دویم قورنتییل 4 - کتاب مقدس به زبان کردی جنوبی - گویش کلهوری

نویر ئینجیل

¹ ئمجا وەگەرد داشتن ئیجور خزمەتێگ که وەبونەێ ئەو بەزەیی خودا دێریم، دڵسەرد نیویمن.

² وەلێ ئیمه ڕێیل نادرسێ و شاریایەو نایمنەسه لا. ئیمه فێڵبازی یا دەسەژێیەی ناو کەڵام خودا قەبوڵ نیەکیمن، وەلێ وەگەرد ئاشکرا وەتن ڕاسی، تەقالا کەیمن له لاێ خودا مورکریاێ وژدان گشتیەکی بویمن.

³ تەنانەت ئەگەر ئینجیلەگەمان شاریاسەو، ئەڕا کەسیلێگ شاریاسەو که هانه ڕێ مەرگ.

⁴ خوداێ ئی جهانه، زەین بی ئیمانیل کور کردێه تا نویر ئینجیل جەڵاڵ مەسیح که وێنەێ خوداێ نادیاریه، نوینن.

⁵ چوینکه ئیمه بانگەوازی خوەمان نیەکیم، بەڵکەم بانگەوازی عیسا مەسیح کەیمن که خوداوەنده، له خوەمان تەنیا وەبونەێ عیسا، ئەویش تەنیا وه پێ خزمەتکاردان قسیه کەیمن.

⁶ چوینکه هەر ئەو خوداێ که فەرمایش کرد: «نویر له ناو تیەریکیەو بدرەوشێد،» نویر خوەێ وەناو دڵمان دروشان تا ڕوشنایی ئاگاداری جەڵاڵ خودا وەناو دەمچەو عیسا مەسیح، وه ئیمه بدرەوشێد.

⁷ وەلێ ئی گەنجینه لەناو دەفریل خەڕێین دێریم، تا ئاشکراوه بود که ئی هێز ئەڵاجویە له خوداس نه له ئیمه.

⁸ ئیمه له هەر لاێگەو هایمنه ناو بەرد، وەلێ وردخام نویمنه؛ سەرمان سڕ مەنیه، وەلێ نائمید نیمن؛

⁹ عەزاو کیشیمن، وەلێ تەنیا نیمن؛ دریایمنەسه زەویا، وەلێ له پا نەکەفتیمنه.

¹⁰ هەمویشه مەرگ عیسا وەناو جەسەمان هەڵگریمن تا زنەیی عیسایش وەناو جەسەمان ئاشکراوه بود.

¹¹ چوینکه ئیمه که زنەیمن، هەمویشه وەبونەێ عیسا مریمن تا زنەیی عیسا وەناو جەسەمان که مرێ، ئاشکراوه بود.

¹² جا مەرگ وەناو ئیمه کار کێ، وەلێ زنەیی وەناو ئیوه.

¹³ وەناو کتاو زەبور نویسریاس: «ئیمان هاوردم، جا قسیه کردم.» هەر ئەو روح ئیمانه وەناو ئیمەیش هەس و ئیمەیش قسیه کەیمن.

¹⁴ چوینکه زانیمن ئەیو که عیسا خوداوەند له مردگیل زنیەو کرد، ئیمەیش وەگەرد عیسا زنیەو کێد و وەگەرددان تیەرێده لاێ خوەێ.

¹⁵ ئەڕا ئیه که ئیانه گشتێ وەبونەێ ئیوەس، تا فیزێگ که کەسیل فرەتر و فرەتر گرێدە وەر، بوده بایس سپاس فرەتر ئەڕا جەڵاڵ خودا.

¹⁶ جا دڵسەرد نیویمن. هەر چەن شێوەێ جەسەێ ئیمه پویترکێید، ئنسان دەروینمان ڕوژ وه ڕوژ تازەترەو بود.

¹⁷ چوینکه ورده بەرد و گوزەراێ ئیمه جەڵاڵێگ ئەبەدی ئەڕامان گورجەو کێ که نیود وەگەرد هویچ بەردێگ بەراوردێ بکی.

¹⁸ جا ئیمه نیەنوڕیمنه چشتیلی که بود بوینیدیان، بەڵکەم نوڕێیمنه چشتیلی که نادیارن، چوینکه چشتیلی که بود بوینیدیان گوزەران، وەلێ چشتیل نادیاری، ئەبەدین.