دویم قورنتییل 9 - کتاب مقدس به زبان کردی جنوبی - گویش کلهوری

¹ ئێرنگه دی هەوەجی وه ئیه نیه تا له باوەت ئی خزمەته وه ئیمانداریل وه مەسیح ئەڕادان بنویسم،

² ئەڕا ئیه که له تاسەدان ئەڕا مەیەت داین ئاگادارم. وه ئی بونه له لاێ ئیمانداریل مەنتەقەێ مەقدونیه شانازی وەپێدان کردمه. وەپێان وەتمه که ئیوه له ناوچەێ ئەخائیه له پارەکه‎ ئەڕا هدیه داین گورجەو بوینه. ئی ئەزرەتدانه فێشتر ئەوانه ئەڕا ئی کاره هان داس.

³ وەلێ ئی برایله کل کەم تا مالوم بود که شانازیمان وه ئیوه پویچ نویه، بەڵکەم تا هەر ئەوجورە که وەپێان وەتمه، گورجەو بوین.

⁴ نەخوای ئەگەر قێرێگ له ئیمانداریل مەقدونیه وەگەردمەو بان و بزانن که گورجەو نوینه، ئیمه - ئیوه نویشم - له دڵنیاییگ که وەپێدان داشتیم، شەرمزارەو بویمن.

⁵ جا واجو زانستم که له برایل بتوام وەرجه من بانه ئەڕا لادان و هدیەیلی که واده داوین گورجێەو بکەن. تا جور هدیەێگ بود که دیاره وه گێ دڵیگ داینه نه وه زور.

هان داین وه دەس دڵوازای ئەڕا هدیه داین

⁶ قسیه ها سەر ئیه که: هەر کەس کەم بکاڵێ، کەمیش درەو کێ و هەر کەس فره بکاڵێ، فرەیش درەو کێ.

⁷ هەر کەس ئەوقره که ها ناو دڵی بێی، نه وه دودڵی و نه وه زور، چوینکه خودا خوەشی وه ئایەمێگ تێی که وه خوەشیەو هدیه دی.

⁸ جا خودا تویەنێ هەر نیمەتیگ ئەڕادان فرەوه بکێ تا وه گشت چشتێگ ئەڕا هەمویشه گشت هەوەجێیلدان بەراورده بکێ و ئەڕا وەجێ هاوردن هەر کار خاسێگ، وه فراوانی بیاشتوین.

⁹ ئەوجورە که وەناو کتاو زەبور نویسریاس: «وه دەسدڵوازی وه دەستەنگیل بەخشیه، دادپەروەریەگەێ تا ئەبەد و تا ئەبەد بەردەوام مینێ.»

¹⁰ جا ئەوه که تویەمەگه ئەڕا جفتیار و نان ئەڕا خواردن گورجەو کێ، تویەمەگەدان گورجەو کردێه و فرەوه کێ و بەر سالح بویندان فرەوه کێ.

¹¹ ئیوه له هەر باوەتێگەو دەوڵەمەنەو بوین تا له هەر باوەتێگەو بەخشنه بوین، جا ئی بەخشنەێدانه له ڕێ ئیمه بوده بایس سپاس خودا.

¹² ئەڕا ئیه که ئی خزمەته نه تەنیا هەوەجییل ئیمانداریل وه مەسیح پەرچەو کێ، بەڵکەم بایس سپاس قێر فرەێگ له خودا بود.

¹³ وه بونەێ مور ئی خزمەته وه زنەییدان، مەردم ستایش خودا کەن وەبونەێ گوش تەکانن و ئێقراردان وه ئینجیل مەسیح، هەر ئیجوره ئەڕا دەسدڵوازیدان له مەێەت وه ئەوانه و وه گشت نیشان دین.

¹⁴ ئەوانه وەبونەێ فیز فره گەوراێ که خودا وەپێدان کردێه، وه ئەزرەت فرەێگەو ئەڕادان دوعا کەن.

¹⁵ سپاس ئەڕا خودا ئەڕا خەڵاتی که نیود شێوێ بکێ!