دویم قورنتییل 8 - کتاب مقدس به زبان کردی جنوبی - گویش کلهوری

گردەو کردن هدیەیل

¹ ئێرنگه ئێ برایل، توایم له فیزێگ که خودا وه کلیسایل مەنتەقەێ مەقدونیه بەخشاس، ئاگاداردان بکەم.

² چوینکه ئەوانه وەبونەێ بەردیل سەختێگ ئەزمون بویان، هەرچەن فره دەستەنگن وەلێ له خوەشی فره پڕەو بینه و ئی خوەشیه بیەسه بایس دەسدڵوازی بی ئەنازەیان.

³ ئەڕا ئیه که چەنه تویەنایی خوێان - خوەم شاێەتم که ئەوانه تەنانەت فرەتر له ئەوه - مەێەت مەردم دەن،

⁴ فره پاملمان بین و لاڵکینه پێمان که وەناو ئی خزمەته وه ئیمانداریل وه مەسیح بەشدارەو بون.

⁵ ئیانه تەنانەت فرەتر له ئەو چشته که ئیمه چەوەڕێ بیمن کار کردن، چوینکه یەکم جار خوێان پیشکەش خوداوەند کردن و ئمجا وه خاست خودا خوێان پیشکەش ئیمەیش کردن.

⁶ وه ئی بونه، له تیتوس تواسیم هەر ئەوجورە که ئی کار خیر دەسدڵوازانه وەناودان شرو کردوی، تا وه ئاخر بویدێ سەر.

⁷ وەلێ هەر ئەوجورە که وەناو گشت چشتێگ سەرترین - وەناو ئیمان، وەناو قسیه کردن، وەناو ماریفەت، وەناو تاسەێ فره، وەناو مابەتدان وه ئیمه - جا وەناو ئی کار خێریشه بێەنه نوای یەکانەو.

⁸ ئی دەستوره نیەمه پێدان، بەڵکەم وه بەراورد وەگەرد تەقالاێ کەسیل تر توام ڕاسی مابەتدان ئەزمون بکەم.

⁹ چوینکه له فیز خوداوەندمان عیسا مەسیح ئاگادارین که هەر چەن دەوڵەمەن بی، وەبونەێ ئیوه دەستەنگێ گردەوەر تا ئیوه وەبونەێ دەستەنگێ ئەیو دەوڵەمەن بوین.

¹⁰ جا له ئی باوەته باوەڕ خوەم ئویشم، چوینکه ئەڕادان سودمەنه: پارەکه نه تەنیا خوەشدان هاتیاد مەیەت مەردم بێین، بەڵکەم ئی کاره کردین.

¹¹ جا ئێرنگه ئی کاره تەمام بکەن، تا تاسەێگ که وه ئی کاره وەگەرد تەمام کردنێ داشتین وەگەرد تویەنایی ماڵیدان یەکی بود،

¹² ئەڕا ئیه که ئەگەر تاسەێگ بود، خودا هدیەگەێ بەنا وه ڕوی هەرچێ که دێرێد، قەبوڵ کەێد نه ئەو چشته که نێرید.

¹³ چوینکه مەبەستم ئیه نیه که یە بڕێگ وەناو ڕەحەتی بون و ئیوه وه ژێر بار بوین، بەڵکەم باێه وه ڕوی ئنساف بود،

¹⁴ تا وه ئی زەمانه دەوڵەمەنی ئیوه، کەم کوتی ئەوانه پەرچەو بکێ و ڕوژێگیش دەوڵەمەنی ئەوانه کەم کوتی ئیوه پەرچەو کەێد. ویجوره ئنساف بەردەوام مینێد،

¹⁵ ئەوجورە که وەناو کتاویل موقەدەس نویسریاس: «ئەوه که فره گردەو کردوی، چشت فرەێگ له لێ نەمەن و ئەوه که کەم گردەو کردوی، کەم نیاشت.»

کل کردن تیتوس ئەڕا قورنتوس

¹⁶ وەلێ سپاس ئەڕا خودا که هەر ئەو ئەزرەتە ناسه دڵ تیتوس که من ئەڕا ئیوه دێرم.

¹⁷ چوینکه نه تەنیا داواکاریەگەمان قەبوڵ کرد، بەڵکەم خوەێ وه ئەزرەتەو ئەڕا هاتن ئەرالادان پا هەڵگرد.

¹⁸ وەگەردیەو براێگ کل کیم ئەڕا لادان که وەبونەێ خزمەتی وه ئینجیل گشت کلیسایل تاریفەلێ کەن.

¹⁹ بێجگه ئیه، ئەوه له لاێ کلیسایل هەڵوژاریاس تا هاوڕێمان بود و ئی کار خێره ئەڕا جەڵاڵ خودا و نیشان داین خێرخوازیمان وەجێ بارێد.

²⁰ فره هوشمان هەس تا کەسێگ له ئی خزمەت گردەو کردن هدیەێ دەسدڵوازانه لەلێمان گلەی نەکێد.

²¹ چوینکه ئیمه تەقالا کیم نه تەنیا له وەر چەو خوداوەند، بەڵکەم له وەر چەو مەردمیش ئەو چشته که خاسه وه جێ باریم.

²² وەگەرد ئەوانه براگەمانیش کل کیم، که چەن جار ئەزمونێ کردیم و دیمن که وەناو فره له کاریل وه ئەزرەتترە، وەلێ ئێرنگه وەبونەێ دڵنیایی فره وه ئیوه، وه ئەزرەتتر له هەمویشەس.

²³ له باوەت تیتوس، باێه بویشم که له خزمەت مه ئەڕا ئیوه هاوبەش و هاوکار منه؛ هەرئیجوره له باوەت برایلمانیش باێه بویشم که کل کریاێەگان کلیسایل و جەڵاڵ مەسیحن.

²⁴ جا مابەتدان وه ئیانه و هەرئیجوره وه گشت کلیسایل نیشان بێەن تا بزانن شانازیمان وه ئیوه بیخود نیه.