سێیەم یوحەنا 1 - کتاب مقدس به زبان کردی جنوبی - گویش کلهوری

¹ له من شێخ، وه گایوس عەزیز که وەناو ڕاسی دوسی دێرم.

² ئێ عەزیز، دوعا کەم که له هەر لاێگەو بەختەوەر بوید و لەشد ساق بود، هەر ئەوجورە که گیاندیش بەختەوەره.

³ فره دڵخوەشەو بیم وەختێ برایل هاتن و شاێەتی دان که تو وه ڕاسی وەفاداری هەرئەوجوره که تو بی خەڵاف وەناو ڕاسی زنەیی کەی.

⁴ هویچ چشتێ فرەتر وه ئیه خوەشاڵم نیەکێ که بشنەفم مناڵیلم وەناو ڕاسی زنەیی کەن.

⁵ ئێ عەزیز تو وەناو گشت کاریلد که ئەڕا ئی برایله کەی وەفاداریەو خوەد نیشان دەێ، وه تایبەتی که ئەوانه ئەڕا تو بێگانەن،

⁶ ئەوانه وه نوای کلیسا وه مابەت تو شاێەتی دانه. کار خاسێ کێ ئەگەر ئەوانه جوری که شایسەێ خوداس، کلێان بکێ ئەڕا گەردیانێان.

⁷ چوینکه ئەوانه وەبونەێ ناو مەسیح کەفتنەسه ڕێ و له ناجویلەکەیل هویچ مەیەتی نەگردنه.

⁸ جا ئیمه باێه پشت ئیجور کەسیله بگریمن تا وەگەردێانەو ئەڕا وەنوا بردن ڕاسی هاوکاری کردویمن.

⁹ یەێ چشت ئەڕا کلیسا نویسامه، وەلێ دیوترفیس که دوس دێرێ جیگەێ یەکم داشتوی، دەسڵات ئیمه قەبوڵ نیەکێ.

¹⁰ جا ئەگەر بام کاریلێ که کەی ئویشمەو، چوینکه وه قەسی له باوەت ئیمه قسیەێ خراو ئویشێد، وه ئیەیشه رازی نویه، بەڵکەم برایلیش ڕێ نێید و ئەو کەسیلێ که توان ڕێیان بێەن، نوایان گری و له کلیسا دەرێان کەی.

¹¹ ئێ عەزیز، وه خراوی نمونه ئەڕا خوەد مەگر، بەڵکەم وه خاسێ نمونه بگر. هەر کەس خاسێ بکێ، له لاێ خوداس، وەلێ هەر کەس خراوی بکێ خودا وه چەو نێه.

¹² گشتیەکی تەنانەت خود ڕاسییش له باوەت دیمیتریوس وه خاسێ شاێەتی دەن. ئیمەیش شاێەتی دیمن و ئیوه زانین که شاێەتی ئیمه ڕاسه.

¹³ چشتیل فرەێگ داشتم تا ئەڕاد بنویسم، وەلێ نیەتوام وه قەڵەم و مرەکەو بود.

¹⁴ ئمید دێرم وه ئی زویه بوینمەد و ڕوی وه ڕوی قسیه بکێم.

¹⁵ ئاشتی و سڵامەتی وه ملدەو بود! ڕەفیقەیل وەپێد سڵام رەسنن. تنیش وه ڕەفیقەیلێ که هانه ئەوره گله وه گله سڵام برەسن.