی و روح‌القودوس بین.