دویم قورنتییل 5 - کتاب مقدس به زبان کردی جنوبی - گویش کلهوری

ماڵ ئاسمانیمان

¹ ئێرنگه زانیمن هەر وەخت ئی دەواره که ها بان زەوی که وەناوێ نیشتەجێیمن بڕمێد، ماڵێگ له خودا دێریم که ئەبەدیه و ها ناو ئاسمان، ماڵی که دەس درسی نەکردیه.

² ئەڕا ئیه که وەناو ئی دەواره ئاخ هەڵکیشیم، چوینکه ئەزرەت دێریم که ماڵ ئاسمانیمان بکێمنه وەر،

³ ئەگەر بکێمنێ وەر، دیتر وه ڕویتی نیوینرێیم.

⁴ چوینکه تا وەختێگ که هایمنه ناو ئی دەواره وه دەرد گرانێگ ئاخ هەڵکیشیم، چوینکه نیەتوایم دڵنگ له وەر دەر باریم، بەڵکەم دڵنگێگ تر بکێمنه وەر تا ژیان، ئەو چشته که مرێ قویرتەو بێی.

⁵ ئەیو که ئیمه ئەڕا ئی مەبەسته گورجەو کردێه، خوداس که روح خوەێ جور بەیانه داسه پێمان.

⁶ جا ئیمه هەمویشه ئازایم، هەر چەن زانیمن تا وەختێ که هایمنه ناو ئی جەسه، له خوداوەند دویریم،

⁷ چوینکه وه ئیمان زنەیی کیم، نه وه ئەو چشته که دوینیم.

⁸ ئەرێ، ئازایمن و ئیجوره خاس زانیم، که له ئی جەسه دویرەو بکەفیمن و لەلاێ خوداوەند نیشتەجێ بویمن.

⁹ جا چ وەناو ئی ماڵه بویمن و چ له دەیشت ئی ماڵه، ئامانجمان خوەشنود کردن ئەیوه.

¹⁰ چوینکه گشتمان باێه لەنواێ تەخت داوەری مەسیح بوسیم، تا هەر کەس وه پێ کردەوێ که وەناو جەسەێ کردێه، چ خاس بود چ خراو، سزاێ بوینی.

خزمەت ئاشتی

¹¹ جا وەختێ ماناێ زاور چین له خوداوەند زانیمن، تەقالا کیم تا مەردم قانێ بکێم. ئەو چشته که هیمن ئەڕا خودا ئاشکراس و ئمیدوارم ئەڕا وژدان ئیوەیش ئاشکرا بود.

¹² نیەتوایم وەدواره له خوەمان تاریف بکێم، بەڵکەم توایم مدوێگ بێیمنه پێدان تا وه ئیمه شانازی بکێن، تا بتویەنێن جواو کەسیلێگ بێین که وه ڕوی شێوه شانازی کەن، نه وه ئەو چشته که ها ناو دڵ.

¹³ ئەڕا ئیه که ئەگەر عەقڵمان له دەس دایمنه، وەبونەێ خوداس؛ جا ئەگەر عاقڵیم، وەبونەێ ئیوەس.

¹⁴ چوینکه هایمنه ژێر دەس مابەت مەسیح، وەختێ دڵنیايم که یە نەفەر وەبونەێ گشتیەکی مرد، جا گشت مردن.

¹⁵ ئەیو ئەڕا گشتیەکی مرد تا زنییل دیتر ئەڕا خوێان زنەیی نەکەن، بەڵکەم ئەڕا کەسێگ زنەیی بکەن که وەبونەێانەو مرد و زنیەو بی.

¹⁶ جا، وەشون ئیه، ئیمه هویچکەسێگ وه پێ جەسه نیەناسیم، جا هەر چەن ڕوژیگ مەسیح وه پێ جەسه ناسیایم، ئێرنگه دی ئیجوره نیه.

¹⁷ جا ئەگەر کەسێگ وەناو مەسیح بود، درس‎کریاێگ تازەس. چشتیل کویەنه له بین چی؛ ئیسه، گشت چشتێگ تازەوه بیه!

¹⁸ ئیانه گشتێ له خوداس که له ڕێ مەسیحەو ئیمه وەگەرد خوێەو ئاشتی داس و خزمەت ئاشتی سپاردێەسه ئیمه.

¹⁹ یانێ که خودا وەناو مەسیح بی و ئی جهانه وەگەرد خوێەو ئاشتی دیاد و خەتایل مەردم وه حساویان نیشتیاد و پێخام ئاشتی سپارده پێمان.

²⁰ جا سەفیریل مەسیحیم، وه لەونی که خودا له زوان ئیمه ئەڕا ئاشتی دەنگدان کێ. ئیمه لەلاێ مەسیحەو لاڵکیمنه پێدانەو که وەگەرد خودا ئاشتی بکێن.

²¹ خودا کەسێگ که گونا نەناسێ، ئەڕا ئیمه کرده گونا، تا وه یەکەو بون وەگەرد ئەیو بویمنه سالحان خودا.