دویم قورنتییل 7 - کتاب مقدس به زبان کردی جنوبی - گویش کلهوری

¹ ئێ عەزیزەیل، ئیمه که ئی وادەیله دێریم، بان خوەمان له هەر ناپاکی جەسه و روح پاکەو بکێم و وەناو زاورچین له خودا، موقەدەس بیێن وه کەماڵ برەسنێم.

دڵشادی پولوس

² ئیمه وەناو دڵ خوەدان جێ بێەن. وه حەق کەسێگ خراوی نەکردیمنه، ڕێ رەوشت کەسێگ نەگەنانیمنه و له کەسێگ سودجویی نەکردیمنه.

³ من ئیه ئەڕا ماکوم کردنێدان، نیویشم. چوینکه وەرجەوە وەپێدان وەتویم که ئەوجورە ئیوه هاینه ناو دڵمان که گورجیم تا وەگەرددان وه یەکەو بمریمن و وەگەرددان وه یەکەو زنەیی بکێم.

⁴ مه تویەنم وه ئازای وەگەرددان قسیه بکەم و فره وه پێدان دڵنیام. وه سەر ئی هەمگه بەردیله، فره دڵگەرمەو بویمه و له خوەشی نیقەڵتوزم.

⁵ ئەڕا ئیه که وەختێ ڕەسیمنه مەنتەقەێ مەقدونیه، لەشمان ئاشاسێگ نیاشت، بەڵکەم له هەر لاێگەو وەناو بەرد بویمن - وه دەیشت مرافەیل داشتیم و لەناو زاورچین.

⁶ وەلێ خودا، که دڵنەوایی مات ‎و مەلولیل کێ، وەگەرد هاتن تیتوس دڵنەواییمان کرد و

⁷ نه تەنیا وەگەرد هاتنێ، بەڵکەم له ڕێ ئەو دڵنەواییه که له ئیوه گردوی، دڵنەوامانەو کرد. ئەوه له تاسەدان ئەڕا دێن من و خەم فرەدان و غیرەتێگ که لەباوەت من دێرین، خەوەر ئەڕامان هاورد، جوری که فره دڵشادم کرد.

⁸ چوینکه تەنانەت ئەگەر وەگەرد نامەگەم خەمباردان کردم، له کردەوێ خوەم بەتاڵ نیم. ئەڕا ئیه که هەرچەن توزێگ بەتاڵەو بیم - چوینکه دیم نامەگەم خەمباردانەو کردوی -

⁹ وەلێ ئێرنگه دڵشادم، نه وه ئی بونه که خەمبارەو بینه، بەڵکەم وەبونەێ ئیه که خەمباریەگەدان بایس بی توبه بکێن. وەبونەێ ئیه که خەمەگەدان ئەڕا خودا بی، تا هویچ زەرەر و زیانێگ له ئیمه وەپێدان نەرەسێ.

¹⁰ چوینکه ئەو خەمباریه که ئەڕا خوداس، بوده بایس توبەێگ که وەرەو نجات چود و بەتاڵی وەناوێ نیه. وه حاڵی که خەمێگ که ئەڕا جهان بود، بوده بایس مردن.

¹¹ ئەڕا ئیه که بوينن که ئی خەم و خوسەێگ که ئەڕا خوداس چ تاسەیلێ وەناودان وه دی هاوردێه: چ تاسەێگ که بیتاوانیدان نیشان بێی، چ توڕەیێگ، چ زاورچینێگ، چ حەسرەتێگ، چ غیرەتێگ، چ ئەدەو کردنێگ. ئیوه خاس نیشاین داینه که له هەر باوەته بیتاوانین.

¹² جا ئەگەر ئەڕادان نامه نویسام وەبونەێ ئەو کەسه که خراوی کردێه و یا ئەوه که وەپێ خراوی بیه، نویه؛ بەڵکەم وه ئی بونه بی که لەلاێ خوداوه غیرەتدان وه ئیمه، وه خوەدان ئاشکرا بود.

¹³ ئیانه گشتێ بایس دڵنەواییمان بیه. بێجگه دڵنەوایی خوەمان، له خوەشی تیتوس فرەتر دڵخوەشەو بویمن، چوینکه ئیوه گشتدان گیانێ تازەوه کردوین.

¹⁴ ئەڕا ئیه که من له لاێ ئەوه شانازی وەپێدان کردم و ئیوه مه شەرمزارەو نەکردین، بەڵکەم هەر ئەوجورە که هەر چی وەپێدان وەتیم درس بی، مالوم بی که شانازیمان له لاێ تیتوسەو درس بیه.

¹⁵ هەر وەخت گوش تەکانندان وه هویر تیەرێ و ئیه که چوی وه ترس و لەرزەو قەبوڵێ کردین، مابەتەگەێ وه ئیوه فرەترەو بود.

¹⁶ دڵشادم که وەناو هەر چشتێ وەپێدان دڵنیام.