دویم تیموتاوس 3 - کتاب مقدس به زبان کردی جنوبی - گویش کلهوری

بی خودایی له ڕوژیل ئاخر

¹ وەلێ ئاگادار به که له ڕوژیل ئاخر، زەمانیل سەختێگ تێدە دی.

² مەردمیل خود‎پەرەس، پویلدوس، قتقوز، لویتبەرز، خراودەر، ملچەفتەوکەر وه داڵگ و باوگ، قێر نەزان، ناپاک،

³ بێ ئافتوهەست، بێ گوزیشت، بختکەر، زاڵ نوی وه سەر خوەێ، دڕنه، دشمەن خاسێ،

⁴ خەیانەتکار، دەربەن هویچ نوی و له لویتبەرزی پف کردنه. لەزەت، فرەتر له خودا دوس دێرن

⁵ و هەر چەن شێوەیان مێنیده خوداناس، وەلێ هێز ئەوه حاشا کەن. له ئیجور کەسیلێگ دویرەو بگر.

⁶ ئیانه کەسیلێگن که ڕێ پەێا کردنەسه ناو ماڵ مەردم، ژنيل کەم عەقڵ تویش خوێان تیەرن، ژنیلێگ که له ژێر بار گونایل چەمیانەسەو و هەواوهەوەسیل جوراجور، ئەوانه وه هەر لاێگەو کیشێد،

⁷ هەرچەن هەمویشه تالیم گرن وەلێ هەراێهەر نیەتویەنن وه ناسین ڕاسی برەسن.

⁸ هەر ئەوجورە که یەنیس و یەمبریس له نوای موسا هەڵسان، ئی پیاێلیشه که فکرێگ گەنیاێ و ئیمانێگ ڕفوزه دێرن، لەنواێ ڕاسی وسن.

⁹ وەلێ ڕێ وه شونێگ نیەوەن، بەڵکەم گیلگەوجیان ئەڕا گشتیەکی ئاشکرا بود، ئەو جورەکه نەفامێ ئەوانەیشه ئاشکرا بی.

ئاموژیاری پولوس وه تیموتاوس

¹⁰ وەلێ توی له تالیم و ڕێ رەوشت و ئامانج و ئیمان و سەور و مابەت و تاموڵم خەوەر دێرێ و

¹¹ عەزاویلێگ که کیشامه و رەنجیلێ که دیمه، دیده‎ و له ئەو چشته که له شاریل ئەنتاکیه، قونیه و لستره وه سەرمەو هات و عەزاویلێگ که و مه رەسێ، خاس ئاگاداری. وەلێ خوداوەند مه له ناو گشت ئەوانه دەراورد.

¹² وه ڕاسی، گشت کەسیلێگ که بتوان وەناو مەسیح عیسا وەگەرد خوداپەرەسی زنەیی بکەن، عەزاو دوینن؛

¹³ وەلێ ئەوانه که کارێان شەڕئاشویه و فێڵبازن وەناو خراوی چنه نوا؛ گول دەن و گول خوەن.

¹⁴ وەلێ توی له ئەو چشته که یاێ گردیده و ئیمان هاوردیدەسه پێ بەردەوام بمین، ئەڕا ئیه که زانید ئەوانه له چ کەسیلێگ یاێ گردیده و

¹⁵ چوی له مناڵی کتاویل موقەدەس زانستیدە که تویەنێد زانیاری یاێ بێیده پێد ئەڕا نجاتیگ که له ڕێ ئیمان وه مەسیح عیساس.

¹⁶ گشت کتاو موقەدەس وەحی خوداس و ئەڕا تالیم و ئەدەو بوین و درس بوین و پەروەرانن له سالح بوین فایده دێرێد،

¹⁷ تا پیاێ خودا وه کەماڵ ئەڕا هەر کار خاسێگ گورجەو بود.