دویم تیموتاوس 4 - کتاب مقدس به زبان کردی جنوبی - گویش کلهوری

¹ له نوای خودا و مەسیح عیسا که وه مل زنییل و مردگیل داوەری کەید و وه ڕوی ئاشکرابوین و پادشاێ ئەیو، وه توی دەستور دەم که باێه‎

² کەڵام بانگەوازی بکێد و وەخت و بی وەخت ئەڕا ئی کاره گورج بوێد و وەگەرد سەور فره و تالیم فره درس، وه درس بوین و گازتاوه و هانداین کار بکێد.

³ چوینکه زەمانێگ تێد که مەردم تاموڵ شنەفتن تالیم درس نێرن بەڵکەم ماموستایلێگ وه دەور خوێان گردەو کەن تا ئەو چشته که گوشیلێان تواێ له ئەوانه بشنەفن و وەگەرد هەواوهەوەس ئەوانه جور دەر تێد و

⁴ له گوش داین وه ڕاسی ڕوی هەڵوگەردنن، وەرەو مەسلەتیل له ڕێەو دەرچن.

⁵ وەلێ توی وه هەر حاڵێگەو هوشد بود؛ سەختییل ئەڕا خوەد هامارەو بکه؛ کار مزگانیدەر وه جێ بار و خزمەت خوەد وه کەماڵ وه جێ بار.

⁶ چوینکه خوین مه، هەر جور پیشکەشی شراو، هەر وه ئی زویه ڕشێید و وەخت چیێنم له ئی جهانه ڕەسیه

⁷ جەنگ خاسەگە جەنگیمه، موسابقەگه رەسانمەسه ئاخر و ئیمانم بی خڵت خەوش پارێزانمه.

⁸ ئێرنگه تاج سالح بوین ئەڕام ‎گورجه، تاجێگ که خوداوەند، ئەو داوەر دادپەروەره، له ئەو ڕوژه بەخشیده پێم، نه تەنیا وه مه، بەڵکەم وه گشت ئەوانه که تاسەێ ئاشکرابوینی، داشتنه.

ئاموژیاریێل شەخسی

⁹ تەقالا بکه تا هەر چی زویتر باێده ئەڕا لاێ مه.

¹⁰ چوینکه دیماس وه بونەێ دوس داشتن ئی جهانه وێڵم کردێه و چیەسه ئەڕا شار تسالونیکی. کریسکیس وەرەو شار غەلاتیه و تیتوسیش چیەسه ئەڕا شار دەلماتیه.

¹¹ تەنیا لوقا ها گە‎رد منەو. مەرقوس هەڵگر وەگەرد خوەد بارێ، چوینکه ئەڕا خزمەتەگەم فایده دێرێد.

¹² تیخیکوس کل کردم ئەڕا شار ئەفسوس.

¹³ وەخت هاتند، بەتیەێگ که له شار تروئاس له لاێ کارپوس هیشتمەسه جێ وەگەرد خوەدەو بار، هەر ئیجوره کتاوەگانم و وه تایبەتی نویسریایلیگ که ها له بان پوسەو.

¹⁴ ئەسکەنەر مسگەر، وەگەردمەو فره خراوییل کرد. خوداوەند سزاێ کارەگانێ دێ.

¹⁵ تنیش له ئەوه دویر بگر، چوینکه وه سەختی له ڕوی وه ڕوی پێخام ئیمه هەڵساس.

¹⁶ له یەکمین دەفای مه، هویچکەسێگ پشتم نەگرد، بەڵکەم گشتیەکی وازه لێم هاوردن. نەخواێ که ئیه وه حساویان بنریێد.

¹⁷ وەلێ خوداوەند له لاێ مه وساد و تویەنایی دا پێم تا کەڵام له ڕێ مه وه کەماڵ بانگەوازی بکرێید و گشت ناجویلەکەیل بشنەفنێ. جا، له دەم شیر دەرچیم.

¹⁸ خوداوەند مه له هەر کار شەڕئاشوێگ ڕزگار کەێد و ئەڕا پادشایی ئاسمانی خوەێ ڕزگار کەید. تا ئەبەد و تا ئەبەد جەڵاڵ وه ئەیو بود. ئامین!

دورودیل ئاخر

¹⁹ وه پریسکیلا و ئاکیلا و بنەماڵەگەێ ئونیسیفوروس سڵام برەسن.

²⁰ ئراستوس له قورنتوس مەن و مه تروفیموس له میلیتوس، نەخوەش، هیشتمه جێ.

²¹ تەقالا بکه تا وەرجه زمسان برەسده ئێرا. یوبولوس سڵامد رەسنێد، هەر ئیجوره پودنس، لینوس، کلودیا و گشت برایل.

²² خوداوەند وەگە‎رد روح تونەو بود. فیز وەگەرد گشتدانەو بود.