کاریل ڕەسولەیل 11 - کتاب مقدس به زبان کردی جنوبی - گویش کلهوری

ڕاپورت داین پتروس وه کلیسا

¹ ڕەسولیل و برایل وه سەرئانسەر ناوچەێ یەهودیه شنەفتن که ئەوانیش که جویلەکە نین پێخام خودا قەبوڵ کردنه.

² جا وەختێ پتروس هاتەو ئەڕا شار ئورشەلیم، ئەوانه که وه خەتەنه باوەڕ داشتن هەله گردنه لی و وەتن:

³ «تو چیدەسه ماڵ خەتەنه نەکریایەگان و وەگەردێان نان خواردی!»

⁴ وەلێ پتروس گشت ئی هەڵکەفتیله یەک وه یەک ئەڕاێان شێو کرد، وەت:

⁵ «من وەناو شار یافا خەریک دوعا بیم، له هوش خوەم چیم و رویایگ دیم چشتێگ جور سفرەێگ گەورا که له هەر چوار لاوه شوڕەو کریاوی، له ئاسمان هاته خوار و ڕەسیه پێم.

⁶ وەختێ خاس نوڕیمه پێەو، چوارپایل و گیانەوەریل دڕنه و خزنەیل و باڵەندەیل وەناوێ دیم.

⁷ جا دەنگێگ ڕەسیه گوشم که وەتیا: ”پتروس، هەڵس، سەر بوڕ و بخوه.“

⁸ «وەلێ مه وەتم: ”نەخیر، خوداوەند، چوینکه هەراێهەر دەمه قێ چشت حەرام یا ناپاک نیامه.“

⁹ «وەلێ ئەڕا دویم جار دەنگێگ له ئاسمانەو جواو دا: ”ئەو چشته که خودا پاکێ کردێه، تو نەبایه بویشی پێسه.“

¹⁰ ئی کاره سێ جار هەڵکەفت؛ ئمجا گشت ئەو چشتیله بڕیاده ئاسمان.

¹¹ «هەر ئەو وەخته، سێ پیا ڕەسینه نوای ماڵی که وەناوێ بیم، که له شار قیسەریەوه کل کریاوینه ئەڕا لاێ مه.

¹² روح خودا وەپێم وەت که بێ شک و دودڵی وەگەردێان بچم. ئی شەش برایشێ وەگەردم هاتن، ئیمەیش چیمنه ماڵ ئەو پیا.

¹³ ئەوه ئەڕامان وەت که چوی وەناو ماڵ خوەێ فریشتەێگ دیه که وسای و وەپێ وەتوی: ”کەسیلێ کل بکه ئەڕا یافا تا شەمعون ماروف وه پتروس بارنه ئەڕا ئێرا.

¹⁴ ئەوه پێخامێگ ئەڕاد تیەرێ که وه وەسلەێ ئەوه نجات پەێا کين، هەم توێ هەم گشت ئاڵ ماڵەگەد.“

¹⁵ «وەختێ شرو وه قسیه کردم، روح‌القودوس ڕشیا سەریان، هەر ئەوجورە که له سەرەتاوه ڕشیاویه سەر ئیمەیش.

¹⁶ جا فەرمایش خوداوەند هاته هویرم که وەتوی: ”یەحیا وەگەرد ئاو خوسڵ تەعمید دیاد وەلێ ئیوه وەگەرد روح‌القودوس تەعمید گرین.“

¹⁷ جا ئەگەر خودا هەر ئەو خەڵاتیه بەخشیه پێان که وەشون ئیمان هاوردن وه عیسا مەسیح خوداوەند بەخشیەسه ئیمه، من کیم که بتوام نوای کار خودا بگرم؟»

¹⁸ وەختێ ئی قسیەیله شنەفتن، بیدەنگ بین و ستایش خودا کردن، وەتن: «وه ڕاسی که خودا وه ناجویلەکەیلیش ئی دەرفەته دا تا توبەی زنەیی بەخش بیرێیده پێان!»

کلیساێ شار ئەنتاکیه

¹⁹ ئمجا کەسیلێ که وەشون شکەنجه و عەزاوێگ که وه سەر ئستیفان هاتوی، تەفرتوینا بوین، چینه ئەڕا مەنتەقەیل فینیقیه و قپرس و ئەنتاکیه. ئەوانه پێخام خودا بێجگه وه جویلەکەیل وه کەسێگ تر نەوەتن.

²⁰ وەلێ چەن نەفەرێگ له لێان له مەردم قپرس و قیرەوان بین که وەختێ ڕەسینه ئەنتاکیه، وەگەرد یونانیەگانیش قسیه کردن و مزگانی عیسا خوداوەند دانه پێان.

²¹ دەس خوداوەندیش وەگەردێان بی و قێر فرەێگ ئیمان هاوردن و ڕوی کردنه خوداوەند.

²² ئی خەوەره ڕەسیه گوش کلیساێ ئورشەلیم، جا بەرنابا کل کردنه ئەڕا ئەنتاکیه.

²³ وەختێ ڕەسیه ئەوره و فیز خودا دی، دڵشادەو بی و گشتێان هان دا تا وه کوڵ دڵەو وه خوداوەند وەفادار بمینن،

²⁴ چوینکه بەرنابا پیاێ خاسێگ بی و پڕ بی له روح‌القودوس و ئیمان. ویجوره مەردم فرەێگ ڕوی هاوردنه خوداوەند.

²⁵ جا وەشون ئەوه، بەرنابا چیه ئەڕا شار تارسوس تا شائول بوینێدەو.

²⁶ وەختێ پەێاێ کرد، هاوردی ئەڕا ئەنتاکیه. ئەوانه یەێ ساڵ تەمام وه ئەوره وەگەرد کلیسا گردەو بویان و قێر فرەێگ تالیم دیان. یەکم جار وه ئەنتاکیه بی که وه شاگردیل وەتن ’مەسیحی‘.

²⁷ وه ئەو ڕوژیله چەن گله نەبوەتکەر له ئورشەلیم هاتنه ئەڕا ئەنتاکیه.

²⁸ یەکی له ئەوانه که ناوێ ئاگابوس بی، هەڵساد و وه ڕێنمایی روح‌القودوس پێشگویی کرد که قاتوقڕی سەختێگ سەرئانسەر جهان گرێده وەر. ئی قاتوقڕیه وه دەوران حوکومەت کلودیوس هەڵکەفت.

²⁹ جا شاگردیل تواسن هەر کامێان چەنه تویەناێ خوێان، مەیەتی کل بکەن ئەڕا برایلێگ که نیشتەجێ یەهودیەن.

³⁰ جا ئیجوره کردن و وه دەس بەرنابا و شائول، هدیەێگ کل کردنه ئەڕا لاێ شێخیل ئورشەلیم.