دویم تسالونیکییل 1 - کتاب مقدس به زبان کردی جنوبی - گویش کلهوری

¹ له پولوس و سیلاس و تیموتاوس، وه کلیساێ شار تسالونیکی که هانه ناو خودا، باوگ ئیمه و خوداوەند عیسا مەسیح:

² فیز و ئاشتی و سڵامەتی له لاێ خودا، باوگ ئیمه و خوداوەند عیسا مەسیح وه ملدانەو بود.

سپاس و دوعا کردن

³ ئێ برایل، ئیمه باێه هەمویشه وەبونەێ ئیوه سپاس خودا بکێم و درسیشێ هەر ئیەسه، چوینکه ئیمان ئیوه فره فره گەوراوه بود و مابەت هەر کامدان وه یەکترەکی فرەوه بود.

⁴ وه ئی بونه، ئیمه خوەمان وەناو کلیسایل خودا وەبونەێ بەردەوام بین و ئیماندان وەناو گشت عەزاویل و بەردیلی که تاموڵ کین، وەپێدان شانازی کيمن.

⁵ ئیه نیشانەێ داوەری دادپەروەرانەێ خوداس تا ئیوه شایسەێ پادشایی خودا وه حساو باین که وەخاتریەو رەنجیش کیشین.

⁶ چوینکه وه ڕاسی که خودا ئیه داداپەروەرانه دوینی که ئەوانه که ئیوه دەنه وەر بەرد، وه بەرد جواو بێید و

⁷ تا ئیوه که بەرد کیشین و هەرئیجورەیشه وه ئیمه، ئارامی بێید. ئیه وەختێگ تێدە دی که خوداوەند عیسا وەگەرد فریشتەیل تویەناێ خوەێ وەگەرد ئاگر گڕانیگ له ئاسمانەو ئاشکرا بود.

⁸ ئەیو خودا نەناسیل و نافەرمانیل وه ئینجیل خوداوەند ئیمه عیسا، سزا دێ.

⁹ سزاێ ئیانه نابودی هەمویشەیه، دویر بین له لاێ خوداوەند و له جەڵاڵ هێز ئەیوه،

¹⁰ وه ئەو ڕوژه که ئەیو تێد تا وەناو ئیمانداریل خوەێ جەڵاڵ پەێا بکێ و له ناو گشت ئەوانه که ئیمان هاوردنه، بوده سەوەو سەر سڕ هاتن. ئیه ئیوەیش گرێده وەر، ئەڕا ئیه که وه شاێەتی ئیمه ئیمان هاوردینه.

¹¹ وه ئی بونه، یەێ‌سەر ئەڕا ئیوه دوعا کيمن تا خودامان، ئیوه شایسەی دەنگ کردن خوەێ بکێ و وه هێز خوەێ هەر ئاوەختیێل خاس و هەر کارێگ که له ئیمان ئیوه سەرچاوه گرید، وه ئەنجام برەسنێد،

¹² تا ناو خوداوەند ئیمه عیسا، وەناودان جەڵاڵ پەێا بکێد و ئیوەیش وەناو ئەیو جەڵاڵ پەێا بکێن، وه پێ فیز خوداێ ئیمه و خوداوەند عیسا مەسیح.