دویم پتروس 2 - کتاب مقدس به زبان کردی جنوبی - گویش کلهوری

ماموستا و پەێخەمەریل دروەکانی

¹ وەلێ لەناو قەوم جویلەکە، پەێخەمەریل دروەکانیش بین، هەر ئەوجورە که له ناو ئیوەیش ماموستایل دروەکانی تیەن که وه دزیەو تالیمیل هەڵه و نابودکەرێگ تیەرن و تەنانەت ئەرواوێگ که ئیانه سەن، حاشا کەن و ئیجوره وه سەر خوێان له بین چینێگ تیەرن که لەناکاوه تێد.

² قێر فرەێگ کەفنه شون هەرزەیی ئەوانه و وه بونەێان وه ڕێ ڕاسی کفر ئویشریێ.

³ ئیانه له ڕوی تەما، وەگەرد قسیەيل گولدەر، تاڵاندان کەن. ماکومیەتیان که له جارانەو دیاری کریاس، بێکار نەنیشتیه و له بین چینێان نەخەفتیه.

⁴ چوینکه ئەگەر وەختێ فریشتەیل گونا کردن، بەزەیی خودا ناته پێانا، بەڵکەم ئیانه خسته سیەچاڵ جەهەنم و ئەوانه وه زنجیریل تیەریکی و زولەمات زندانی کرد تا ئەڕا ڕوژ داوەری بنریەنەلا؛

⁵ و ئەگەر بەزەیی خودا ناته جهان جارانیشەو، بەڵکەم وەختێ که وه جهان خودانەناسیل واهێڵان هەنارد، تەنیا نوح که بانگەوازیکەر سالح بوینه، وەگەرد هەفت نەفەر تر پارێزان؛

⁶ و ئەگەر وەگەرد خوڵەکەو کردن شاریل سودوم و عەموره، ماکومێان کرده نابودی و کردەێ عبرەتێگ ئەڕا ئاخر خودانەناسی،

⁷ و ئەگەر لوت سالحان که له ڕێ رەوشت هەرزەیی ئەو ئایەمیله شەڕئاشوه فره پەشێو بوی ڕزگار کرد،

⁸ چوینکه ئەو پیاێ سالحانه هەر چی ڕوژه له ناوێان زنەیی کردیا و گیان سالحانێ له دین و شنەفتن کردەوه خراویان له عەزاو بی؛

⁹ جا خوداوەند زانید چوی ئایەمیل خوداناس له ئەزمونیل ڕزگار بکێ و ئایەمیلێگ که سالحان نین تا ڕوژ داوەری له ژێر سزا بنێده لا،

¹⁰ وه تایبەتی ئەوانه که خوێان وەناو شاوەت هەواوهەوەسیل پێسکەر وێڵ کەن و دەسڵات سوک وه‎ حساو تیەرێن. ئیانه ئەوجورە کەلەڕەقن و لویتبەرز که له کفرکردن وه گەورایل ئاسمانی رخێان نیەچود؛

¹¹ وه حاڵێگەو تەنانەت فریشتەیل که هێز و قەوەتیان فره فرەتره، هەراێهەر له وەخت جار داین ماکومیەتیان له لاێ خوداوەند، خراو نێەنه پێان.

¹² وەلێ ئیانه هەر جور گیانەوەریل نەفامن که ڕێ رەوشتیان له ڕوی سریشتێانه و هاتنەسه دنیا تا بکەفنه تەله و نابود بون. ئیانه له باوەت چشتیلی که نیەزانن چەس، کفر کەن. جا ئەوانه وەناو گەنیان خوێان، نابود بون.

¹³ له جێ ئەو خراویه که کردنه، خراوی دوینن. خوەشنودیان ئیەسه له ڕوژ ڕوشن شاوەت هەواوهەوەسیل خوێان وه جێ بارن. ئەوانه لەکەیل نەنگیگن که تەنانەت وەختێ له ناو جەشن هانەگەرددان، له فێڵێل خوێان کەیف کەن.

¹⁴ چەویلێگ دێرن پڕ له داوانپێسی که له گونا کردن تێر نیود. ئی مناڵیل لانەت کریایه، ئایەمیلێگ خەڵەتنن که بەردەوام نین، ئەوانه دڵیلێان هوکارەێ تەما بیه!

¹⁵ ئەوانه ڕێ ڕاس نانەسه لا و له ڕێ دەرچینه. ئەوانه ڕێ بەلعام کوڕ بعور گردنەسه وەر که له ‎حەقدەس نادرسێ خوەشی هاتیاد.

¹⁶ وەلێ بەلعام وه بونه خەتاگەی گریاده گازتاوه. جا یەێ وڵاخ بەسه زوانێگ وه دەنگ ئایەمیزاێ هاته قسیه و هەوسار نا دەم شیتی پەێخەمەرەگه.

¹⁷ ئی ماموستایل دروەکانی میننه، کیەنییل بی ئاو و تەمیلێگ که واهێڵان ڕانیەسێان. ئەڕاێان تیەریکی و زوڵەمات دیاری کریاس.

¹⁸ چوینکه ئەوانه وه دەنگ بەرز قسیەيلێگ کەن که له ڕوی لویتبەرزی و گیلگەوجیه و وه وەسلەێ هەواوهەوەسیل هەرزەی جەسه، کەسیلێگ گیر تیەرن که تازه له چنگ گومڕایێل دەرچینه.

¹⁹ وه ئەوانه وادەێ ڕزگاری دەن، وەحاڵێگەو خوێان خوڵام گە‎نیانن؛ چوینکه هەر چشتێ که وه مل ئایەم زاڵ بود، ئایەم بوده خوڵام هەر ئەو چشته.

²⁰ چوینکه ئەوانه که وەگەرد ناسین خوداوەند و نجات دەر ئیمه عیسا مەسیح، له ناپاکییل جهان دەرچینه، ئەگەر وه دواره تویش ئەو چشتیله با‎ن و ئەوانه وه سەر ئی ئایەمیله زاڵ بون، ئاخرێان خراوتر له سەرەتاێانه.

²¹ چوینکه ئەڕا ئەوانه خاستر بی که هویچ وەخت ڕێ سالح بوین نیەناسیان، تا ئیەک وه شون ناسینێ، له حوکم موقەدەسیگ که سپاریاسه پێان، هەڵوگەردن.

²² جا ئەوانه نمونەێ ئی مەسلەت درسنه که: «گەماڵ وە قیسان خوەێ هەڵەوگردێ» و «وراز له شون شوریان، وه پل خواردن له ناو خەڕێ هەڵەوگەردێ.»