دویم یوحەنا 1 - کتاب مقدس به زبان کردی جنوبی - گویش کلهوری

¹ له من شێخ، وه خاتوین هەڵوژاریای و مناڵەگانێ که وەناو ڕاسی دوسیان دێرم، نه تەنیا من، بەڵکەم گشت ئەوانیش که ڕاسی ناسن،

² وەبونەێ ئەو ڕاسیه که وەناومان نیشتەجێ بیه و تا ئەبەد وەگەردمانەو مینێد.

³ فیز و بەزەیی و ئاشتی و سڵامەتی له لاێ خوداێ باوگ و له لاێ عیساێ مەسیح، کوڕ ئەو باوگه، وەناو ڕاسی و مابەت وەگەردمانەو مینێد.

ژیان وەناو ڕاسی و مابەت

⁴ فره دڵخوەشەو بیم که زانستم قێرێ وه مناڵیلد، بەنا وه حوکمێگ که له باوگ ئاسمانی گردیم وەناو ڕاسی ژیەن.

⁵ ئێرنگەیش ئێ خاتوین عەزیز گرامی، له لێد توام که یەکترەکی مابەت بکێم، حوکم تازەێگ ئەڕاد نیەنویسم، بەڵکەم ئیه هەر ئەو حوکمەسه که له سەرەتا داشتیم.

⁶ مابەت ئیەسه که وه پێ حوکمیل خودا زنەیی بکێم، هەر ئەوجورە که له سەرەتا شنەفتینه، حوکم ئیەسه که وەناو مابەت زنەیی بکێم.

⁷ چوینکه لیلاجیل فرەێگ وەناو جهان تەفرتوینا بینه، کەسیلێ که ئێقرار نیەکەن عیسا مەسیح وەناو جەسه ئنسانی هاتێه. ئەو جور کەسیلێ، لیلاج و زد مەسیحن.

⁸ هوشدانه خوەدانەو بود، نەکێ ئەو چشته که ئەڕاێ زامەت کیشایمنه وه دەس بێید، بەڵکەم پاداشێگ کامڵ بگرن.

⁹ هەر کەسێگ له تالیم مەسیح پا بنێه ئەولاتر و وەناوێ نیشتەجێ نود، خودا نێری. ئەوه که وەناو ئەو تالیمه نیشتەجێه، هەم باوگ دێرێ و هەم کوڕ.

¹⁰ ئەگەر کەسێگ هاته ئەڕا لادان و ئی تالیمه ناورد، ڕێ میەنه ماڵەگەدان یا ڕوی خوەش وەپێ نیشان مەێه‌ن،

¹¹ چوینکه هەرکەسێگ که ڕوی خوەش وەپێ نیشان بێید، وەناو کاریل شەڕئاشوانەێ بەشدارەو بود.

¹² هەرچەن چشتیل فرەێگ دێرم تا ئەڕادان بنویسم، وەلێ نیەتوام وه قاغەز و مرەکەو بود. بەڵکەم ئمید دێرم بامه ئەڕا لادان و ڕوی وه ڕوی قسیه بکێم تا خوەشیەگەمان کامڵەو بود.

¹³ مناڵیل خویشک هەڵوژاریاید سڵامه پێد رەسنن. ئامین