دویم تیموتاوس 2 - کتاب مقدس به زبان کردی جنوبی - گویش کلهوری

¹ جا توی ئێ ڕوڵەم، له فیزێگ که ها ناو مەسیح عیسا، تویەنا بو

² و ئەو چشته که له لاێ شاێەتیل فرەێگ له مه شنەفتی، وه مەردمیل ئەمینێگ بسپار که بتویەنن وه کەسێلێگتر یاێ بێەن.

³ هەر جور سەرباز شایسەێ مەسیح عیسا، له تاموڵ رەنجیل بەشدارەو بو.

⁴ هویچکەسێگ له وەخت سەربازی، خوەێ تویش گیرگرفت زنەیی نیەکێد، ئەڕا ئیه که تواید خوەشنودی فەرماندەگەێ خوەێ وه دەس بارێد.

⁵ هەر وه ئیجور، پاڵەوانێگ که نەفەس کیش تواێ، تاج قارەمانی نیەگرێ ئەگەر وه ڕوی یاسایل زوران نەگردوی.

⁶ ئەوه که باێه یەکم جار له خەله نسیو بوێد، جفتیارێگه که مەینەت کیشاس.

⁷ وه ئەو چشته که ئویشم فکر بکه، که خوداوەند وه توی ئەڕا فام گشت ئیانه وەر چەود واز کەی.

⁸ عیسا مەسیح باره هویرد که له نەتەوەێ داود پادشا بی و له مردگیل زنیەو بی؛ هەرئەوجوره که ئینجیل مه ئەوه ئویشێ،

⁹ که وه بونەێ هامه ناو رەنج، تا وه ئەو ئەنازه که هەر جور جرم کەریل کیشانەسەمه زنجیر. وەلێ کەڵام خودا له زنجیر نیه.

¹⁰ جا گشت چشتێگ وه بونەێ هەڵوژاریەگان تاموڵ کەم تا ئەوانیش نجاتیگ که ها ناو مەسیح عیسا، وەگەرد جەڵاڵ ئەبەدی وه دەس بارن.

¹¹ ئی قسیه شایسەێ دڵنیاییه که: ئەگەر وەگەرد ئەیو مردیم، وەگەرد ئەیو زنەییش کەیمن.

¹² ئەگەر تاموڵ بکێم، وەگەرد ئەیو سەڵتەنەتیش کەیمن. ئەگەر حاشاێ بکێم، ئەیویش حاشامان کەید.

¹³ ئەگەر بی وەفا بویمن، ئەیو وەفادار مینێد، وەئەو بونه که نیەتویەنێد خوەێ حاشا بکێد.

¹⁴ ئیانه یەێ‌سەر باره هویرێان و وه لاێ خودا دەستور بیه پێان که وه مل کەلیمەیل دەمقاڵ نەکەن، که بێجگه له بێن چێن ئەوانه که گوش گرن بارێگ تر نێرێ.

¹⁵ سەخت تەقالا بکه که خودا قەبوڵد بکێد، هەر‎جور خزمەتکارێگ که له کارەگەێ شەرمزار نیه و کەڵام ڕاسی وه درسی وه کار بەسێد.

¹⁶ له قسیەیل مفت و وەدەردنەخوەر پارێز بکه، که هەر چێ فرەتر ئایەم وەرەو خودانەناسی کیشێد.

¹⁷ تالیم ئیجور کەسیلێگ هەرجور خوره پەخشەو بود. هیمنائوس و فیلتوس هەر له ئی دەسەنه،

¹⁸ که له ڕاسی دویرەو کەفتنه و ئویشن زنیەو بوین مردگیل هەر ئێرنگه‎ وه جێ هاتێه و وه ئیجوره ئیمان بڕێگ خاپور کەن.

¹⁹ وه ئی حاڵەو، بنەواێ قورسیگ که خودا داناس، ها سەر جێ خوەێ و وەگەرد ئی قسیه مور کریاس که: «خوداوەند کەسیل خوەێ ناسێد،» و «هەر کەسێگ ناو خوداوەند وه زوان بارێ، باێه له نادرسێ دویرەو بود.»

²⁰ وەناو ماڵ گەوراێگ، تەنیا دەفریل تەڵا و نقره نیه، بەڵکەم دەفریل چویی و خەڕێنیش هەس؛ ئەوانه وه دەرد کاریل خاس خوەن، ئیانه وه دەرد کاریل دەم دەسێ.

²¹ جا هەر کەسێگ خوەێ له چشتیل ناپەسەن پاک بپارێزنێد، دەفرێگه که وه دەرد کاریل خاس خوێد، دەفرێگ پاک و وه ‎دەرد خوەر ئەڕا خاون ماڵ و گورج ئەڕا هەر کار خاسێگ.

²² له هەواوهەوەس جاێەلی دەر بچو و وەگەرد ئەوانه که وه دڵ پاکەو خوداوەند خوەنن، وەشون سالح بوین و ئیمان و مابەت و ئاشتی و سڵامەتی بو.

²³ له باسیل پویچ و وه ڕوی نەفامی دویرەو بگر، ئەڕا ئیه که زانی شەڕیلێگ هەڵگڕنێد.

²⁴ خزمەتکار خوداوەند نەبایه شەڕ بکێد، بەڵکەم باێه وەگەرد گشتیەکی مێرەبان بود و تویەناێ تالیم و سەور بیاشتوید.

²⁵ باێه ئەوانه که له نوای وسن وه دڵنەرمی ڕێنمایی بکێد، وەئی ئمیده که خودا بیلێد تا ئەوانه توبه بکەن و ڕاسی بناسن

²⁶ و بانه خوێانا، له دام ئبلیس که ئیانه ئەڕا وەجێ هاوردن خاست خوەێ گیروده کردێه، دەر بچن.