دویم پتروس 1 - کتاب مقدس به زبان کردی جنوبی - گویش کلهوری

¹ له شەمعون پتروس، خوڵام و ڕەسول عیسا مەسیح، وه ئەوانه که وه وەسلەێ درسی خودامان و نجات دەرمان عیسا مەسیح، ئیمانێگ چەنه ئیمان ئیمه وه دەس هاوردنه:

² وه وەسلەێ ناسین خودا و خوداوەند ئیمه عیسا، فیز و ئاشتی و سڵامەتی فرەفره وه ملدانەو بود.

هەڵوژاریایل خودا

³ هێز خودایی ئەیو هەر چی که ئەڕا زنەیی و خوداپەرەسی هەوەجیه، ناسه وەر دەسمان. ئیه له ڕێ ناسین ئەیوه که ئیمه وه جەڵاڵ و خاسێ خوەێ دەنگمان کرد.

⁴ ئەیو وه وەسلەێ ئیانه وادەیل گران قیمەت و فره گەوراێ خوەێ وەپێمان بەخشیه، تا له ڕێ ئەوانه هاوبەش سریشت خودایی بوین و له گە‎نیانیگ که له مەیل گونا ها ناو دنیا ، دەر بچین.

⁵ وه ئی بونه، حساوی تەقالا بکەن تا وه مل ئیماندان خاسێ فرەوه بکێن و وه مل خاسێ، ناسین

⁶ و وه مل ناسین، وەسەرخوێان زاڵ بون وه مل وەسەرخوێان زاڵ بون، بەردەوامی و وه مل بەردەوامی، خوداناسی و

⁷ وه مل خوداناسی، دوسی براێانه و وه مل دوسی براێانه، مابەت.

⁸ چوینکه ئەگەر ئی چشتیله وه ناودان بود و فرەوه بود، نێیلید وه ناو ناسین خوداوەند ئیمه عیسا مەسیح، بێ فایده یا بی بەر بوین.

⁹ چوینکه ئەو کەسه که ئی چشتیله نێرید، ئەوقره کوره که له تک لویتێ ئەولاتر نیوینید و له هویر بردیه که له گونایل ئەوساێ خوەێ پاکەو بیه.

¹⁰ جا ئێ برایل، هەر چی فرەتر تەقالا بکەن تا دەنگ کریان و هەڵوژاریای خوەدان مور بکێن، ئەڕا ئیه که ئەگەر ئی چشتیله وه جێ بارین هەرگز نیەکەفین.

¹¹ ئەڕا ئیه که وەئیجوره، ئجازەێ کامڵ درێیده پێدان تا بچینه ناو پادشاێ ئەبەدی خوداوەندمان و نجات دەرمان عیسا مەسیح.

¹² جا توام ئی چشتیله هەمویشه بخەمه هویردان، هەر چەن ئەوانه زانين و له ئەو ڕاسیه که دێرین، بەردەوامین.

¹³ مه فکر کەم ئیجوره درسه که تا وەختێگ هامه ناو ئی جەسه، وه وەسلەێ وه هویر خستن ئی چشتیله، هەڵدانگڕنم،

¹⁴ چوینکه زانم ئەو جورەکه خوداوەند ئیمه عیسا مەسیح ڕوشنامەو کرد، وه ئی زوی ئی جەسه هیلمه جێ و چم.

¹⁵ مه هەر چی له دەسم تێ کەم تا بتویەنێن وه شون چیێنم له ئی دنیا هەمویشه ئی چشتیله بارینه هویردان.

¹⁶ چوینکه ئەو وەخته که هێز و هاتن خوداوەندمان عیسا مەسیح وه پێدان جار دیایم، وه شون مەسلەتیلێگ که وە زیرکیەو درس کریانه نەچویمن، بەڵکەم گەورایی ئەیو وه چەو دویمن.

¹⁷ چوینکه وەختێ که ئەیو له خوداێ باوگ، حرمەت و جەڵاڵ گرد و دەنگێگ له جەڵاڵ گەورایی رەسیه ئەیو که، «ئیەسه کوڕه عەزیزەگەم که له لێ فره خوەشنودم.»

¹⁸ ئیمه خوەمان ئی دەنگ ئاسمانیه شنەفتیم، ئەڕا ئیه که له بان ئەو کویەێ موقەدەسه وەگردێا بیمن.

¹⁹ بێجگه ئیه، کەڵام فره دڵنیاێ پەێخەمەریل دێریم که خاسه وەپێ سەرنج بێین، ئەڕا ئیه که هەر جور چراخێگ له شونێگ سیه و تیەریک دروشید تا ئەو وەخته که شەفەق بێید و هەسارەێ شەوەکی له ناو دڵیلدان هەڵ باێد.

²⁰ وەرجه هەر چی چشته، ئیه بزانین که هویچ نەبوەت کتاویل موقەدەس مانا کریاێ هویچکەس نیه.

²¹ چوینکه هویچ نەبوەتێگ هویچ وەخت وه خاست ئنسان نیه، بەڵکەم ئایەمیل وه وەسلەێ روح‌القودوس له لاێ خوداوه قسیه کردن.