دویم تیموتاوس 1 - کتاب مقدس به زبان کردی جنوبی - گویش کلهوری

¹ له پولوس، که وه خاست خودا و وه بونەێ وادەێ ژیانێگ که وەناو مەسیح عیسا پەێا بود، ڕەسول مەسیح عیساس،

² وه ڕوڵەێ عەزیزم، تیموتاوس: فیز و رامەت و ئاشتی و سڵامەتی له لاێ خوداێ باوگ و خوداوەندمان مەسیح عیسا وه ملدەو بود.

هان داین و وەفاداری

³ وەختێگ شەو و ڕوژ، یەێ‌سەر توی له ناو دوعایلم تیەرمه هویرم، سپاس خودا کەم، خوداێگ که منیش هەر‎ جور باپیریلم وەگەرد وژدان پاکێگەو خزمەتی کەم.

⁴ چوینکه ئەسریل توی تیەرمه هویرم، ئاوەختی کەم بوینمەد تا وه دێن توی نیقەڵتوز خوەشی بم.

⁵ ئیمان بی خڵت خەوش توی تیەرمه هویرم که یەکم جار له ناو نەنگد لوئیس و ئمجا له ناو داڵگد یونیکی نیشتەجێ بی و دڵنیام ئێرنگەیش له ناو توی نیشتەجێه.

⁶ وه ئی بونه، خەمه هویرد که ئەو خەڵاتی خودا که وه پێ دەس ناین مه، له ناو توی جێ گردێه، گڕه بخێده لێ.

⁷ چوینکه روحێگ که خودا وه ئیمه بەخشاس، نه روح زاور چین، بەڵکەم روح هێز و مابەت و وەسەرخوێا زاڵ بوینه.

⁸ جا، له شاێەتی داین وه خوداوەند ئیمه شەرمزار نەو، نه ئەڕا مه که وه خاتر ئەوه هامه زندان، بەڵکەم تنیش وه پاڵەو داین وه هێز خودا له زامەت کیشاین ئەڕا ئینجیل بەشدارەو بو.

⁹ هەر ئەو خوداێگ که ئیمه نجات داس و ئەڕا زنەیی موقەدەس دەنگ کردێه. ئیه نه وه سەوەو کاریل ئیمه، بەڵکەم وه خاتر خاست و فیز خود ئەیوه، فیزێگ که وه ناو مەسیح عیسا له ڕوژگاریل ئەزەڵ وه ئیمه بەخشا،

¹⁰ وەلێ ئێرنگه وه ئاشکرابوین نجات دەر ئیمه مەسیح عیسا دیارداس، هەر ئەیو که له ڕێ ئینجیل، مەرگ له بین برد و ژیان و نەمری ئاشکراوه‎ کرد.

¹¹ ئەڕا ئیه که مه هەڵوژاریامه تا بانگەوازیکەر، ڕەسول و ماموستاێ ئی ئینجیله بوم.

¹² وه بونەێ ئیەسه که ئیجوره رەنج کیشم، وەلێ شەرمزار نیم، ئەڕا ئیه که زانم وه چ کەسێگ ئیمان هاوردمه و دڵنیام که ئەیو تویەناس ئەمانەتەگەم تا وەئەو ڕوژه بپارێزنێد.

¹³ وەناو ئیمان و مابەتێگ که وەناو مەسیح عیسا پەێا بود، هەر جور نمونەی تالیم درسێگ، بکەفه شون ئەو چشته که له مه شنەفتیدە.

¹⁴ وه مەیەت روح‌القودوس که لەناو ئیمه نیشتەجێه، هوشده ئەو ئەمانەت خاسەو بود که وه پێد سپاریاس،

¹⁵ ئاگاداری که نیشتەجێیل ناوچەێ ئاسیا، گشتێان له لێم ڕوی هەڵوگەرداننه که فیگلوس و هرموگنس له ئەوانەنە.

¹⁶ بەزەیی خوداوەند وه مل بنەماڵەگەێ ئونیسیفوروس بود، ئەڕا ئیه که چەن جار گیان مه تازەوه‎ کردێه و له زنجیریلم شەرمزار نوی.

¹⁷ بەڵکەم چوینکه هاته ئەڕا روم، فره وەشونمەو گەردیاد تا دەس ئاخر پەێام کرد.

¹⁸ خوداوەند وەپێ بوەخشێ که له ئەو ڕوژه له لاێ خوداوەند بەزەیی باێده پێەو. توی خوەد له خزمەتیل فرەێ ئەوه له شار ئەفسوس، خاس ئاگاداری.