دویم تسالونیکییل 2 - کتاب مقدس به زبان کردی جنوبی - گویش کلهوری

هاتنەوێ مەسیح

¹ ئێ برایل، له باوەت هاتن خوداوەند ئیمه عیسا مەسیح و گردەو بوین ئیمه وه لاێ ئەیو، لاڵکێیمنه پێدان،

² زوی فکردان نەشیوێد یا پەشێو نوین، چ له ڕێ یەێ روح چ له ڕێ یەێ وتار یا نامەێگ که چماێ له لاێ ئیمەس، که ئویشێ ڕوژ هاتنەوێ خوداوەند عیسا رەسیه.

³ مەیلن هویچکەسێگ وه هویچ ڕێیگ گولدان بێید. چوینکه تا یەکم جار ئەو ئاژاوە وه زد خودا نایده دی و ئەو پیا بی دینه که مناڵ نابودیه ئاشکرا نود، ئەو ڕوژه نیەرەسێد.

⁴ ئەوه له نوای هەر چی که خودا خوەنریەد و پەرەسیەد، وسێد و خوەێ نێده بانتر، جوری که له ناو مابەد خودا دانیشێد و خوەێ وه خودا ناسنێد.

⁵ ئێ وه هویردان نیه وەختێگ که هێمراێ وەگەرددانەو بیم ئیانه وه پێدان وەتم؟

⁶ ئیوه زانين که ئێرنگه چ چشتێگ نوای گری و سەوەو بود که ئەوه تەنیا له وەخت مناسو خوەێ ئاشکرا بود.

⁷ چوینکه راز بی دینی هەر ئێرنگەیش کار کەید، وەلێ تەنیا تا وەختێگ که ئەوه که تا وه ئیسه نوای گری له بین بچود.

⁸ ئەو وەخته ئەو بی دینه ئاشکرا بود، هەر ئەوه که خوداوەند عیسا وه هەناس دەم خوەێ ئەوه کوشێد و وەگەرد شکوی هاتن خوەێ، ئەوه له بین بید.

⁹ هاتن ئەو بی دینه له ڕێ کار شەیتان، ها گەرد گشت هێز و نیشانەیل و موجزەیل دروەکانی،

¹⁰ هەر ئیجوره ها گەرد گشت جور شەڕئاشویی، که ئەوانه که هانه ڕێ نابودی، گول دەێد. ئیانه وه ئەو خاتره له بین چن که نەتواسن ڕاسی دوس بیاشتون و ئیجوره نجات پەێا بکەن.

¹¹ جا خودا ئیانه تویش فریو گەوراێگ تیەرێد، تا درو باوەڕ بکەن،

¹² تا گشت کەسیلێگ که ڕاسی باوەڕ نەکردنه بەڵکەم له نادرسێ خوەشنودەو بین، ماکوم بون.

بەردەوام بمینێن

¹³ وەلێ ئێ برایل که عەزیز خوداوەندین، ئیمه باێه هەمویشه وەخاتر ئیوه سپاس خودا بکێم، چوینکه خودا ئیوه جور نەوبەر هەڵوژارد تا وه وەسلەێ کار تەقدیسکە‎‏ر روح خودا و ئیمان وه ڕاسی، نجات پەێا بکێن.

¹⁴ ئەیو له ڕێ ئینجیلێگ که ئیمه جار دایم، دەنگدان کرد تا وه جەڵاڵ خوداوەند ئیمه عیسا مەسیح دەس پەێا بکێن.

¹⁵ جا، ئێ برایل، بەردەوام بوین و قورس بلچکێینه نەریتیلێگ که چ وه قسیەیلمان و چ وه نامەمان له لێمان یاێ گردین.

¹⁶ با خود خوداوەند ئیمه عیسا مەسیح و باوگ ئیمه خودا که ئیمه مابەت کرد و له ڕێ فیز دڵگەرمی ئەبەدی و ئمیدێگ خاس بەخشیه پێمان،

¹⁷ ئیوه دڵگەرمی بوەخشێد و وەناو هەر کردەوه و وتارێگ خاس بەردەوام بکێد.